«قازمۇنايگاز» ۇك» اق باسقارما توراعاسى ماعزۇم مىرزاعاليەۆ جۇمىس ساپارىمەن پاۆلودار مۇناي-حيميا زاۋىتىنا بارىپ, جۇرگىزىلىپ جاتقان جوندەۋ جۇمىستارىنىڭ بارىسىمەن تانىستى. سونداي-اق زاۋىتتىڭ وندىرىستىك مىندەتتەرىن ورىنداۋى بويىنشا كەڭەس وتكىزىپ, الداعى ۋاقىتتا قولعا الىناتىن جاڭا جوبالار جايىن پىسىقتادى. كاسىپورىننىڭ كەيبىر تەحنولوگيالىق ۇدەرىستەرى مەن جابدىقتارىن جاڭالاۋ ءىس-شارالارى 19 شىلدەدە تولىق اياقتالىپ, مۇناي وڭدەۋدى قايتا جالعاستىرادى. كومپانيا باسشىسى ءوندىرىس ورنى توقتاپ تۇرۋىنا قاراماستان, كولىك وتىنى نارىعىنداعى قازىرگى جاعداي تۇراقتى ەكەنىن, الەۋمەتتىك ماڭىزعا يە مۇناي ونىمدەرى بويىنشا تاپشىلىق جوقتىعىن اتاپ ءوتتى. قمگ زاۋىتتاعى وندىرىستىك تسيكلدى ۋاقتىلى ىسكە قوسۋ ءۇشىن بارلىق جوسپارلانعان جۇمىستىڭ قاۋىپسىز ءارى ساپالى تۇردە ىسكە اسۋىنا ايرىقشا كوڭىل ءبولىپ وتىر. ءارى زاۋىت باسشىلىعىنا جوندەۋدى مەرزىمىنەن بۇرىن اياقتاۋ مۇمكىندىگىن قاراستىرۋ تاپسىرىلدى.
– قازىرگى ۋاقىتتا قوردا 525 مىڭ توننا ديزەل وتىنى, 300 مىڭ توننادان استام بەنزين جانە 100 مىڭ تونناداي اۆيا كەروسين بار. تراكتور وتىنىنىڭ قورى – 35 تاۋلىككە, بەنزين 23 تاۋلىككە جەتەدى. ياعني نارىقتى جانار-جاعارمايمەن قامتاماسىز ەتۋدە ەشبىر قيىندىق بايقالمايدى. پمحز-دا كەشەندى جاڭارتۋ ءىس-شارالارى بىرتىندەپ قولعا الىنىپ جاتىر. جوسپارلانعان ءىس-شارالار تولىق اتقارىلسا, 2027 جىلعا قاراي ءۇش جىلدا ءبىر رەت قانا جوندەۋگە توقتايدى. وڭدەۋگە تۇسەتىن مۇنايدىڭ ساپاسى, ءونىم ساپاسىنا قويىلاتىن تالاپتاردىڭ ارتۋى جانە قىسقى ديزەل وتىنىن ءوندىرۋ پەرسپەكتيۆاسى – پمحز ءۇشىن باسىم باعىتتىڭ ءبىرى. بۇل رەتتە جاقىندا مەملەكەت باسشىسىنا تانىستىرىلعان ديزەل وتىنىن گيدروتازارتۋ قوندىرعىسىن رەكونسترۋكتسيالاۋ جانە سۋتەگىن ءوندىرۋ قوندىرعىسىن سالۋ جوبالارى قمگ-ءنىڭ «جاسىل» ەنەرگەتيكانى دامىتۋ باعىتىنداعى باستامالارى قاتارىندا ەرەكشە ماڭىزعا يە. بۇيىرسا, جاقىن جىلدارى پاۆلودارلىق زاۋىتتا اركتيكالىق ديزەل وتىنى دا وندىرىلە باستايدى. ول ءۇشىن اۋەلى جاڭادان سۋتەگى قوندىرعىسىن تۇرعىزامىز. قۇنى 80 ملن ەۋرو بولاتىن جوبامەن فرانتسيالىق تانىمال كومپانيا اينالىسادى. ونىمەن ءبىر مەزگىلدە وتىندى گيدروتازارتۋ قوندىرعىسى دا بوي كوتەرەدى. بۇل ەكى جوبا بولاشاقتا جىلىنا 160 مىڭ توننا اركتيكالىق ديزەل وتىنىن شىعارۋعا مۇمكىندىك بەرەدى, – دەدى ماعزۇم مىرزاعاليەۆ.
