سەزگە قازاقستان رەسپۋبليكاسى, قىرعىزستان رەسپۋبليكاسى, وزبەكستان رەسپۋبليكاسى, موڭعوليا مەملەكەتى, رەسەي فەدەراتسياسى, قىتاي حالىق رەسپۋبليكاسى, ۆەنگريا مەملەكەتتەرىنىڭ وكىلدەرى قاتىستى.
اتالمىش جيىنعا قاتىسۋشىلار ات ۇستىندەگى كۇرەستەن (اۋدارىسپاق) دۇنيەجۇزىلىك فەداراتسياسىنىڭ رەسمي قۇرىلعانى جونىندە حابارلادى. فەدەراتسيانىڭ شتاب پاتەرى الماتى قالاسى بولىپ بەكىتىلدى. سونداي-اق قاتىسۋشى مەملەكەت وكىلدەرى ات ۇستىندەگى كۇرەستەن دۇنيەجۇزىلىك فەدەراتسياسىنىڭ پرەزيدەنتى ەتىپ قر «اۋدارىسپاق» فەدەراتسياسىنىڭ پرەزيدەنتى, «اtasu Group» كومپانياسىنىڭ باسشىسى مارات جۇماندى سايلادى.
سەزگە ارنايى قاتىسقان قر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ بۇل شارانىڭ ماڭىزدىلىعىنا توقتالدى.
«بۇگىن ەلىمىزدىڭ ۇلتتىق سپورت تاريحىنداعى ماڭىزدى كۇندەردىڭ ءبىرى. ۇلتتىق سپورتىمىز اۋدارىسپاق ويىنىن الەمدىك دارەجەگە كوتەرەر ءسات تۋدى. رەسەي, قىتاي, موڭعوليا, قىرعىزستان, وزبەكستان, ۆەنگريا مەملەكەتتەرىمەن بىرلەسە اۋدارىسپاق سپورتىن دامىتىپ دۇنيەجۇزىنە تانىتاتىن بولامىز!
بارشاڭىزعا بەلگىلى, كەلەسى جىلى ەلىمىزدە V-ءشى دۇنيەجۇزىلىك كوشپەندىلەر ويىندارى وتەدى.
كوشپەندىلەر ۇرپاعى سانالاتىن بىزدەر بۇل شارانى وتە جوعارى دەڭگەيدە وتكىزۋىمىز كەرەك.
بۇل ماسەلە مەملەكەت باسشىسى قاسىم-جومارت توقاەۆتىڭ دا ءجىتى نازارىندا!
كوشپەندىلەر ويىندارىن ءتيىستى دارەجەدە وتكىزۋ ماسەلەسىندە ۇلتتىق سپورت قاۋىمداستىعى وزىنە قاراستى فەدەراتسيالارمەن بىرلەسە جۇيەلى جۇمىستاردى باستاپ كەتتى.
بۇگىنگى دۇنيەجۇزىلىك اۋدارىسپاق فەدەراتسياسىنىڭ قۇرىلۋى سونىڭ دالەلى دەپ بىلەمىن.
وسى ورايدا, اتالمىش سپورتتىڭ دامۋى مەن وركەندەۋىندە تىنىمسىز ەڭبەك ەتىپ جۇرگەن قر «اۋدارىسپاق» فەدەراتسياسىنىڭ پرەزيدەنتى مارات جۇمان مىرزاعا ەرەكشە العىسىمدى بىلدىرەمىن!», دەدى يسلامبەك تولەۋباي ۇلى.
ءوز كەزەگىندە ات ۇستىندەگى كۇرەستەن دۇنيەجۇزىلىك فەدەراتسياسىنىڭ جاڭا پرەزيدەنتى مارات جۇمان الدا ۇلكەن جۇمىستار كۇتىپ تۇرعانىن مالىمدەدى.
«بۇگىن بارشامىز الماتىنىڭ تورىندە اسا ماڭىزدى شاراعا جينالدىق.
وسى ماڭىزدى باس قوسۋعا ءداستۇرلى ات سپورتىن دارىپتەيتىن ەلدەردەن كەلگەن وكىلدەرگە, سونداي-اق, قر ۇلتتىق سپورت قاۋىمداستىعىنا ءوز ريزاشىلىعىمدى بىلدىرەمىن.
بۇگىنگى جيىنىمىز قازاق ەلى ءۇشىن, ۇلتتىق سپورتىمىز ءۇشىن تاريحي كۇن بولادى. الەمنىڭ الپاۋىت بىرنەشە مەملەكەتتەرىمەن بىرلەسىپ ات ۇستىندەگى كۇرەستەن دۇنيەجۇزىلىك فەدەراتسياسىن قۇرۋ ارقىلى ءبىز ۇلتتىق سپورتىمىزدى جاھانعا پاش ەتەمىز دەگەن ۇلكەن جوسپارىمىز بار. ءبىزدى الدا ۇلكەن جۇمىستار كۇتىپ تۇر. بولاشاقتا فەدەراتسياعا مۇشە ەلدەرمەن بىرلەسە اتالمىش سپورتتىڭ دامىپ, وركەندەۋىنە كۇش سالاتىن بولامىز», دەدى مارات قوجاحان ۇلى.
سونداي-اق جيىن باسىندا بىرىڭعاي ويىن ەرەجەلەرى بەكىتىلدى. نەگىزگى ەرەجەلەر قازاقتىڭ ۇلتتىق سپورتى اۋدارىسپاقتان الىندى. ودان بولەك, سپورتشىلاردىڭ سالماق دارەجەلەرى قابىلدانىپ, الدا وتەتىن جارىستاردىڭ كۇنتىزبەلىك جوسپارى بەكىتىلدى. حالىقارالىق ويىنداردى ءادىل وتكىزۋ ماقساتىندا مىندەتتى تۇردە VAR (بەينەباقىلاۋ) قويىلۋ مىندەتتەلدى.
جيىن سوڭىندا قىرعىزستان رەسپۋبليكاسىنىڭ وكىلدەرى جاڭا بەكىتىلگەن بىرىڭعاي ويىن ەرەجەلەرى بويىنشا العاشقى الەم چەمپيوناتىن وسى جىلدىڭ قىركۇيەك ايىندا ىستىقكولدە وتكىزۋدى ۇسىندى. بۇل باستامانى قاتىسۋشى بارلىق ەلدەر ءبىراۋىزدان ماقۇلدادى.
