بۇگىنگى تاڭدا دەرەكتەردى ساقتاۋ جانە وڭدەۋ يندۋسترياسى ەكونوميكانىڭ بارلىق سالاسى مەن الەۋمەتتىك ءومىردىڭ تسيفرلىق ترانسفورماتسياسى ءۇشىن اسا ماڭىزدى بولىپ وتىر. سوعان بايلانىستى نەگىزگى ماسەلەنى تالقىلاۋعا «قازاقتەلەكوم», «ترانستەلەكوم», «قازتەلەپورت», «QazCloud», «ۇلتتىق اقپاراتتىق تەحنولوگيالار», «ينتەرنەت-كومپانيا PS», «يت-گراد», «يتگلوبالكوم كاز», «ياندەكس.بۇلت قازاقستان», «ۆك تەح قازاقستان», «وبلاچنىە رەشەنيا» سەكىلدى كومپانيالاردىڭ وكىلدەرى قاتىستى. وتىرىسقا قاتىسۋشىلاردىڭ پىكىرىنشە, دەرەكتەردى وڭدەۋ ورتالىقتارىن, ياعني Cloud نارىعىن قارقىندى دامىتۋ ءۇشىن ماسەلەلەردى كاسىبي قوعامداستىق شەڭبەرىندە بىرلەسىپ شەشۋ ءتيىمدى بولماق. سوندىقتان سالالىق زاڭنامانى جەتىلدىرۋ, ەلدە ءىت قىزمەتتەرىن تۇتىنۋدىڭ سەرۆيستىك مودەلىن دامىتۋ, مەملەكەت-جەكەمەنشىك ارىپتەستىكتىڭ ءتيىمدى مودەلدەرىن ازىرلەۋ, سالاعا ينۆەستيتسيا تارتۋ, وتاندىق ازىرلەمەلەردى ەكسپورتقا شىعارۋ جانە دەرەكتەردى ساقتاۋ مەن وڭدەۋ جۇيەسىن دامىتۋ ءۇشىن دەرەكتەردى وڭدەۋ ورتالىقتارى وپەراتورلارى مەن بۇلتتى سەرۆيستەر قاۋىمداستىعى قۇرىلدى. قاۋىمداستىق نارىقتاعى كوممەرتسيالىق دەرەكتەر ورتالىقتارىنا نەگىزدەلگەن قىزمەتتەردى جانە بۇلتتى قىزمەتتەردى ۇسىنۋمەن تىكەلەي بايلانىستى وكىلدەردىڭ باسىن قوسادى.
قاۋىمداستىقتىڭ جۇمىسىن ۇيلەستىرۋ كوپ جىل بويى ەلىمىزدە تەلەكوم-اناليتيكا جانە باسقارۋشىلىق كونسالتينگكە ماماندانعان «iKS-Consulting» اناليتيكالىق اگەنتتىگىنىڭ دەرەكتەر ورتالىقتارى مەن بۇلتتى سەرۆيستەر نارىعى بويىنشا وكىلدىگىن باسقارىپ كەلە جاتقان سۆەتلانا چەرنەنكوعا تاپسىرىلدى.
– قاۋىمداستىق تەحنولوگيالىق جانە وپەراتورلىق بەيتاراپتىق قاعيداتتارىندا قۇرىلادى. بۇل نارىق پەن مەملەكەت اراسىندا بۇكىل سالانىڭ مۇددەسى ءۇشىن ءتيىمدى كوممۋنيكاتسيا ارناسىن جولعا قويۋعا, ونى قۇقىقتىق جەتىلۋدىڭ جاڭا دەڭگەيىنە شىعارۋعا, اقپاراتتىق اشىقتىق ەسەبىنەن ينۆەستيتسيالىق تارتىمدىلىقتى ارتتىرۋعا مۇمكىندىك بەرەدى. قاۋىمداستىق قىزمەتىنىڭ ماڭىزدى باعىتى ەلىمىزدە دە, ودان تىس جەرلەردە دە قوعام مەن بيزنەستىڭ يگىلىگى ءۇشىن جۇمىس ىستەيتىن تارتىمدى جانە ءتيىمدى سەرۆيستەر مەن قوسىمشالاردى قۇرۋ ءۇشىن وقىتۋ باعدارلامالارى, ۇزدىك الەمدىك تاجىريبەلەرگە قول جەتكىزۋ جانە سالالىق ساراپتاما ەسەبىنەن كاسىبي كادرلاردى دايارلاۋعا جاردەمدەسۋ بولماق, – دەدى جاڭا قاۋىمداستىقتىڭ باسشىسى س.چەرنەنكو.
تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى تەلەكوممۋنيكاتسيا كوميتەتى توراعاسىنىڭ ورىنباسارى گۇلنار بوكەەۆا دەرەكتەردى ساقتاۋ مەن وڭدەۋدىڭ وتاندىق ينفراقۇرىلىمىنىڭ دەڭگەيى ۇزدىك الەمدىك تاجىريبەلەر مەن ستاندارتتارعا سايكەس كەلۋى وتە ماڭىزدى ەكەنىن جانە قاۋىمداستىق نارىقتىڭ بارلىق قاتىسۋشىسىن وزەكتى سالالىق ساراپتامامەن ءوزارا بايىتۋ الاڭىنا اينالاتىنىنا سەنىمدى ەكەنىن ايتتى.
