شىمكەنتتە تۇرعىن ءۇي قۇرىلىسىنىڭ قارقىن الۋى – زاڭدى قۇبىلىس. ويتكەنى جىل سايىن مەگاپوليستە حالىق سانى ءوسىپ كەلەدى. سوندىقتان ءبىرىنشى كەزەكتە ادامداردى باسپانامەن قامتاماسىز ەتۋ – باستى مىندەت. ەكىنشىدەن, جاڭادان بوي كوتەرگەن تۇرعىن ءۇي كەشەندەرىندە زاماناۋي الەۋمەتتىك نىساندار دا سالىنىپ جاتىر. جاڭا ەمحانا, مەكتەپ, بالاباقشالار حالىققا قىزمەت كورسەتۋدە. مەديتسينالىق, ءبىلىم بەرۋ نىساندارىنىڭ اشىلۋىمەن حالىقتىڭ الەۋمەتتىك سۇرانىسى قامتاماسىز ەتىلىپ وتىر.
شىمكەنت – جاستارى كوپ قالا. سونىمەن بىرگە مەكتەپتە ءبىلىم الاتىن بالالار سانى دا كوپ. بۇل كورسەتكىش بويىنشا رەسپۋبليكاداعى وڭىرلەر اراسىندا الدىڭعى ورىندا ەكەنى ءسوزسىز. وسى ورايدا جاستاردىڭ, اسىرەسە مەكتەپ جاسىنداعى بالالاردىڭ ساباقتان تىس كەزدەگى ۋاقىتىن ءتيىمدى پايدالانۋ ماڭىزدى ءرول وينايدى. سەبەبى جاستايىنان ءبىر ىسكە دەن قويىپ, سوعان ماشىقتانىپ وسكەن بالادان كەلەشەكتە مىقتى مامان شىعادى. ناعىز ۇلتىن سۇيەر ازامات, ەڭبەكقور جاندار سولار بولادى. كىشكەنتاي كەزىنەن بىلىمگە قۇشتار, ەڭبەكتى جانىنداي جاقسى كورەتىن بالادان ەشقاشان جالقاۋ, مىنەزى ناشار ازامات شىقپايدى. سوندىقتان دا مەكتەپتەن تىس تاربيەگە پرەزيدەنت تە ايرىقشا كوڭىل ءبولىپ وتىر. مەملەكەت باسشىسى «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى جولداۋىندا: «قۋاتتى ۇلتتىڭ دىڭگەگى – حالىق. ەڭ باستىسى, ازاماتتارىمىزدىڭ دەنساۋلىعى مىقتى, ءبىلىمى تەرەڭ بولۋى كەرەك. كاسىبيلىك پەن ەڭبەكقورلىق قوعامىمىزدا ەڭ جوعارى ورىندا تۇرۋى قاجەت. تاعى دا قايتالاپ ايتامىن. ەلىمىزدە ەڭبەكقور ادام, كاسىبي مامان ەڭ سىيلى ادام بولۋعا ءتيىس. وسىنداي ازاماتتار مەملەكەتىمىزدى دامىتادى. مەن ۇلتتىق قۇرىلتايدا جانە «جاستار رۋحىنىڭ» سەزىندە بۇعان ارنايى توقتالدىم. ءبىز قاراپايىم ەڭبەك ادامىنا قۇرمەت كورسەتۋىمىز كەرەك. قانداي كاسىپپەن اينالىسساڭ دا, ونى ساپالى اتقارۋ ماڭىزدى», دەپ اتاپ وتكەن ەدى.
ال ەڭبەكقور, ءوز ىسىنە ادال مامان بىردەن پايدا بولا سالمايدى. ول ءۇشىن ادامدى سول قاسيەتكە جاستايىنان تاربيەلەۋ كەرەك. وقۋشىلار سارايى – وسىناۋ ماقساتتى جۇزەگە اسىراتىن بىردەن-ءبىر ماڭىزدى ءتالىم-تاربيە بەرەتىن اسىل مەكەن. سوندىقتان جەرگىلىكتى اكىمدىك بالالاردىڭ ءتالىم-تاربيەسىنە كوبىرەك دەن قويىپ, شاھاردىڭ اكىمشىلىك-ىسكەرلىك ورتالىعى ماڭىنان ءزاۋلىم وقۋشىلار سارايىن سالىپ بەردى. جۋىردا وسى اتالعان نىساننىڭ رەسمي اشىلۋى بولدى. زاماناۋي وقۋشىلار سارايىنىڭ قۇرىلىسىن جۇرگىزگەن – ء«ۆى Group» كومپانياسى.
