سونداي-اق ەلىمىزدىڭ ۇلتتىق اسكەري-پاتريوتتىق ورتالىعىنىڭ ورتالىق اسكەري وركەسترى, مەملەكەتتىك كۇزەت قىزمەتىنىڭ پرەزيدەنتتىك وركەسترى جانە ۇلتتىق ۇلاننىڭ ۇلگىلى-كورسەتىلىمدى وركەسترى قاتىستى. جيىن بارىسىندا قورعانىس ءمينيسترىنىڭ ورىنباسارى, گەنەرال-لەيتەنانت سۇلتان كامالەتدينوۆ ءسوز سويلەدى.
– حالىقارالىق اسكەري وركەسترلەر فەستيۆالى استانامىزدىڭ بەيبىتشىلىك پەن جاسامپازدىق قالاسى, مادەنيەت پەن حالىقتاردى ءبىر ورتاعا تارتىپ, جاقىنداستىراتىن ورتالىق ەكەنىنىڭ جارقىن دالەلى بولماق. مۇنداي ەرەكشە ءىس-شارا ىنتىماقتاستىقتى دامىتۋعا, بەيبىتشىلىك پەن تاتۋ كورشىلىك يدەياسىن ىلگەرىلەتۋگە ىقپال ەتەرىنە سەنىمدىمىن, – دەدى ول.
Band Marathon – قاتىسۋشى وركەسترلەردىڭ 20 مينۋتتىق قويىلىمى. بۇل كۇنى فەستيۆال قوناقتارى ەلدەردى ءوزارا بىرىكتىرەتىن جانە نىعايتاتىن سازدى اۋەن تىلىندە سويلەدى. ونەردە شەكارا جوق ەكەنىن كورسەتكەن الەمنىڭ بىرەگەي اسكەري وركەسترلەرى ۇلتتىق, شىعارماشىلىق جانە ارميا ءداستۇرىنىڭ الۋان ۇلگىسىن كورەرمەندەرگە ۇسىندى.
حالىقارالىق اسكەري وركەسترلەردىڭ مۋزىكالىق فەستيۆالى اياسىندا ونەر كورسەتۋشىلەردىڭ قويىلىمدارى ورتالىق ساياباقتا, «بايتەرەك» مونۋمەنتىنىڭ جانىندا, «حان شاتىر» ساۋدا ويىن-ساۋىق ورتالىعىندا ءوتتى. ورتالىق ساياباقتا ەلوردا تۇرعىندارى مەن قالا قوناقتارى ءۇندىستان, جاپونيا اسكەري وركەسترلەرى مەن ەلىمىزدىڭ مەملەكەتتىك كۇزەت قىزمەتى پرەزيدەنتتىك وركەسترىنىڭ ونەرىن تاماشالادى.
ءۇندىستان اسكەري-اۋە كۇشتەرىنىڭ بىرىككەن وركەسترى كورەرمەندەردى مارش اندەرىمەن, كلاسسيكالىق اۋەندەردى ۇلتتىق ناقىشتا ورىنداۋىمەن باۋراپ الدى. وركەستر ونەرىنىڭ شەبەرلىگى ۇلتتىق اسپاپ – تابلا بارابانىمەن ەرەكشە اسەر بەردى.
استانالىقتار جاپونيانىڭ ءوزىن-ءوزى قورعاۋ تەڭىز كۇشتەرىنىڭ وركەسترىن قۇشاق جايا قارسى الدى. كۇنشىعىس ەلىنىڭ ۇجىمى ەجەلگى جاپون اسكەري مۋزىكاسى مەن زاماناۋي مارشتاردى ەرەكشە ۇلگىدە ورىندادى. ال وزبەكستان قورعانىس مينيسترلىگى ورتالىق ءان-بي ءانسامبلى مەن ورتالىق اسكەري وركەسترىنىڭ ارتىستەرى وزبەك حالقىنىڭ ۇلتتىق ناقىشتاعى اسەم اۋەنىنىڭ قۋاتىمەن عالامات اسەرگە بولەپ, جۇرتشىلىقتى باۋىرلاس رەسپۋبليكا وكىلدەرىن بيمەن دە, قوشەمەتپەن دە قولداۋعا شاقىردى.
«بايتەرەك» مونۋمەنتىندە رەسەي فەدەراتسياسى باتىس اسكەري وكرۋگىنىڭ 23-اسكەري وركەسترى, تۇركيا ۇلتتىق قورعانىس مينيسترلىگىنىڭ اسكەري وركەسترى جانە ەلىمىزدىڭ قارۋلى كۇشتەرى ۇلتتىق اسكەري-پاتريوتتىق ورتالىعىنىڭ ورتالىق اسكەري وركەسترى بارابانشىلاردىڭ ونەرلەرىن كورسەتتى.
