ءتىلسىز جاۋ ورال قالاسىندا, سونداي-اق اقجايىق, تەرەكتى, سىرىم, ءبورلى, قازتالوۆ جانە بايتەرەك اۋدانىنان شىققان. تەرەكتى اۋدانىنداعى ءابدىراحمان ايتيەۆ اتىنداعى اۋىلدا بولعان ءورتتىڭ قاۋىپتىلىگىنەن 10 ءۇيدىڭ تۇرعىندارى ۋاقىتشا كوشىرىلدى. وقيعا ورنىنا باتىس قازاقستان وبلىسىنىڭ اكىمى ناريمان تورەعاليەۆتىڭ ءوزى بارىپ, توتەنشە جاعدايدى كوزىمەن كوردى. بارلىق ارناۋلى كۇشتەر مەن ماماندار جۇمىلىپ, ۇيلەسكەن قيمىلدىڭ ارقاسىندا ەكى قورا عانا ورتەندى, مال-جان, تۇرعىن ۇيلەر امان قالدى. تۇنگى ساعات 00:40-تا اۋىلداعى ءورت تولىق ءسوندىرىلدى, 44 ادام ۇيىنە ورالدى. وسى وقيعانىڭ سالدارىنان 26 گا مەملەكەتتىك ورمان قورى جانە 24 گا قۇرعاق ءشوپ جانىپ كەتتى.
ورال قالاسىنىڭ وزىندە ۇيىرىلە سوققان قاتتى جەلدىڭ اسەرىنەن اعاشتار قۇلاپ, ەلەكتر جەلىسىنە زاقىم كەلگەن. جەرگىلىكتى ۋاقىت 14:15-تە 10 م/س جەلدىڭ ەكپىنى ورال قالاسىنىڭ جەكە ۇيلەر ورنالاسقان سەكتورى ءىشىنارا زارداپ شەكتى. بارلىعى 800-گە جۋىق جەكە ءۇي, ونىڭ ىشىندە دەركول كەنتى, جەلاەۆو كەنتى, كونە اۋەجاي شاعىن اۋدانى, 2-ءشى جۇمىسشى, ورتالىق بازار اۋماعى (بارلىعى 1898 جەكە تۇرعىن ءۇي) جارتىلاي جارىقسىز قالدى. باتىس قازاقستان اەجك جشس كۇشىمەن (40 ادام جانە 10 ادام) كەزەڭ-كەزەڭىمەن قوسىلۋ جۇرگىزىلۋدە.
وبلىستىڭ ءار جەرىندە شىعىپ جاتقان ءورتتىڭ باسىم كوپشىلىگى دالا ءورتى, قۇرعاق ءشوپتىڭ جانۋى بولىپ تۇر. وقيعا بولعان جەرلەرگە ارنايى توپتار جىبەرىلىپ, اپاتتىق-قۇتقارۋ جۇمىستارى جاسالۋدا.
قازىر باتىس قازاقستان وبلىستىق توتەنشە جاعدايلار دەپارتامەنتىنىڭ بازاسىندا جەدەل شتاب اشىلعان. ونىڭ قۇرامىندا بارلىق كوممۋنالدىق قىزمەت بار. وسىلايشا وبلىستاعى بارلىق اقپارات سارالانىپ, جاعداي باقىلانىپ وتىر. شەكارالىق ايماقتاردا رەسەيلىك توتەنشە جاعداي ارنايى قىزمەتتەرىمەن حابار الماسۋدا.
كەشە كەشكىسىن ەڭ كۇردەلى جاعداي تەرەكتى اۋدانىنىڭ قۇماقساي اۋىلىندا بولعان ەدى. 25 گەكتار القاپتى شارپىعان ءورت ورمانعا اۋىسىپ كەتە مە دەگەن قاۋىپ بولعان. ءورت سوندىرۋشىلەر جۇمىلا قيمىلداپ, دەر كەزىندە ءورتتى وقشاۋلادى. شامامەن 25 گا القاپ وتقا ورانعان. وقيعا ورنىندا جەرگىلىكتى اتقارۋشى مەكەمەلەر, ەرىكتى ءورت سوندىرۋشىلەر قۇرىلىمى, تجد, «قازاۆتوترەۆەل» مەكەمەسىنەن شامامەن 50 ادام, 15-تەن اسا تەحنيكا بولعان.