قالالىق №2 وقۋشىلار سارايىنىڭ ديرەكتورى دانيار ەگىزباەۆتىڭ ايتۋىنشا, ماۋسىم ايىندا سالتاناتتى تۇردە اشىلعان مەكەمەگە قازىرگى تاڭدا مينيسترلىكتىڭ بۇيرىعىنا سايكەس پەداگوگتەردى قاجەتتى ماماندىق بويىنشا قىزمەتكە كونكۋرس ارقىلى قابىلداۋ ءجۇرىپ جاتىر. كونكۋرس اياقتالعان سوڭ اڭگىمەلەسۋ بولادى. سودان كەيىن كوپ ۇزاتپاي بالالاردى قابىلداۋ باستالادى. ويتكەنى قازىردىڭ وزىندە ۇيىرمەگە بالاسىن تاپسىرسام دەپ كەلىپ جاتقان اتا-انا كوپ. ولاردىڭ كوپشىلىگى باسسەيندى تاڭداعىسى كەلەدى. الداعى ۋاقىتتا 25 بالادان 4 توپ تاڭەرتەڭ, تۇستەن كەيىن تاعى وسىنشا توپ, سوندا بارلىعىن قوسقاندا 200 بالا كۇن سايىن باسسەيندە ءجۇزۋ جاتتىعۋلارىن جاساماق. ەرتەسىنە باسقا توپتىڭ بالالارى كەلەدى. وسىلايشا, اپتاسىنا 400 بالا كۇنارا باسسەينگە كەلىپ تۇرادى. وقۋشىلار سارايىنىڭ باستى ەرەكشەلىگى دە سول, ونىڭ جارتىلاي وليمپيادالىق ستاندارتقا ساي 25 مەترلىك باسسەينى بار. سونىمەن بىرگە شاعىن قاۋىزدار قاراستىرىلعان. ول ەكىنشى قاباتتا ورنالاسقان. وعان نەگىزىنەن ءاۋتيزمى بار جانە مۇمكىندىگى شەكتەۋلى بالالار بارادى. ءتىپتى كوزى ناشار كورەتىندەرگە تاكتيلدى تاقتالارعا دەيىن ورناتىلىپ, جاعداي جاسالعان. وسى كۇندە قالادا پاراليمپياداعا ويىنشىلار دايىندايتىن ءبىر ماماندى جۇمىسقا قابىلداپ ۇلگەرىپتى. ودان بولەك عيماراتتىڭ ءبىرىنشى قاباتىندا ۆوكالدىق جانە ۇلت-اسپاپتار ستۋدياسى ورنالاسقان. كەلگەن وقۋشىلارعا سكريپكا, فورتەپيانو مەن گيتارادا ويناۋدى ۇيرەتەدى. دىبىس جازۋ ستۋدياسى قىزمەت كورسەتەدى. وندا جاس ونەرپازدار اندەرىن جازدىرا الادى. قىزدارعا ارنالعان ديزايندىق بولمەلەرى بولادى. ءتىپتى وندا قۇمىرا دا جاسايدى. ۇلداردى ەڭبەككە باۋلۋ كابينەتتەرى اشىلادى. ەر بالالار اعاشتان ويۋ ويىپ, تەمىر ۇستالىعىن مەڭگەرەدى. حورەوگرافيا كابينەتى بولادى. ونىڭ ءبىر ەرەكشەلىگى وندا بالەت ۇيىرمەسى جۇمىس ىستەيدى. بالەت ونەرىنىڭ مايتالماندارى وقۋشىلاردى بالەت ءبيىن ۇيرەتۋگە قازىردەن دايىن. بۇدان بولەك بالالار قالاۋىنا قاراي زاماناۋي جانە ۇلتتىق بي تۇرلەرىنە قاتىسا الادى.