بۇعان قوسا, زاۋىت اۋماعىندا الداعى جىلدارى بيتۋم ساقتاۋعا ارنالعان جىلىتىلاتىن رەزەرۆۋارلار سالۋ ويدا بار ەكەن. ارقايسىسى 5 مىڭ توننالىق 6 رەزەرۆۋار بوي كوتەرەدى دەپ جوبالانعان. بۇل – وڭىردەگى بيتۋم تاپشىلىعىن جويۋعا باعىتتالعان ماڭىزدى قادام. بيتۋم ارنايى قويمادا ۇزاقمەرزىمگە ساقتالىپ, قاجەت كەزدە نارىققا بوساتىلادى.
مۇناي-حيميا زاۋىتىندا ارالىق ۇيىمداردىڭ كەسىرىنەن ىشكى قىزمەت كورسەتۋ قۇنى شەكتەن تىس ءوسىپ, كەيبىر نىسانداردىڭ زاڭسىز تۇردە وزگە فيرمالارعا بەرىلگەنى تۋرالى بۇعان دەيىن بىرنەشە مارتە ماسەلە قوزعاعان ەدىك. ماعزۇم مارات ۇلىنىڭ ايتۋىنشا, مەملەكەت باسشىسىنىڭ تاپسىرماسىنا سايكەس, ۇكىمەت بۇعان باسا ءمان بەرىپ وتىر. قازىرگى كۇنى كاسىپورىنداعى اۋتسورسينگ كومپانيالاردى زاۋىتقا قايتادان كوشىرۋ ۇدەرىسى باستالىپ كەتكەن. ونىڭ ناقتى ناتيجەلەرىن الداعى قازان ايىندا كورۋىمىز مۇمكىن.
كومپانيا باسشىسى بيىل ديزەل وتىنى مەن بەنزين باعاسىنىڭ قىمباتتاۋىنا وراي نارىقتا جاعىمدى اسەرلەر پايدا بولعانىن دا اتاپ ءوتتى. مىسالى, وڭتۇستىك وڭىرلەردە ديزەلدى تۇتىنۋ بىردەن 47 پايىزعا قۇلدىراسا, ەل بويىنشا ول ورتا ەسەپپەن 20 پايىزعا كەمىپتى. بۇل جاعداي وسىعان دەيىن وتاندىق مۇناي ونىمدەرىنىڭ كونتراباندالىق جولمەن كورشى مەملەكەتتەرگە تاسىلىپ كەلگەنىن ايعاقتاسا كەرەك, دەيدى م.مىرزاعاليەۆ. تاعى ءبىر مىسال, بىلتىر وسى ۋاقىتتا تاپشىلىق پايدا بولعاندا تراكتور وتىنىنىڭ قورى 250 مىڭ تونناعا دەيىن ازايعان.
تولىقتىرا كەتەيىك, پمحز بيىلعى جىلدىڭ العاشقى جارتىسىندا شامامەن 2 ملن 772 مىڭ توننا شيكىزاتتى وڭدەپ, 790 مىڭ توننادان استام بەنزين, 947 مىڭ توننادان استام ديزەل شىعارعان. ىشكى نارىققا 128 306 توننا بيتۋم, 287 592 توننا مازۋت, 157 765 توننا سۇيىتىلعان گاز, 97 827 توننا اۆيا وتىن بوساتقان. وبلىس ورتالىعىنىڭ ەكونوميكاسى ءۇشىن زاۋىت اسا ماڭىزدى. سەبەبى قالا قازىناسىنىڭ تەڭ جارتىسى كاسىپورىن تولەيتىن سالىقتان قۇرالادى.
پاۆلودار وبلىسى
