باس كونسۋلدىق جۇمىسى قازاقستان رەسپۋبليكاسىنىڭ وڭىرلەرى مەن كاسىپورىندارىنىڭ رەسەي فەدەراتسياسى وڭىرلەرىمەن ساۋدا-ەكونوميكالىق جانە مادەني-گۋمانيتارلىق ىنتىماقتاستىعىن كەڭەيتۋگە, سونداي-اق ءتيىستى كونسۋلدىق قىزمەتتەردىڭ قولجەتىمدىلىگىن ارتتىرۋعا باعىتتالعان.
جاڭا ديپلوماتيالىق نىساننىڭ جۇمىسى ورال فەدەرالدى وكرۋگىنىڭ بۇكىل اۋماعىن, اتاپ ايتقاندا سۆەردلوۆ, چەليابى, قورعان, تۇمەن وبلىستارىن, سونىمەن قاتار پەرم ولكەسىن قامتيدى. جالپى وسى كونسۋلدىق وكرۋگتىڭ اۋماعىندا 90 مىڭنان استام قازاق, ونىڭ ىشىندە قازاقستاننان كەلگەن 7 مىڭنان استام ستۋدەنت بار.
اكىمشىلىك ورتالىعى جانە ەڭ ۇلكەن قالاسى ەكاتەرينبۋرگ بولىپ تابىلاتىن ورال فەدەرالدى وكرۋگى – رەسەي فەدەراتسياسىنىڭ قارقىندى دامىپ كەلە جاتقان ونەركاسىپ, عىلىم-ءبىلىم, كولىك-لوگيستيكالىق جانە قارجى ورتالىقتارىنىڭ ءبىرى. مۇندا ءىرى عىلىمي جانە وندىرىستىك بىرلەستىكتەر ورنالاسقان. ونەركاسىپتىك وندىرىستەگى ەكونوميكالىق قىزمەتتىڭ نەگىزگى تۇرلەرى جوعارى عىلىمي-تەحنيكالىق الەۋەتى بار ماشينا جاساۋ جانە مەتالل وڭدەۋ ونەركاسىبى بولىپ وتىر.
سالتاناتتى ءراسىم كەزىندە ۇكىمەت باسشىسى ءاليحان سمايىلوۆ پەن سۆەردلوۆ وبلىسىنىڭ گۋبەرناتورى ەۆگەني كۋيۆاشەۆ قىزىل لەنتانى قيىپ, ارتىنشا باس كونسۋلدىقتىڭ عيماراتىن ارالادى.
پرەمەر-ءمينيستردىڭ ايتۋىنشا, ورالدىڭ قاق ورتالىعىندا باس كونسۋلدىقتىڭ اشىلۋى ءبىزدىڭ دوستىق قارىم-قاتىناستارىمىزدىڭ دامۋىنا ەلەۋلى سەرپىن بەرەدى.
سونىمەن قاتار ۇكىمەت باسشىسى 10 جىل بۇرىن ەكاتەرينبۋرگتە ەكى ەل پرەزيدەنتتەرى قول قويعان ءححى عاسىردا تاتۋ كورشىلىك پەن وداقتاستىق تۋرالى شارت اياسىندا ستراتەگيالىق ارىپتەستىكتى ودان ءارى نىعايتۋ شارالارى بەلسەندى جالعاسىپ كەلە جاتقانىن اتاپ ءوتتى.
«بۇگىندە قازاقستاننىڭ وبلىستارى مەن قالالارىنىڭ رەسەي سۋبەكتىلەرىنىڭ كوپشىلىگىمەن تۇراقتى ديالوگى ورناتىلعان. بۇل تۇرعىدا ورال ايماعى گەوگرافيالىق جاقىندىعى جاعىنان دا, ونەركاسىبى دامىعان سۆەردلوۆ, قورعان, تۇمەن, چەليابى وبلىستارىمەن جانە پەرم ولكەسىمەن قالىپتاسقان ساۋدا-ەكونوميكالىق بايلانىستار جاعىنان دا وتە ماڭىزدى», دەدى ءاليحان سمايىلوۆ.
ءسوز سوڭىندا پرەمەر-مينيستر قر باس كونسۋلدىعى مەملەكەتارالىق ىنتىماقتاستىقتى دامىتۋ ءۇشىن جاڭا مۇمكىندىكتەر اشاتىنىنا سەنىم ءبىلدىرىپ, ونىڭ قىزمەتكەرلەرىنىڭ جۇمىسىنا تابىس تىلەدى.