وقۋشىلار سارايىنىڭ ەكىنشى قاباتىندا مەديا كابينەتى بار. بالالار جۋرناليستيكانىڭ قىر-سىرىن مەڭگەرىپ, ديكتور بولىپ ارنايى ستۋديادا جاتتىعادى. كىتاپحاناسى بار. بىراق كىتاپتىڭ ءبارى – ەلەكتروندىق نۇسقادا. 30 مىڭ كىتاپ قورى جيناقتالعان. كەلگەن وقۋشى وزىنە كەرەكتى كىتاپتى ەلەكتروندى نۇسقادا جۇكتەپ وقي بەرەدى. سونداي-اق تاعى ەكولوگيا, فوتو-بەينە مونتاجداۋعا ارنالعان كابينەتتەرى بار. بالالار دراما ۇيىرمەسىنە قاتىسسا بولادى. بۇل سوڭعى ۇلگىدەگى تەحنيكامەن جابدىقتالعان, ياعني Led ەكران, ۇلكەن ساحنا مەن كيىمدەر بولمەسى قاراستىرىلعان. ۇستەل تەننيسى, بوكس, كيكبوكس, كاراتە مەن تاەكۆوندوعا ارنالعان زالدارى بار. سونداي-اق ءۇشىنشى قاباتتا وقۋشىلار دەبات ۇيىرمەسىنە قاتىسسا بولادى. بۇل جاسىل ەكرانمەن جابدىقتالعان جانە الەۋمەتتىك جەلىگە قوسىلعان. بۇگىندە جاستاردىڭ كوپشىلىگى ءوز ويىن اشىق جەتكىزە المايدى. ويتكەنى ءتىل بايلىقتارى جەتپەيدى نەمەسە قازاقشاعا شورقاق. سوندىقتان ءتىل كۇرمەۋىن شەشۋ ءۇشىن شەشەندىك ونەر ۇيىرمەسى قىزمەت كورسەتەدى. جالپى, ءۇشىنشى قابات عىلىمي-تەحنولوگياعا ارنالعان. سونىڭ ىشىندە ءىت تەحنولوگيا, روبوتتەحنيكا, 3D مودەلدەۋ, حيميا, بيولوگيا, بيوتەحنولوگيا سياقتى كابينەتتەر بولادى. ءىت بولمەدە كومپيۋتەرلىك مودەلدەۋ ۇيرەتىلەدى. شىمكەنتتە بۇگىنگى تاڭدا كيبەرسپورتقا دايىندايتىن ۇيىرمە جوق. وقۋشىلار سارايى وسى ءىت كابينەتى ارقىلى بالالاردىڭ كيبەرسپورتقا دەگەن تالانتىن اشپاق. ءتىپتى وسى كيبەرسپورتتان بۇگىندە حالىقارالىق دارەجەدە جارىستار ءوتىپ جاتىر. ال وعان تىگىلەتىن جۇلدە قورى وتە قوماقتى. سوندىقتان وقۋشىلار سارايى ديرەكتورىنىڭ پىكىرىنشە, قازاقتىڭ بالالارى بۇل سپورت تۇرىنەن دە الدا ءجۇرۋ كەرەك. ويتكەنى ءىت بولمەسى كيبەرسپورتتى دامىتۋعا قاجەتتى سوڭعى ۇلگىدەگى تەحنولوگيامەن جابدىقتالعان. سپورت زالىندا بالالار ەركىن كۇرەس, گرەك-ريم, قازاقشا كۇرەس, دزيۋدومەن اينالىسادى. مما جەكپە-جەگى بويىنشا وقۋشىلار ەرەجەسىز كۇرەس تاسىلدەرىن مۋلياجداردا جاتتىعىپ ۇيرەنەدى. فيتنەس زالىندا اەروبيكامەن دەنەسىن شىنىقتىرادى. بۇعان قوسا ۆولەيبول الاڭى مەن ۆوركاۋت الاڭشاسىندا دوپ ويناپ, بەلتەمىردە جاتتىعۋعا مۇمكىندىك الادى.