ال «حان شاتىر» ساۋدا ويىن-ساۋىق ورتالىعىندا قىتاي حالىق ازات ەتۋ ارمياسىنىڭ اسكەري وركەسترى, ازەربايجاننان كەلگەن گەيدار اليەۆ اتىنداعى اسكەري ينستيتۋتتىڭ وركەسترى, ەلىمىزدىڭ اتىنان ۇلتتىق ۇلاننىڭ ۇلگىلى-كورسەتىلىمدى وركەسترى جۇرتشىلىقتى اسەم اۋەنمەن الديلەدى. وسى كۇندەرى ءوتىپ جاتقان اسكەري وركەسترلەر فورۋمى ەلىمىز بەن استانامىزدىڭ مادەني ومىرىندەگى ەڭ جارقىن كۇندەر رەتىندە حالىقتاردىڭ مادەنيەتى مەن شىعارماشىلىق ۇجىمدار اراسىنداعى قارىم-قاتىناستى نىعايتۋعا ارنالعان بىرەگەي تۇعىرناماعا اينالدى.
«بارىس ارەنا» مۇز ايدىنى سارايىندا وتكەن گالا-كونتسەرتكە جەتى مىڭنان استام كورەرمەن جينالدى. قورىتىندى كونتسەرتكە پرەمەر-مينيستر ءاليحان سمايىلوۆ, قورعانىس ءمينيسترى, گەنەرال-پولكوۆنيك رۋسلان جاقسىلىقوۆ جانە باسقا دا مەملەكەتتىك ورگانداردىڭ باسشىلارى قاتىستى.
كونتسەرت قازاق حاندىعى ءداۋىرى قويىلىمىمەن باستالدى. LED-ەكراندا ۇلتتىق ناقىشتاعى ويۋ-ورنەك, قالقان, شاڭىراق جانە پەتروگليفتەر پايدا بولدى.
ەلىمىزدىڭ قارۋلى كۇشتەرى ۇلتتىق اسكەري-پاتريوتتىق ورتالىعى ورتالىق اسكەري وركەسترىنىڭ, مەملەكەتتىك كۇزەت قىزمەتى پرەزيدەنتتىك وركەسترىنىڭ, ۇلتتىق ۇلان ۇلگىلى-كورسەتىلىم وركەسترىنىڭ, ازەربايجان, ءۇندىستان, قىتاي, رەسەي, تۇركيا, وزبەكستان جانە جاپونيا اسكەرىنىڭ اسكەري وركەسترلەرىن كورەرمەندەر ايرىقشا قۇرمەتپەن قارسى الدى. قازاقستان قارۋلى كۇشتەرىنىڭ باس اسكەري ديريجەرى, «قۇرمەت» وردەنىنىڭ يەگەرى, مايور الماس يبراگيموۆ بەس ءجۇز مۋزىكانتقا بەلگى بەردى. ۇلتتىق اسكەري-پاتريوتتىق ورتالىعى ورتالىق ءانسامبلىنىڭ ءانشىسى داۋرەن تولەۋباەۆ, بىرىككەن حور جانە اسكەري وركەستر ەلىمىزدىڭ ءانۇرانىن سالتاناتتى تۇردە ورىنداپ شىقتى.
مەملەكەتتىك كۇزەت قىزمەتى پرەزيدەنتتىك وركەسترىنىڭ قازاق حالىق ونەرىنىڭ ءىنجۋ-مارجانى سانالاتىن «ياپۋراي» ليريكالىق ءانىن ايتۋى ەرەكشە اسەر قالدىردى. پرولوگتا استاناعا ارنالعان «مەرەيتويلىق مارش» ءوتتى. جۇرتشىلىق مەملەكەتتىك كۇزەت قىزمەتى پرەزيدەنتتىك وركەسترىنىڭ الەمگە ايگىلى مايكل دجەكسون مەن ليونەل ءريچيدىڭ تانىمال ءانى We are the world-تىڭ ورىندالۋىن زور ىقىلاسپەن قابىلدادى.
گالا-كونتسەرت سوڭىندا قورعانىس ءمينيسترى, گەنەرال-پولكوۆنيك رۋسلان جاقسىلىقوۆ ءىس-شاراعا قاتىسۋشىلاردى قۇتتىقتاپ, شەتەلدىك قوناقتارعا ماراپات تابىس ەتتى.
– قازاقستان – سالت-داستۇرگە باي, بەيبىت ەل. بۇل كۇندەرى ەلوردامىز الەم مادەنيەتىن جيناي الاتىن اسەم ورتالىققا اينالدى. بىزگە ءار ەلدەن ءتۇرلى ۇجىمدار, تالانتتى مۋزىكانتتار مەن انشىلەر كەلدى. بۇگىنگى فەستيۆال داستۇرگە اينالىپ, دوستىق, ىنتىماقتاستىق پەن تاتۋلىق قارىم-قاتىناستاردى دامىتۋعا ىقپال ەتەدى دەپ ويلايمىن, – دەپ اتاپ ءوتتى قورعانىس سالاسىنىڭ باسشىسى.
گالا-كونتسەرت ورتالىق انسامبل, بىرىككەن حور جانە وركەستر سوليستەرى قايرات باەكەنوۆتىڭ ورىنداۋىنداعى «استانا» انىمەن اياقتالدى.