اۋا-رايىن بولجاۋ مەكەمەلەرى باتىس قازاقستان وبلىسى بويىنشا 10-شىلدە كۇنى دە داۋىلدى ەسكەرتۋ جاريالادى: 10 شىلدەدە 35-39 گرادۋسقا قاتتى ىستىق ساقتالادى. 10-11 شىلدەدە وبلىستىڭ وڭتۇستىگىندە, شىعىسىندا ءورت قاۋپى جوعارى. وڭتۇستىك, وڭتۇستىك-شىعىسىندا كۇندىز جەل ەكپىنى 18 م/س. قاتتى ىستىق 37-39 گرادۋس بولادى دەپ كۇتىلۋدە. قازىرگى ۋاقىتتا وبلىس بويىنشا جاعداي كۇردەلەنە تۇسۋدە, جانۋ مەن ءورتتىڭ بارلىق فاكتىلەرى توتەنشە جاعدايلار دەپارتامەنتىنىڭ ەرەكشە باقىلاۋىندا.
جوعارىدا ايتىلعانداي, جاعدايدى وبلىس باسشىسى دا قاداعالاپ وتىر. 10 شىلدەگەن قاراعان تۇنگى ساعات 02.30-دا توتەنشە جاعداي دەپارتامەنتىندە قۇرىلعان جەدەل شتابتا ناريمان تورەعاليەۆ قازتالوۆ, تاسقالا, اقجايىق جانە سىرىم اۋداندارى اۋماعىندا ورىن العان ءورتتى اۋىزدىقتاۋ بويىنشا ۇيلەستىرۋ جينالىسىن وتكىزگەن.
«جەرگىلىكتى اتقارۋشى ورگاندار مەن ءورت سوندىرۋشىلەر 24/7 رەجيمىندە جۇمىس ىستەۋدە. ءىرى ءورت وشاقتارى بار اۋدانداردىڭ باسىندا ءبىر ورىنباسارىم جانە توتەنشە جاعداي دەپارتامەنتى باسشىسى جۇمىستانۋدا. ءورتتى لوكاليزاتسيالاۋعا دەپارتامەنت كۇشتەرىنەن بولەك شارۋا قوجالىقتارى, جەرگىلىكتى اۋىل تۇرعىندارى قول ۇشىن بەرۋدە.
...وسىعان وراي, قاۋىپسىزدىك ەرەجەلەرىن قاتاڭ ساقتاۋدى سۇرايمىن: جول جيەگىنە تەمەكى تۇقىلىن تاستاماڭىز, تابيعات اياسىنا دەمالىس كەزىندە وت جاقپاڭىز, وتە قاتتى ىستىق كۇندەرى ءشوپ شابۋ جۇمىستارىن ۋاقىتشا توقتاتىپ, ءشوپتى تاسىمالداعان كەزدە تەك ۇشقىن ۇستاعىشپەن جابدىقتالعان تەحنيكانى پايدالانىڭىز», دەگەن ۇندەۋ تاراتتى بقو اكىمى.
10 شىلدە كۇنى تۇستەن كەيىن باتىس قازاقستان وبلىسىنىڭ باتىسىندا, سولتۇستىگىندە نايزاعاي, بۇرشاق, وبلىستىڭ وڭتۇستىگىندە, باتىسىندا شاڭدى داۋىل كۇتىلۋدە. جەل وڭتۇستىك, وڭتۇستىك-شىعىستان, كۇندىز وبلىستىڭ ۇلكەن بولىكتەرىندە ەكپىنى 15-20 م / س. 35-39 گرادۋسقا دەيىن قاتتى ىستىق ساقتالادى. 10-11 شىلدەدە وبلىستىڭ وڭتۇستىگىندە, شىعىسىندا ءورت قاۋپى جوعارى. ورال قالاسى بويىنشا: 10 شىلدە كۇنى تۇستەن كەيىن نايزاعاي, بۇرشاق كۇتىلەدى. جەل وڭتۇستىك, وڭتۇستىك-شىعىس كۇندىز جەل ەكپىنى 18 م/س. 37-39 گرادۋسقا دەيىن قاتتى ىستىق كۇتىلۋدە. 10-11 شىلدەدە ءورت قاۋپى جوعارى بولادى دەپ كۇتىلۋدە. وسىعان بايلانىستى, ءورت قاۋىپسىزدىگىنىڭ بارلىق ەرەجەلەرىن قاتاڭ ساقتاۋ تالاپ ەتىلۋدە.
باتىس قازاقستان وبلىسىندا جيىلەپ كەتكەن ءورتتى ءسوندىرۋ ءۇشىن كورشىلەس اقتوبە وبلىسى توتەنشە جاعدايلار دەپارتامەنتىنەن 32 ادام مەن 5 تەحنيكا جولعا شىقتى, دەپ حابارلايدى توتەنشە جاعدايلار مينيسترلىگى ءباسپاسوز قىزمەتى.
دالا ءورتىن جەدەل ءسوندىرۋ ءۇشىن استانادان قازاۆياقۇتقارۋ-875 تىكۇشاعى دا ۇشىپ شىققان.