«وقۋشىلار سارايىنىڭ تۋ سىرتىندا بوس جاتقان جەر بار. ونى بالالارعا اسكەري-پاتريوتتىق تاربيە بەرۋ ماقساتىندا پايدالانعىمىز كەلىپ وتىر. ونىڭ ۇستىنە بۇگىنگى جاعدايدا جاستاردى وتانسۇيگىشتىك رۋحتا تاربيەلەۋ ماسەلەسى وزەكتى بولىپ تۇر. سوندىقتان وسى الاڭدى سول ماقساتتا قولدانساق دەيمىز. ول ءۇشىن ارنايى مامانداردى شاقىرتىپ قويدىق. كەلەشەكتە رەسپۋبليكا كولەمىندە جاستار اراسىندا ءوتىپ جۇرگەن «ايبىن» اسكەري-پاتريوتتىق جارىسىنا وقۋشىلاردى وسى جەردەن دايىنداساق دەگەن ويىمىز بار. وقۋشىلار سارايىنىڭ ءار ۇيىرمەگە بولگەندە ءبىر ۋاقىتتا 500 بالانى قامتۋعا مۇمكىنشىلىگى جەتەدى. ۇيىرمەلەر ورتالىعى مەگاپوليستىڭ كەز كەلگەن ايماعىندا تۇراتىن بالالارعا ارنالعان. ياعني جاڭاتالاپ سەكىلدى شاھار ىرگەسىندەگى ەلدى مەكەننىڭ مەكتەپ وقۋشىسى وسى جەرگە كەلىپ ۇيىرمەگە قاتىسا الادى. بۇعان ەشقانداي شەكتەۋ جوق. سونىمەن بىرگە ۇيىرمەگە قاتىسۋ ءۇشىن اتا-انا وسىندا كەلىپ اۋرە بولىپ كەرەك ەمەس. ارنايى Mindal پلاتفورماسى ارقىلى ءوتىنىش قالدىرىپ, سوندا ۇيىرمە ءتۇرى مەن مۇعالىمىن تاڭداي الادى. پلاتفورماعا اتا-انا ءوزىنىڭ جەكە كۋالىگى مەن بالانىڭ تۋ تۋرالى كۋالىگىنىڭ مالىمەتتەرىن ەنگىزەدى. سوڭىندا ءوتىنىش ماقۇلدانار كەزدە ەكەۋىنىڭ ماعلۇماتتارى سالىستىرىلىپ, تەكسەرىلەدى. كەيىن ءبىز ءوزىمىزدىڭ تاراپىمىزدان ۋاقىتىن بەلگىلەپ, سەكتسيالارعا بولەمىز. بارلىق مالىمەت جەكە كابينەتكە كەلىپ تۇسەدى. وندا ماسەلەن, بالانىڭ قاي سەكتسياعا ساعات نەشەگە جازىلعانى حابارلانادى», دەدى وقۋشىلار سارايىنىڭ ديرەكتورى دانيار ەگىزباەۆ.
مەكەمە باسشىسىنىڭ ايتۋىنشا, وقۋشىلار سارايى قىزمەتىنىڭ باستى ماقساتى – بالالاردى ساباقتان تىس ۋاقىتتا ۇيىرمەلىك جۇمىستارمەن قامتاماسىز ەتۋمەن بىرگە وقۋشىلار اراسىندا جوعارى ينتەللەكتۋال مەن تاربيە قالىپتاستىرۋ.
