شاكارىم قۇدايبەردى ۇلىنىڭ 165 جىلدىق مەرەيتويىن تويلاۋ اباي وبلىسىندا باستاۋ الدى. «شاكارىم جۇرگەن ىزبەنەن» دەپ اتالعان كەرۋەن اقىننىڭ مەرەيتويىن اباي اۋدانىندا دا اتاپ وتەدى. بۇل شارانىڭ ماقساتى – شاكارىم قۇدايبەردى ۇلىنىڭ شىعارماشىلىعىن ناسيحاتتاۋ جانە اقىننىڭ ۇرپاقتارىن اتا قونىسىمەن تانىستىرۋ. سوندىقتان مەرەيتويعا ونىڭ ۇرپاقتارى قاتىستى. الماتى قالاسىنىڭ تالعار اۋدانىنان شاكارىمنىڭ ايعانشادان تۋعان ۇلى زياتتىڭ نەمەرەسى نۇرلان مەرەكە ۇلى وتباسىمەن, الماتى قالاسىنىڭ پانفيلوۆ اۋدانىنان, استانا, پاۆلودار, تەمىرتاۋ, ەكىباستۇز قالاسىنان ۇرپاقتارى كەلدى.
– بيىل شاكارىم اتامىزدىڭ 165 جىلدىق مەرەيتويىنا ارنايى الماتى وبلىسىنان ءبىر توپ ۇرپاقتارى كەلدىك. ۇلى اقىننىڭ شوبەرەسىمىن. شاكارىم اتامىزدىڭ مەرەيتويى وسىنداي اۋقىمدى تۇردە اتالىپ ءوتىپ جاتقانىنا قۋانىشتىمىز. ۇلى تۇلعالارىمىز زۇلمات زاماندا ءومىر ءسۇرىپ, ەلدەن كەتۋگە ءماجبۇر بولدى. دەگەنمەن قالدىرعان وشپەس مول مۇراسى, تۋىندىلارى حالقىمىزدىڭ يگىلىنە جاراپ وتىر, – دەدى اقىننىڭ شوبەرەسى نۇرلان زياتوۆ.
سونداي-اق ءىس-شاراعا وبلىس اكىمى نۇرلان ۇرانحاەۆ, زيالى قاۋىم وكىلدەرى, قالا تۇرعىندارى مەن جاستار قاتىستى.
«ادامدىق بورىشىڭ –
حالقىڭا ەڭبەك قىل.
اق جولدان اينىماي
ار ساقتا, ونى بiل»,
– دەپ جىرلاعان شاكارىم بابامىزدىڭ ولەڭدەرى – گۋمانيزمنىڭ تەمىرقازىعى. اباي ەلى ۇلى بابالارىن ءاردايىم ۇلىقتاپ كەلەدى. شاكارىم قۇدايبەردى ۇلىنىڭ 165 جىلدىعى دا ونەگەلى ىستەرمەن ورنەكتەلۋى كەرەك دەپ ويلايمىز», – دەدى وبلىس اكىمى نۇرلان ۇرانحاەۆ.
