جامبىل وبلىسىنىڭ اكىمى نۇرجان نۇرجىگىتوۆ ەلوردانىڭ 25 جىلدىعىمەن قۇتتىقتاپ, مەرەكەنىڭ ماڭىزدىلىعىنا توقتالدى.
- بيىل ەركە ەسىلدىڭ جاعاسىنان بوي كوتەرىپ, قىسقا ۋاقىت ارالىعىندا تىنىشتىق پەن تاتۋلىقتىڭ, وركەندەۋ مەن ءوسۋدىڭ ۇلگىسىن كورسەتكەن ەڭسەلى ەلوردامىزعا 25 جىل تولىپ وتىر. ەكى عاسىردىڭ توعىسقان تۇسىندا بۋىنىن بەكىتكەن, حالىقتىڭ قۋانىشى مەن ماقتانىشىنا اينالعان استانا – مەرەيلى مەرەكەسىنە وراسان زور تابىستارمەن كەلىپ وتىر. ول شيرەك عاسىردا ەۋرازيا جۇرەگىنە, تاۋەلسىزدىگىمىزدىڭ تىرەگىنە, ماڭگىلىك مەملەكەتتىگىمىزدىڭ, اسقاق رۋحىمىزدىڭ بويتۇمارىنا اينالدى. قارىشتاپ دامىعان جاڭا استانانىڭ بۇگىنگى كەلبەتىنە سۇيسىنبەيتىن جان جوق. استانا – ەلىمىزدىڭ عانا ەمەس, الەمدىك كەزدەسۋلەر الاڭىنا, مەملەكەتىمىزدىڭ حالىقارالىق ارەناداعى برەندىنە, ەل ايماقتارىنىڭ دامۋىنىڭ باعىت-باعدارىنا, قوزعاۋشى كۇشىنە اينالدى. ەلىمىزدىڭ وبلىستارى باس قالاعا قاراپ بوي تۇزەدى. سوندىقتان دا ەڭسەلى ەلوردامىزدى «ايماقتار ارقاۋى» دەپ اتاۋعا تولىق نەگىز بار. ويتكەنى وڭىرلەردىڭ وركەندەۋى – استانانىڭ دامۋىمەن تامىرلاس, - دەي كەلە ايماق باسشىسى بارشا جامبىلدىقتاردى مەرەكەمەن قۇتتىقتادى.
سونداي-اق نۇرجان نۇرجىگىتوۆ ءوز سوزىندە جۋىردا عانا وتكەن رەسپۋبليكالىق «قازاقستان بارىسى» تۋرنيرىندە جەڭىمپاز اتانىپ, جەرلەستەرىنىڭ مەرەيىن اسىرعان عالىمجان قىرىقبايدىڭ جەتىستىگىن ايرىقشا اتاپ ءوتتى. 41 بالۋاننىڭ ىشىنەن ۇزدىك شىعىپ, ەلىمىزدىڭ باس بالۋانى اتانعان سپورتشىعا تاراز قالاسىنان 2 بولمەلى پاتەردىڭ كىلتىن تابىستاپ, ماراپاتتادى. ال ونىڭ جاتتىقتىرۋشىسى باحتيار اقبەرگەنوۆكە 2 ميلليون تەڭگەنىڭ سەرتيفيكاتىن تاپسىردى.
بۇدان سوڭ مەرەكەلىك شارا كونتسەرتتىك باعدارلاماعا ۇلاسىپ, قالا قوناقتارى مەن تۇرعىندارىنا جوعارى كوڭىل-كۇي سىيلادى.