بۇگىندە اتا-انالاردىڭ كوپشىلىگى جۇمىسباستى بولىپ كەتكەن. كەيدە بالالارعا قاراۋعا قولى تيمەي جاتادى. سونىڭ سالدارىنان ۇيدە تاربيە اقساپ, ول قوعامعا تەرىس اسەرىن تۋعىزادى. اسىرەسە بالالار اراسىندا الىمجەتتىك, جامان ادەتتەرگە ءۇيىر بولۋ سىندى بۇزىقشىلىق ارەكەتتەرگە اكەپ سوقتىرادى. ال وقۋشى ساباقتان تىس ۋاقىتتا ءبىر نارسەمەن اينالىسسا, باسقا جامان قىلىقتارعا ۋاقىتى قالماس ەدى. وسىلايشا, ول وقۋشىلار سارايىندا ءارى ەڭبەككە باۋلىنادى ءارى جاقسى ورتادا دۇرىس ءتالىم-تاربيە الىپ شىعادى. سوسىن سونى باسقا دوستارىنا, ارالاساتىن ورتاسىنا تاراتادى. ءسويتىپ جالپى وسكەلەڭ ۇرپاق تاربيەلەنەدى. ال قوعامدا جاس بۋىن تاربيەلى بولسا, كەلەشەكتە ونداي قوعام ناعىز ىزگىلىكتىڭ ورداسىنا اينالادى. سول سەبەپتى الداعى ۋاقىتتا وقۋشىلار سارايىندا بالالاردىڭ ءبىر-بىرىمەن قارىم-قاتىناسى تەك سىيلاستىق پەن باۋىرمالدىقتان قۇرالادى. ءتىپتى ۇستازدار مەن شاكىرتتەر ءبىر-بىرىمەن ۇلكەن, كىشى تارتىپتە ەمەس, تەڭدەي ارىپتەس, سىر ۇعىسار جاقىن سەرىكتەي اڭگىمەلەسەدى. وسىلايشا, وقۋشىلار سارايى ەڭبەككە باۋليتىن ورتا عانا ەمەس, مادەنيەت قالىپتاستىراتىن وردا بولادى. مەكەمە باسشىسى سۇحبات بارىسىندا وسىنداي وي ايتتى.
بۇل – شىمقالادا بوي كوتەرگەن وسىمەن ەكىنشى وقۋشىلار سارايى. الدىڭعىسى وسىدان 40 جىل بۇرىن سالىنىپتى. وسى رەتتە جاڭا ۇجىم باسشىسى بالالاردىڭ بوس كەزدە ۋاقىتىن ءتيىمدى پايدالانۋعا مۇمكىندىك تۋعىزعانى ءۇشىن مەملەكەتكە جانە پرەزيدەنت تاپسىرماسىن تياناقتى ورىنداپ وتىرعان جەرگىلىكتى اكىمدىككە العىسىن ءبىلدىردى.
«بۇگىنگى زاماننىڭ وقۋشىلارىندا ارمان جوق. مۇنداي وزىق تەحنولوگيامەن جابدىقتالعان وقۋشىلار سارايىندا قوسىمشا ءبىلىم الۋ, كاسىبي ءبىر شەبەرلىككە ۇيرەنۋ ءبىزدىڭ كەزىمىزدەگى ناعىز اڭساعان ارمانىمىز بولاتىن. الەمنىڭ دامىعان ەلدەرىندە بالالار نەمەن ءبىلىمىن كەڭەيتىپ جاتىر, سونىڭ بارلىعى وسىندا بار دەسەم, قاتەلەسپەيمىن. ويتكەنى ءاربىر عىلىمي باعىتتاعى بولمەلەر نانوتەحنولوگيالارمەن جاراقتاندىرىلعان. ماسەلەن, حيميا كابينەتىندە وقۋشىلار ارنايى كوزىلدىرىك كيىپ جۇمىس ىستەيدى. سەنسورلىق ەكراندا قانداي زەرتحانالىق جۇمىستارمەن اينالىسىپ جاتقانى كورىنىپ تۇرادى. ەگەر وقۋشى ابايسىزدا قاتە جىبەرسە, ول ونىڭ ومىرىنە ەشقانداي قاۋىپ تۋدىرمايدى. ويتكەنى ول ۆيرتۋالدى رەجىمدە زەرتتەۋلەر جۇرگىزىپ جاتىر. ءتىپتى ەگەر بالا سىناما جۇمىستارىن دۇرىس اتقارماسا, ۆيبراتسيا ارقىلى وعان ارنايى بەلگى بەرىلەدى. ءوز كەزەگىندە وقۋشىلار سارايىنا جۇمىسقا ەڭ تاڭداۋلى, ناعىز ءوز ءىسىنىڭ شەبەرلەرىن قابىلداپ جاتىرمىز. ماسەلەن, سپورت سەكتسيالارىنا قىزمەتكە الىنعانداردىڭ كوپشىلىگى – سپورت شەبەرى دەگەن اتاعى بار ماماندار. قالا اكىمىنىڭ تاپسىرماسىنا سايكەس وقۋشىلار مۇندا بارلىق ۇيىرمەگە تەگىن قاتىسادى, ەشقانداي دا اقى تولەمەيدى. ءبىر ايتا كەتەرلىگى بۇل وقۋشىلار سارايى بولعاندىقتان, ونداعى بارلىق يگىلىكتى تەك سولار عانا پايدالانادى. سوندىقتان مەكتەپتە وقىمايتىن ادامدارعا بۇل جەردىڭ ەسىگى جابىق», دەدى د.ەگىزباەۆ.
