قازىر ورتالىق 14 پەن 35 جاس ارالىعىنداعى ازاماتتاردى جۇمىسقا تارتىپ, ەرىكتىلەر قوزعالىسىن جەتىلدىرۋدە, اۋلا كلۋبتارىن دامىتىپ, ولاردىڭ جاڭا باستامالارىن قولداۋدا, قۇقىقتىق كومەك كورسەتۋدە بەلسەندى.
– استانا قالاسىندا جاستار ساياساتىن دامىتۋ شەڭبەرىندە جۇمىستىڭ باسىم باعىتى – جاستاردى جۇمىسقا ورنالاستىرۋ جانە تۇراقتى جۇمىسپەن قامتاماسىز ەتۋ, سونداي-اق ەش جەردە وقىمايتىن, ەش جەردە جۇمىس ىستەمەيتىن جانە كاسىپتىك وقىتۋ كۋرستارىنا قاتىسپاعان NEET ساناتىنداعى جاستار سانىن قىسقارتۋ كۇن تارتىبىندە. وسى باعىتتا جاستاردىڭ ەڭبەك نارىعىنا ءوتۋى ءۇشىن «استانا جاستارى» جرو جاستاردى جۇمىسقا ورنالاستىرۋ, الەۋمەتتەندىرۋ جانە جان-جاقتى قولداۋ نەگىزىندە جوبالاردى ىسكە اسىرادى. ماسەلەن, 2022 جىلى وسى باعىتتا جالپى 24 560 ادامدى قامتي وتىرىپ, 5 جوبا شەڭبەرىندە 80-گە جۋىق ءىس-شارا ۇيىمداستىرىلدى. ولاردىڭ ىشىندە بىلتىرعى 1 جەلتوقسانداعى جاعداي بويىنشا جاستار اراسىنان 10 مىڭعا جۋىق ادام كەڭەس الدى. وتىنىشتەردىڭ 80-90%-ى كاسىپتىك باعدار بەرۋ جانە جۇمىسقا ورنالاستىرۋ, سونداي-اق تۇرعىن ءۇي ماسەلەلەرىنە قاتىستى بولدى. «Time to change» جوباسى نەگىزىندە «جاستاردىڭ كاسىبي جانە جەكە داعدىلارىن دامىتۋ مەكتەبى» ونلاين جانە وفلاين ترەنينگتەر وتكىزەدى. 2022 جىلدىڭ باسىنان جالپى سانى مىڭ ادامدى قامتيتىن 33 ترەنينگ ۇيىمداستىرىلدى. 4 بوس ورىندار جارمەڭكەسى ءساتتى ءوتتى. وعان ەلوردادان 146-دان استام جۇمىس بەرۋشى: «Bilim Way», قازاقتەلەكوم, نۇرسۇلتان نازارباەۆ حالىقارالىق اۋەجايى, «Integra Construction KZ», «Binom Education», «Forte Bank», «دوم ۋيۋت» ارحيتەكتۋرالىق جوبالاۋ بيۋروسى سەكىلدى ۇيىمدار قاتىستى. وسىلايشا, 1 800-دەن استام بوس جۇمىس ورىندارى ۇسىنىلدى. ناتيجەسىندە, جارمەڭكە بارىسىندا ەكى قولعا ءبىر كۇرەك تاپپاي سەندەلگەن 200-گە جۋىق ازامات جۇمىسقا ورنالاستىرىلدى. ال بيىل ءدال وسىنداي ءىس-شارالار توقسان سايىن ۇيىمداستىرىلادى. وعان 3 مىڭعا جۋىق ازاماتتى تارتۋ ارقىلى ەڭبەككە باۋلۋ كوزدەلگەن, – دەدى استانا قالاسى اكىمدىگىنىڭ «استانا جاستارى» جرو» كمم باسشىسى شىڭعىس تىلەۋلين.
سونداي-اق «استانا جاستارى» جرو بازاسىندا ۆولونتەرلەر جىلى اياسىندا جانە 2021-2023 جىلدارى ۆولونتەرلىكتى دامىتۋدىڭ «جول كارتاسىن» ورىنداۋ شەڭبەرىندە قالالىق ۆولونتەرلەر شتابى جۇمىس ىستەيدى. تۇراقتى تۇردە 30 ۆولونتەرلىك ۇيىممەن جانە 20 باستاماشىل توپپەن, 4 ۇەۇ-مەن بىرلەسە قىزمەت اتقارۋدا. شتابتا 5 مىڭنان اسا بەلسەندى ۆولونتەر بار.