– تسيفرلىق دامۋ مينيسترلىگى كوممەرتسيالىق دەرەكتەر ورتالىقتارى مەن بۇلتتى قىزمەتتەر نارىعى ويىنشىلارىنىڭ مەملەكەت پەن نارىق اراسىنداعى ديالوگ ءۇشىن ارنا بولۋعا, ءبىر-ءبىرىن ەستۋگە, دەرەكتەردى ساقتاۋ جانە وڭدەۋ سالاسىن دامىتۋ ءۇشىن ءتيىمدى شەشىمدەر ازىرلەۋگە مۇمكىندىك بەرەتىن سالالىق قاۋىمداستىق قۇرۋ جونىندەگى باستاماسىن قۇپتايدى ءارى قولدايدى. مەملەكەت باسشىسىنىڭ ەلىمىزدە وڭىرلىك دەرەكتەر حابىن قالىپتاستىرۋ جونىندەگى العا قويعان ماقساتى رەتتەۋشىدەن جانە سالادان تەڭگەرىمدى شەشىمدەر قابىلداۋ ءۇشىن تۇراقتى تىعىز بايلانىستا بولۋدى تالاپ ەتەدى. ۇلتتىق ينفراقۇرىلىمدىق جانە سەرۆيستىك وپەراتورلاردىڭ مۇددەسىن ەسكەرۋگە جانە قاجەتتى قولداۋ شارالارىن قامتاماسىز ەتۋگە, سونداي-اق ءوز شەشىمدەرىن ورتا ازيا اۋماعىندا ودان ءارى تاراتا وتىرىپ, ەلىمىزدە ورنالاستىرۋعا جانە وقشاۋلاۋعا دايىن شەتەلدىك ينۆەستورلار مەن ارىپتەستەر اعىنى ءۇشىن سالانىڭ تارتىمدىلىعىن قالىپتاستىرۋعا مۇمكىندىك بەرەدى, – دەدى گ.بوكەەۆا.
«قازاقتەلەكوم» اق فيليالى – اقپاراتتىق تەحنولوگيالار ديۆيزيونىنىڭ باس ديرەكتورى مارات ابدىلدابەكوۆتىڭ ايتۋىنشا, ەكونوميكانىڭ وتاندىق سالالارىن تسيفرلاندىرۋدىڭ جاھاندىق ۇردىستەرى مەن مىندەتتەرىن ۇستانۋ ءۇشىن «قازاقتەلەكوم» ءوزىنىڭ ينفراقۇرىلىمى نەگىزىندە دە, بۇلتتى شەشىمدەردى جەتكىزۋشىلەرمەن سەرىكتەستىكتە دە دەرەكتەردى وڭدەۋ ورتالىقتارى جەلىسىن كەڭەيتۋگە, ولاردىڭ قولجەتىمدىلىگىن ارتتىرۋعا جانە بۇلتتى سەرۆيستەردى دامىتۋعا كوپ كوڭىل بولەدى. ءداستۇرلى IaaS سەرۆيستەرىنىڭ دامۋىن عانا ەمەس, سونىمەن قاتار «بۇلتتار» مەن تەلەكوممۋنيكاتسيالاردىڭ تۇيىسكەن جەرىندە كەشەندى شەشىمدەر پىسىقتالاتىن بولادى.
ال «قازتەلەپورت» اق باسقارما توراعاسىنىڭ ورىنباسارى ۆالەري ماركين تاۋەلسىز قاۋىمداستىقتىڭ بەرەرى كوپ دەيدى.
– تاۋەلسىز قاۋىمداستىقتىڭ جۇمىسى دەرەكتەر ورتالىعى مەن بۇلتتى تەحنولوگيالار قىزمەتتەرى نارىعىن دامىتۋعا سەرپىن بەرەتىنى ءسوزسىز. سالانىڭ وزەكتى ماسەلەلەرىنىڭ اشىقتىعى مەن تالقىلانۋى, سايىپ كەلگەندە, ينجەنەرلىك قۇرامنىڭ تەحنيكالىق مۇمكىندىكتەرى مەن كاسىبيلىگىن بىرىكتىرۋ ارقىلى ەڭ جاقسى, سەنىمدى قىزمەت كورسەتۋگە جول اشادى. قۇرىلعان قاۋىمداستىق قىزمەتىنىڭ نازارىندا كادرلاردى دايارلاۋ جانە قايتا دايارلاۋ ماسەلەلەرى بولۋعا ءتيىس. بۇل – كەز كەلگەن داتا-ورتالىقتىڭ ينجەنەرلىك ينفراقۇرىلىمىمەن شتاتتان تىس جاعدايلاردى پىسىقتاۋعا پروفيلاكتيكالىق ءتاسىل, ەكىنشى جاعىنان, وسى ماسەلەگە نازار اۋدارۋ ەلدە ءىت قىزمەتتەرىن تۇتىنۋدىڭ سەرۆيستىك مودەلىن تانىمال ەتۋگە ىقپال ەتەتىن بولادى, – دەدى ۆ.ماركين.