جالپى, قالا اكىمدىگىنىڭ جوسپارى بويىنشا كەلەشەكتە شاھاردا التى وسىنداي زاماناۋي ۇلگىدەگى وقۋشىلار سارايى بوي كوتەرمەك. سوندا ءار اۋدان اكىمشىلىگىنەن سالىنار بولسا, بوس ۋاقىتىندا ۇيىرمەگە باراتىن, ءار ساعاتىن ءتيىمدى پايدالاناتىن وقۋشىلار كوبەيىپ, ءتىپتى قالاداعى مەكتەپتە وقيتىن بالالار ۇيىرمەلەرمەن تولىق قامتىلار ەدى. قالا اكىمدىگىنىڭ كوزدەگەن نەگىزگى ماقساتى دا – وسى.
ءسوزىمىزدىڭ دالەلى رەتىندە ايتساق, وسى كۇندە تۇران شاعىن اۋدانىندا ءۇشىنشى وقۋشىلار سارايىنىڭ قۇرىلىسى ءجۇرىپ جاتىر. جۋىردا قالا اكىمى مۇرات ايتەنوۆ قۇرىلىس باسىندا بولىپ, اتقارىلىپ جاتقان جۇمىستاردىڭ ساپاسىن تەكسەرىپ قايتتى. قالا اكىمدىگىنىڭ ءباسپاسوز قىزمەتى تاراتقان مالىمەتكە سايكەس, زاماناۋي تالاپقا ساي بوي كوتەرەتىن عيماراتتا وقۋشىلاردىڭ ساباقتان تىس ۋاقىتتا ءارتۇرلى ۇيىرمەلەردە شىعارماشىلىق, سپورتتىق, عىلىمي, مادەني باعىتتا دامۋىنا بارلىق جاعداي جاسالادى. 3 بلوكتان تۇراتىن 3 قاباتتى عيماراتتىڭ جالپى سىيىمدىلىعى 500 ورىنعا شاقتالعان. جوبادا 35 ورىنعا ارنالعان اسحانا, 80 كولىك سياتىن اۆتوتۇراق قاراستىرىلعان. قۇرىلىسى مامىر ايىندا باستالعان عيمارات جوسپارعا ساي كەلەسى جىلى قولدانىسقا بەرىلەدى. قۇرىلىس جۇمىستارىنا ازىرگە 50 ادام 4 تەحنيكا جۇمىلدىرىلىپ وتىر. وسىعان دەيىن مۇندا جەر قازىلىپ, ىرگەتاسىنىڭ جارتىسىنان استامى قۇيىلعان. قازىر قابىرعالار تۇرعىزىلىپ, باعانالار ورناتىلا باستادى. شاھار باسشىسى جاۋاپتىلارعا قۇرىلىستىڭ وندىرىستىك كەستەگە ساي جۇرگىزىلۋىن باقىلاۋعا الىپ, ساپاسىزدىققا جول بەرمەس ءۇشىن جۇمىس بارىسىندا ءتيىستى تالاپتاردى نازارعا الۋ قاجەتتىگىن ەسكەرتتى. ايتا كەتەيىك, قالادا 2025 جىلعا دەيىن تاعى 3 وقۋشىلار سارايى مەن 8 ونەر مەكتەبى سالىنادى. بۇل ورتالىقتاردىڭ وقۋشىلار مەن جاستاردىڭ بوس ۋاقىتىن ءتيىمدى ۇيىمداستىرۋىنا قابىلەتىن اشىپ, جان-جاقتى دامۋىنا ىقپالى زور بولارى ءسوزسىز.
