ايبەك سمادياروۆ اتالعان شارتقا 2022 جىلعى 22 جەلتوقساندا تاشكەنت قالاسىندا ەكى مەملەكەت باسشىلارى قول قويعانىن ەسكە سالدى. 2023 جىلعى 4 شىلدەدە قازاقستان رەسپۋبليكاسى مەن وزبەكستان رەسپۋبليكاسى اراسىنداعى قازاقستان-وزبەكستان مەملەكەتتىك شەكاراسىن شەگەندەۋ تۋرالى شارت كۇشىنە ەندى.
«وسى شارتتىڭ كۇشىنە ەنۋى قازاقستان مەن وزبەكستان اراسىنداعى مەملەكەتتىك شەكارانى حالىقارالىق-قۇقىقتىق شەگەندەۋدىڭ 19 جىلدىق پروتسەسىنىڭ تولىق اياقتالۋىن بىلدىرەدى», دەدى ايبەك سمادياروۆ.
بۇل وقيعانىڭ الدىندا بىرلەسكەن قازاقستان-وزبەكستان شەگەندەۋ كوميسسياسى شەڭبەرىندە وتكەن كەلىسسوزدەردىڭ 100 راۋندى بولدى. ۇزىندىعى 2357 كم شەكارا سىزىعى 1301 شەكارالىق بەلگىمەن بەلگىلەنىپ, كولەمى 8000 پاراقتان استام شەگەندەۋ قۇجاتتاردا كورسەتىلگەن.
«وسى وقيعا مەملەكەتتىك شەكارا اۋدانىندا قاۋىپسىزدىك پەن تۇراقتىلىقتى نىعايتۋعا, ەكىجاقتى, وڭىرارالىق جانە شەكارا ماڭىنداعى ءوزارا ءىس-قيمىلدى تەرەڭدەتۋگە ىقپال ەتەدى, سونداي-اق قازاقستان رەسپۋبليكاسىنىڭ مەملەكەتتىك شەكاراسىن زاڭدى رەسىمدەۋ پروتسەسىنىڭ وڭتۇستىك باعىتتا اياقتالۋىن بىلدىرەدى", دەپ تۇيىندەدى ءسىم وكىلى.