– ۆولونتەرلەرمەن بىرگە 600-دەن اسا ءىس-شارا وتكىزىلدى. ايتا كەتۋ كەرەك, ەلوردالىق ۆولونتەرلەر دزيۋدودان ازيا چەمپيوناتى, «Kazakhstan Security System» فورۋمى, «Eurasian Book Fair», ناۋرىز «ەكسپو», «يلليۋزيا وبمانا» سياقتى حالىقارالىق اۋقىمداعى ءىس-شارالارعا ۇنەمى قاتىسادى. سونداي-اق پوليتسيا دەپارتامەنتى, تجد مەن بىرلەسىپ گازداندىرۋ تۋرالى حالىقتى اقپاراتتاندىرۋ, جىلىتۋ ماۋسىمى مەن كوكتەمگى سۋ تاسقىنى كەزىندەگى قاۋىپسىزدىك شارالارى, شومىلۋ ماۋسىمىنداعى مىنەز-ق ۇلىق ەرەجەلەرى, حالىق ساناعى ماسەلەسى, قالانىڭ قوعامدىق ورىندارىندا كوروناۆيرۋس ينفەكتسياسى كەزەڭىندە قورعاۋ شارالارى بويىنشا حالىققا اقپاراتتىق-ءتۇسىندىرۋ جۇمىستارىن تۇراقتى نەگىزدە جۇرگىزەدى جانە ەسىرتكى ساتۋ تۋرالى مالىمەتتەرى بار قابىرعالاردى بوياۋعا, ءىز-ءتۇزسىز جوعالعان ادامداردى ىزدەۋگە كومەكتەسەدى. ماسەلەن, «ادرەسا زابوتى» جوباسى اياسىندا «استانا جاستارى» ۆولونتەرلەرى جالعىزباستى 40 زەينەتكەردىڭ جەكە اۋلاسىن تازالاۋعا قولۇشىن سوزدى. كاسىپورىندار مەن ۆولونتەرلىك ۇيىمدار قار تازالاۋ بويىنشا 20 اكتسيا ۇيىمداستىردى. وعان 2 مىڭنان اسا ۆولونتەر مەن كاسىپورىن قىزمەتكەرى جۇمىلدىرىلدى. بۇگىندە ۆولونتەرلىك ۇيىمدارمەن بىرلەسىپ «BizBirgemiz», «قاۋىپسىز قالا», «قامقورلىق مەكەن-جايلارى», «ارداگەرلەردى ارداقتايىق», «Taza Alem» سەكىلدى مىڭعا جۋىق اكتسيا وتكىزىلدى. مۇقتاج جاندارعا ازىق-تۇلىك سەبەتتەرىن تاراتۋ, كيىم-كەشەك جانە جيھازبەن قامتاماسىز ەتۋ, وقىتۋ جانە تاعى باسقا دا كومەك تۇرلەرى كورسەتىلدى, – دەدى شىڭعىس تىلەۋلين.
استانالىق ەرىكتىلەر قالالىق جانە رەسپۋبليكالىق دەڭگەيدە عانا ەمەس, حالىقارالىق ءىس-شارالاردان دا قالىس قالمايدى. ماسەلەن, فورۋم, كونتسەرتتەردە اۋدارماشى, گيد, ۇيىمداستىرۋشى, تيمليدەر, توپ ءيميدجى, تاعى باسقا دا پوزيتسيالاردا ءجۇرىپ قولعابىس ەتەدى. ەل باسىنا كۇن تۋىپ, توتەنشە جاعداي بولا قالسا, ۇنەمى ءبىر جاعادان باس, ءبىر جەڭنەن قول شىعارىپ ءبىرىنشى بولىپ جاردەمدەسەدى. ءتىپتى تۇركيا مەن سيريا حالقىن توتەننەن تەنتىرەتكەن وقىس جاعدايدا دا قايىرىمدى جاندار ەلوردانىڭ 20 ۆولونتەرلىك ۇيىمىمەن بىرلەسىپ, 100 تونناعا جۋىق گۋمانيتارلىق كومەك جيناپ, جونەلتتى.