قالالىق قۇرىلىس باسقارماسىنىڭ مالىمەتىنشە, 2023 جىلى بيۋدجەت ەسەبىنەن جالپى 160 نىساننىڭ قۇرىلىسى جوسپارلانسا, بيىل سونىڭ 95-ءى پايدالانۋعا بەرىلۋگە ءتيىس. ونىڭ ىشىندە جوعارىدا اتالعان وقۋشىلار سارايىنان بولەك №45, 8, 65 مەكتەپتەر مەن №10 كوللەدج جانە ونەر مەكتەبى بار. ال تۇران شاعىن اۋدانىنداعى ءۇشىنشى وقۋشىلار سارايىنىڭ قۇرىلىسى – كەلەسى جىلعا وتپەلى نىسان ساناتىندا. سونداي-اق بيىل مەگاپوليستىڭ شىمكەنتسيتي اۋماعىندا كونگرەسس حولل, تۇركىستان كوشەسىندەگى, اكىمشىلىك ىسكەرلىك ورتالىعىنداعى اۆتوكولىككە ارنالعان دەپولار, مەتاللۋرگ ستاديونى, بوزارىق شاعىن اۋدانىنداعى اۋىر اتلەتيكا سپورت مەكتەبى, №12 سپورت مەكتەبىنە قوسىمشا عيمارات جانە №22 كوللەدج سپورت مەكتەبى تاپسىرىلادى. سونىمەن بىرگە جۇمىسشى جاستارعا 900 پاتەر, حالىقتىڭ الەۋمەتتىك وسال توپتارىنا 505 پاتەر بەرىلەدى. شىمكەنتسيتي اۋماعىنان كەلەسى 3 ساياباق اشىلماق. جانە دە 150 ورىندىق مۇگەدەكتەردى وڭالتۋ ورتالىعى سالىنىپ جاتىر. كەلەسى جىلى اقتاس شاعىن اۋدانىندا قاڭعىباس يتتەر مەن مىسىقتاردى ۋاقىتشا ۇستاۋعا ارنالعان باسپانا مەن ءبىر قارۋلى كۇشتەر عيماراتى, 3 مەملەكەتتىك ورگان مەكەمەسى, سونداي-اق «جايلى مەكتەپ» باعدارلاماسى بويىنشا 18 ورتا ءبىلىم بەرۋ وشاعى ەل يگىلىگىنە پايدالانۋعا بەرىلەدى.
بيىل قۇرىلىس باسقارماسى تاراپىنان تۇجىرىمداما اياسىندا مەملەكەتتىك بيۋدجەت ەسەبىنەن 312,4 مىڭ شارشى مەتردى قۇرايتىن 4 090 پاتەرلى 98 كوپقاباتتى تۇرعىن ءۇيدىڭ قۇرىلىسى جۇرگىزىلەدى. ونىڭ ىشىندە 6 ءۇي – ارەندالىق, 92 ءۇي – نەسيەلىك. جىل سوڭىنا دەيىن 3 040 پاتەرلى 67 تۇرعىن ءۇيدى (نەسيەلىك – 61, ارەندالىق – 6) پايدالانۋعا بەرۋ كوزدەلىپ وتىر.
