سالتاناتتى جيىن استاناداعى دەنساۋلىق ساقتاۋ سالاسىنىڭ جەتىستىكتەرى تۋرالى بەينەكورىنىسپەن باستالدى.
ساندىق دەرەكتەرگە سايكەس, سوڭعى 10 جىلدا ەلوردادا تۋ كورسەتكىشى 41 پايىزعا ارتىپ, استانالىقتاردىڭ جالپى سانى 2 ەسەگە ءوستى. تۋبەركۋلەزدەن بولاتىن ءولىم 13,1 پايىزعا كەمىسە, قاتەرلى ىسىك ءولىم-ءجىتىمى 3 ەسە تومەندەدى. سونداي-اق جازاتايىم وقيعالار مەن ۋلانۋدان بولاتىن ءولىم-ءجىتىم 16,7 پايىزعا ازايعان. استاناداعى مەديتسينا ۇيىمدارىنىڭ سانى 38-دەن 314-كە دەيىن ارتتى. سوڭعى 2 جىلدا كەش قىزمەت كورسەتىلگەن جەدەل جاردەم شاقىرۋلارىنىڭ ۇلەسى 8,1 پايىزدان 4,1 پايىزعا دەيىن تومەندەدى. بۇگىندە ەلوردادا ماتەريالدىق جاراقتاندىرۋ 95 پايىزدى قۇرايدى.
اق حالاتتى ابزال جانداردىڭ باعا جەتپەس ەڭبەگىن ناسيحاتتاۋدى ماقسات ەتكەن جيىنعا قالا اكىمىنىڭ ورىنباسارى ەرلان بەكمۇرزاەۆ قاتىسىپ, بارشا جينالعان مەديتسينا قىزمەتكەرلەرىن قۇتتىقتادى.
«سىزدەردى كاسىبي مەرەكەلەرىڭىزبەن جانە قالالىق دەنساۋلىق ساقتاۋ جۇيەسىنىڭ 25 جىلدىعىمەن قۇتتىقتايمىن. 25 جىلدا ەلوردادا دەنساۋلىق ساقتاۋ سالاسى قارقىندى دامىدى. تۋ كورسەتكىشى ءوسىپ, ەلوردالىقتاردىڭ ءومىر ءسۇرۋ ۇزاقتىعى ارتتى. مۇنىڭ بارلىعى اق حالاتتى ابزال جانداردىڭ ەڭبەگىنىڭ ارقاسىندا دەپ بىلەمىن. سىزدەر كۇن سايىن ادامداردىڭ ءومىرىن ساقتاپ, دەنساۋلىعىن قالپىنا كەلتىرۋگە كومەكتەسىپ كەلە جاتىرسىزدار. ماڭىزدى ءارى ولشەۋسىز ەڭبەك ەتىپ جۇرگەن بارلىق قىزمەتكەرلەردىڭ ەرلىگى ەڭ جوعارى ماقتاۋعا لايىق», دەدى قالا اكىمىنىڭ ورىنباسارى.
ىزىنشە ەرلان بەكمۇرزاەۆ بىرقاتار قىزمەتكەرگە قالا اكىمى مەن ورىنباسارىنىڭ العىس حاتىن تابىستادى. ودان كەيىن قر دەنساۋلىق ساقتاۋ ءبىرىنشى ۆيتسە-ءمينيسترى تيمۋر سلامجان ۇلى مينيسترلىك اتىنان بىرقاتار ەلوردالىق اق حالاتتى ابزال جانداردى توسبەلگىمەن ماراپاتتادى.
ماراپاتتاۋ راسىمىنەن كەيىن قالالىق قوعامدىق دەنساۋلىق ساقتاۋ باسقاراماسىنىڭ باسشىسى تيمۋر مۇراتوۆ ەلورداداعى مەديتسينا سالاسىنىڭ جەتىستىكتەرى تۋرالى ايتىپ, ءبىر توپ ارىپتەسىنە ءوز اتىنان العىس حات تاپسىردى.
جيىن بارىسىندا 8 نوميناتسيا بويىنشا وسى جىلدىڭ ەڭ ۇزدىك مەدينيتسا قىزمەتكەرلەرى مەن مەديتسينا ۇجىمدارى ماراپاتتالدى.
بيىلعى «ۇزدىك مساك ۇيىمى» نوميناتسياسى بويىنشا №2 قالالىق ەمحانا جەڭىمپاز اتاندى. №2 كوپبەيىندى قالالىق بالالار اۋرۋحاناسىنىڭ باس دارىگەرى گۇلنار كۋلۋشەۆاعا «2023 جىلدىڭ ءتيىمدى مەنەدجەرى» نوميناتسياسى بەرىلدى. №3 بريگادا ۇجىمى «ۇزدىك جەدەل مەديتسينالىق جاردەم بريگاداسى» جۇلدەسىن جەڭىپ الدى. №2 قالالىق كوپبەيىندى اۋرۋحانانىڭ دارىگەرى رۋسلان حاسەنوۆ «ۇزدىك حيرۋرگ» نوميناتسياسىنا يە بولدى. ال №3 قالالىق ەمحانانىڭ قىزمەتكەرى گۇلبانۋ بەيسەمباەۆا «ۇزدىك فارماتسەۆت» اتالىمى بويىنشا جەڭىمپاز اتاندى. «ۇزدىك اكۋشەر-گينەكولوگ» نوميناتسياسىنىڭ يەگەرى №2 قالالىق كوپبەيىندى اۋرۋحانانىڭ دارىگەرى ولگا ۆاسكوۆسكايا بولدى. №2 كوپبەيىندى قالالىق بالالار اۋرۋحاناسىنىڭ قىزمەتكەرى ايگۇل سادۋاقاسوۆا «ۇزدىك ورتا مەديتسينا قىزمەتكەرى» نوميناتسياسىنا يە بولدى. ال 2023 جىلدىڭ «ۇزدىك جالپى پراكتيكا دارىگەرى» دەپ №13 قالالىق ەمحانانىڭ دارىگەرى جانات مۇراتقاليەۆا تانىلدى.
