وزبەكستاننىڭ ورتالىق سايلاۋ كوميسسياسى حابارلاعانداي, سايلاۋدا پارلامەنتتىك پارتيالار ۇسىنعان ءتورت كانديدات مەملەكەت باسشىسى لاۋازىمىنا تالاسادى. ال وزبەكستاننىڭ ليبەرال-دەموكراتيالىق پارتياسى بۇل جولى دا شاۆكات ميرزيەيوۆتىڭ كانديداتۋراسىن ۇسىندى.
حالىقتىق-دەموكراتيالىق پارتيانىڭ كانديداتى ۇلىقبەك ينوياتوۆ بولدى. ول «ولي» ءماجىلىسىنىڭ زاڭ شىعارۋ پالاتاسى سپيكەرىنىڭ ورىنباسارى قىزمەتىن اتقارادى. «ادولات» سوتسيال-دەموكراتيالىق پارتياسى وزبەكستان رەسپۋبليكاسى جوعارعى سوتى توراعاسىنىڭ ءبىرىنشى ورىنباسارى روباح ون ماحمۋدوۆانى ۇسىندى. سونىمەن قاتار ەكولوگيالىق پارتيا وزبەكستان رەسپۋبليكاسىنىڭ پرەزيدەنتى لاۋازىمىنا پارتيانىڭ ورتالىق كەڭەسى اتقارۋ كوميتەتىنىڭ توراعاسى ابدۋشۋكۋر حامزاەۆتىڭ كانديداتۋراسىن قولدادى.
پرەزيدەنت سايلاۋىندا بارلىعى 19,6 ميلليونعا جۋىق تىركەلگەن سايلاۋشىلار داۋىس بەرە الادى. وسك مالىمەتى بويىنشا, 28 ماۋسىمنان 1 شىلدەگە دەيىن مەرزىمىنەن بۇرىن داۋىس بەرۋ قۇقىعىن رەسپۋبليكانىڭ 376 623 ازاماتى پايدالانىپ ۇلگەرگەن.
سايلاۋدىڭ وتكىزىلۋىن قازىرگى پرەزيدەنت شاۆكات ميرزيەيوۆ كۇردەلى جاھاندىق جانە وڭىرلىك سىن-قاتەرلەر جاعدايىندا شۇعىل ساياسي, الەۋمەتتىك جانە ەكونوميكالىق رەفورمالاردىڭ قاجەتتىلىگىمەن ءتۇسىندىردى. ول ءتيىستى جارلىققا ەكى اي بۇرىن - 8 مامىردا قول قويدى.
ايتا كەتەيىك, 65 جاستاعى ميرزيەيوۆ ءبىرىنشى رەت 2016 جىلعى كەزەكتەن تىس سايلاۋدا 88,6 پايىز داۋىسپەن ەل پرەزيدەنتى بولىپ سايلاندى. 2021 جىلدىڭ قازان ايىندا ەكىنشى بەس جىلدىق مەرزىمگە قايتا سايلانىپ, 80,1 پايىز داۋىس جيناعان ەدى.