قۇرىلىس جۇمىستارىنىڭ كولەمىنە كەلسەك, جىلدىق جوسپارعا ساي 231,9 ملرد تەڭگەنىڭ قۇرىلىسى اتقارىلۋعا ءتيىس. ناقتى كولەم يندەكسى 106 پايىزعا تەڭ. قاڭتار-مامىر ايىندا 37,1 ملرد تەڭگەگە قۇرىلىس نىساندارى سالىنىپتى, بىلتىردىڭ ءتيىستى كەزەڭىمەن سالىستىرعاندا ناقتى كولەم يندەكسى 119,5 پايىزعا جەتكەن.
كەيىنگى جىلدار ىشىندە شىمكەنتتە كادىمگىدەي قۇرىلىس جۇمىستارى قارقىن الدى. ءتىپتى رەسپۋبليكانىڭ ءۇشىنشى قالاسىن ۇلكەن قۇرىلىس اۋماعىنا اينالعان شاھار دەرسىڭ. جالپى, قۇرىلىس سالاسى – ەكونوميكالىق ءوسىمنىڭ ءبىر كورسەتكىشى. قاي ەلدە قۇرىلىس قىز-قىز قايناپ جاتسا, دەمەك سول ەلدە ەكونوميكالىق ءوسىم بار دەگەن ءسوز. ەسكە تۇسىرەيىكشى, وتكەن عاسىردىڭ توقسانىنشى جىلدارى ەلدە, ونىڭ ىشىندە شىمكەنتتە ماردىمدى قۇرىلىس جۇرگىزىلمەدى. ويتكەنى ونى ەكونوميكامىز كوتەرمەدى. تەك مەملەكەت قازىناسىنىڭ ءبۇيىرى قامپايعان كەزەڭنەن باستاپ قۇرىلىسقا, اسىرەسە تۇرعىن ءۇي قۇرىلىسىنا كوڭىل بولىنە باستادى. شىمكەنتتە دە ءدال سول ۋاقىتتان باستاپ كوپقاباتتى جاڭا شاعىن اۋداندار بوي كوتەردى. وسىلايشا, ەكونوميكالىق ءوسىمنىڭ ناتيجەسىندە قۇرىلىس سالاسىنا جان ءبىتىپ, ول كەزەگىندە باسقا سالالاردىڭ وركەن جايۋىنا جول اشتى. سونىڭ ءبىرى – قۇرىلىس يندۋسترياسى. وعان ەلىمىزدە سالىنىپ جاتقان تۇرعىن ءۇي قۇرىلىسىنا جۇمسالاتىن ماتەريالداردىڭ نەگىزگى دەنىن وتاندىق ءونىم قۇراۋعا ءتيىس دەگەن باعدارلاما دا ۇلكەن سەپتىگىن تيگىزدى. سول ارقىلى قۇرىلىس نىساندارىنىڭ سالىنۋىمەن بىرگە قاجەتتى ماتەريالداردى وندىرەتىن زاۋىتتاردىڭ قاتارى ارتتى. ونداي كاسىپورىندار رەسپۋبليكانىڭ ءۇشىنشى مەگاپوليسىندە كوپ-اق. ولار قالادا شاعىن جانە ورتا بيزنەستىڭ دامۋىنا جول اشسا, ەكىنشىدەن, قانشاما ادام بۇگىندە قۇرىلىس الاڭدارىندا نەمەسە قۇرىلىس ماتەريالدارىن وندىرەتىن كاسىپورىندا ەڭبەك ەتىپ ءجۇر. سوندىقتان جالپى بۇل سالانىڭ دامۋىنىڭ الەۋمەتتىك ماڭىزى ەل ءۇشىن وتە زور. ءتىپتى وسىدان ون شاقتى جىل بۇرىن بۇكىل دۇنيە ءجۇزىن جايلاعان قارجىلىق-ەكونوميكالىق داعدارىستىڭ كەزىندە ەلىمىز الەۋمەتتىك نىسانداردى جوندەۋ ارقىلى حالىقتى جۇمىسپەن قامتىپ, بۇل داعدارىستان امان-ەسەن وتكەن جوق پا ەدى؟! ەندەشە, قۇرىلىس سالاسى – ەل ەكونوميكاسىنىڭ ناعىز بارومەترى ەكەنى ءسوزسىز.
