بۇل تۋرالى قر ەنەرگەتيكا مينيسترلىگىنىڭ ءباسپاسوز قىزمەتى مالىمدەدى.
«كەشە, 2023 جىلعى 13 شىلدەدە ساعات 21:12-دە قولايسىز اۋا رايى جاعدايىندا اقادىر – جەزقازعان 500 كۆ ەلەكتر بەرۋ جەلىسى اجىراتىلدى. ەلەكتر جەلىسىنىڭ پارامەترلەرىنىڭ وزگەرۋى جەزقازعان جەو-نىڭ №7 جانە 11 قازاندىقتارىنىڭ شاڭ قورەكتەندىرگىش قوزعالتقىشتارىنداعى جيىلىك تۇرلەندىرگىشتەرىنىڭ اجىراتىلۋىنان ولاردىڭ سونۋىنە اكەلدى. بۋدىڭ بولماۋىنا بايلانىستى №4, 7 تۋربينالار توقتاتىلدى, بۇل گەنەراتسيانىڭ تولىق تومەندەۋىنە اكەلدى», دەپ حابارلادى قر ەنەرگەتيكا مينيسترلىگىنىڭ ءباسپاسوز قىزمەتى.
ستانتسيانىڭ جۇمىس رەجيمىن قالپىنا كەلتىرۋ ءبىر ساعاتتان كەيىن, ساعات 22:20-دا باستالدى.
«تەحنولوگيالىق بۇزۋشىلىق فاكتىسى بويىنشا جان-جاقتى تەرگەۋ جۇرگىزۋ ماقساتىندا اتومدىق جانە ەنەرگەتيكالىق قاداعالاۋ مەن باقىلاۋ كوميتەتىنىڭ كوميسسياسى قۇرىلدى», دەلىنگەن حابارلامادا.
ۆەدومستۆو جەزقازعان جەو ءبىرىنشى رەت تولىق توقتاتىلماعانىن اتاپ ءوتتى. 19 ماۋسىم ساعات 12:45-تە ءوزىنىڭ ەلەكتر قاجەتتىلىكتەرىن جوعالتۋ سالدارىنان ستانتسيا گەنەراتسياسى 129-دان 0 مۆت-قا دەيىن تومەندەگەن.
«جوعارىدا ايتىلعانداردىڭ نەگىزىندە «قازاقمىس ەنەردجي» جشس-نىڭ باسشىلىعىنا جەزقازعان جەو-نىڭ سەنىمدى جۇمىسىن قامتاماسىز ەتۋ جونىندە پارمەندى شارالار قابىلداۋ تاپسىرىلدى», دەپ حابارلادى مينيسترلىك.
«قازاقمىس ەنەردجي» جشس-نىڭ قاۋىپسىز جۇمىس ماسەلەسى بويىنشا ارنايى كەڭەس 2023 جىلعى 17 شىلدە دۇيسەنبى كۇنى مينيسترلىكتە وتكىزىلەدى.