– ۆولونتەر بولۋ – يگى ءىس. مۇنداي ورتاعا جينالعاندار ءبىر-بىرىمەن تاجىريبە الماسادى, ەل كورەدى, جەر كورەدى. قازاقتا ء«ۇيىڭدى تاسپەن ەمەس, دوسپەن قورشا» دەگەن جاقسى ءسوز بار. ەرىكتى بولۋ – جاڭا دوس تاباتىن ۇلكەن مۇمكىندىك. سول ارقىلى ورتا قالىپتاسادى. ال اينالاداعى ادامداردان العىسىن العان كەزدە ەرەكشە سەزىمدە بولامىن. ونى سوزبەن ايتىپ جەتكىزۋ مۇمكىن ەمەس, – دەيدى ۆولونتەر مەرەي قالەل.
قازاقستاننىڭ تۇكپىر-تۇكپىرىنەن جۇرەگى مەيىرىمگە تولى جاندار ءۇن قوسقان «جۇرەك جىلۋى» قايىرىمدىلىق اكتسياسىنا ۇيىتقى بولعان دا وسى «استانا جاستارى» جرو-نىڭ ەرىكتىلەرى. مۇنى مەملەكەت باسشىسى قاسىم-جومارت توقاەۆتىڭ قولداعانى بەلگىلى. قازىرگى ۋاقىتتا 310-عا جۋىق حات قابىلدانعان. اكتسيا جىل سوڭىنا دەيىن جالعاسپاقشى. سونداي-اق پرەزيدەنت جول باستاعان «Taza Alem» ەكولوگيالىق جوباسى دا قارقىندى جۇزەگە اسىپ كەلەدى. بۇگىندە ۆولونتەرلەر 9 اكتسيا وتكىزىپ, وزەن جاعاسىن, اقبۇلاقتىڭ ساعالارىن تازارتتى.
– «استانا جاستارى» ۆولونتەرلىك قوزعالىسىنداعى ۆولونتەرلەردىڭ ورتاشا جاسى 15-16 جاستى قۇرايدى. بۇل – جاستار ۋاقىتتى پايدالى وتكىزۋگە, جاڭا دوس, تىڭ اسەر الۋعا جانە قورشاعان ورتاعا قولعابىس كورسەتۋگە تىرىساتىن كەزەڭ. ال قالالىق ۆولونتەرلەر شتابى جوباسىنداعى ۆولونتەرلەردىڭ ورتاشا جاسى 30-دان باستالادى. مۇنداعى ۆولونتەرلەر ساناتى قوعامعا كومەكتەسۋ, تابيعاتتى قورعاۋعا باسىمدىق بەرەدى. ولار ەشقاشان تولەم المايدى. بىراق ءبىز ولاردى كەيبىر قاجەتتى جابدىقتارمەن قامتۋعا, كونتسەرتتەرگە تەگىن بيلەتتەر بەرۋگە تىرىسامىز. ياعني ازىرگە ۆولونتەرلەردى ماراپاتتاپ قانا ىنتالاندىرىپ وتىرمىز. ۆولونتەرلىكتى ەڭبەك ءوتىلى رەتىندە ساناۋ ماسەلەسى ۇكىمەتتە بىرنەشە رەت كوتەرىلدى. بىراق ول ازىرگە تەك تالقىلانۋ دەڭگەيىندە, زاڭدى نەگىزدە بەكىتىلگەن جوق, – دەدى استانا قالاسى اكىمدىگىنىڭ «استانا جاستارى» جرو» كمم-ءنىڭ ەرىكتىلەر قوزعالىسىن دامىتۋ ءبولىمىنىڭ باسشىسى ەلۆيرا ەسمۇحانوۆا.
جالپى, ەلوردادا 50-گە جۋىق ۆولونتەرلىك ۇيىم مەن قوزعالىس تۇراقتى نەگىزدە جۇمىس ىستەيدى. بۇگىندە ولاردىڭ ساپىنا قوسىلعىسى كەلەتىندەر سانى ارتىپ كەلەدى. اسىرەسە بالالار كوبىرەك قىزىعۋشىلىق تانىتۋدا. ولاردىڭ سەبەپتەرى مەن ماقساتتارى ءارتۇرلى. كەيبىرەۋلەرى بىرەۋگە جاردەم ەتۋدى ماقسات تۇتسا, ەندى ءبىرى شەتەلدىك جوعارى وقۋ ورىندارىنا ءتۇسۋ ءۇشىن پورتفوليوسىن جاقسارتۋدى كوزدەيدى. دەسە دە, ەرىكتى بولۋ – ەرلىكپەن تەڭ.
