جەرگىلىكتى شارۋالار وڭىردە جاعدايدىڭ ءالى دە ۋشىعىپ تۇرعانىن ايتادى. قاپتاعان زيانكەستىڭ بەتى قايتار ەمەس. قازىر جانگەلدين, امانگەلدى جانە ناۋىرزىم اۋداندارىنداعى شەگىرتكە باسىپ قالعان ەگىستىكتەردە 31 ارنايى تەحنيكا حيميالىق وڭدەۋ جۇرگىزىپ جاتىر. ولاردىڭ ىشىندە 9 جەرۇستى جەلدەتكىش بۇرىككىش, 13 اەروزولدى گاز گەنەراتورى, 6 جەڭىل اۆياتسيا كەمەسى جانە 3 ۇشاق بار. القاپتى ۋلاۋ جۇمىستارىنىڭ باسى-قاسىندا وڭىرگە ارنايى جۇمىس ساپارىمەن كەلگەن اۋىل شارۋاشىلىعى مينيسترلىگىنە قاراستى مەملەكەتتىك ينسپەكتسيا كوميتەتى توراعاسىنىڭ مىندەتىن اتقارۋشى قانىش اليەۆ ءجۇر.
وبلىستىق اۋماقتىق ينسپەكتسياسى مەملەكەتتىك ينسپەكتسيا ءبولىمىنىڭ باسشىسى تىلەك تولەباەۆتىڭ ايتۋىنشا, بيىل وبلىستا ءۇيىرلى زيانكەستەرگە قارسى حيميالىق وڭدەۋدەن ءوتۋى ءتيىس 422,904 مىڭ گەكتار القاپ بەلگىلەنىپ, وعان جەتەتىن پرەپاراتتىڭ ءبارى اكەلىنگەن. حيميالىق وڭدەۋ جۇمىستارىن ىسكە اسىراتىن قىزمەت كورسەتۋشى مەكەمەلەر دە انىقتالعان. شىلدەنىڭ ەكىسىنە دەيىن وڭىردە 257,2 مىڭ گەكتار جەرگە يتاليالىق پرۋسقا قارسى ۋ شاشۋ جوسپارلانعان. بۇگىنگە دەيىن سونىڭ 66 پايىزدان استامى حيميالىق وڭدەۋدەن ءوتىپتى. بۇگىنگە دەيىن امانگەلدى, التىنسارين, دەنيسوۆ, فەدوروۆ, سارىكول, قامىستى اۋداندارىنداعى ءۇيىرلى شەگىرتكە كوبەيۋى مۇمكىن القاپتارعا حيميالىق وڭدەۋ جۇمىستارى جۇرگىزىلگەن.
جانگەلدين اۋدانىنىڭ شارۋالارى ءۇيىرلى شەگىرتكە 10 مىڭ گەكتاردان اسا ەگىستىگىمىزدى تىپ-تيپىل ەتىپ كەتتى دەيدى. الايدا القاپتاردى حيميالىق وڭدەۋگە جاۋاپتى رەسمي ورىندار «زيان شەككەن اۋىلشارۋاشىلىق داقىلدارىن بايقامادىق» دەپ وتىر. ال الەۋمەتتىك جەلى ارقىلى تاراپ جاتقان فوتوسۋرەتتەردەن ەندى عانا بويلاپ كەلە جاتقان بيداي ساباعىنىڭ جۇلما-جۇلماسى شىققانى انىق بايقالادى.
– القاپتاردى حيميالىق وڭدەۋدەن وتكىزۋ جۇمىستارى 21 مامىردا باستالدى. ءۇيىرلى شەگىرتكە بۇعان دەيىن ءۇش رەت انىقتالىپ, ولاردى جويۋعا ارنايى تەحنيكا جىبەرىلدى. قازىر بۇعان دەيىن حيميالىق وڭدەۋدەن وتكەن جەرلەردىڭ وزىنەن ءۇيىرلى شەگىرتكە شىعىپ جاتىر. يتاليا پرۋسى دەگەن وتە ومىرشەڭ زيانكەستىڭ قاتارىنا جاتادى. قازىر شەگىرتكە باسقان القاپتاردى ۋلاۋ جۇمىستارى كوميتەت توراعاسىنىڭ مىندەتىن اتقارۋشى قانىش اليەۆ پەن وبلىستىق اۋماقتىق ينسپەكتسيا باسشىلارىنىڭ باقىلاۋىمەن ىسكە اسىرىلىپ جاتىر. شارۋالارعا قانشالىقتى شىعىن كەلگەنىن, نەشە گەكتار القاپ زيان شەككەنىن ءدال قازىر سول اۋدانداردا جۇمىس ىستەپ جاتقان جۇمىس توبى انىقتايتىن بولادى, – دەدى ت.تولەباەۆ.
شەگىرتكەدەن كەلگەن شىعىننىڭ بار-جوعىن جانگەلدين اۋداندىق اۋىل شارۋاشىلىعى ءبولىمىنىڭ ماماندارى دا ايتا المادى. ء«دال قازىر شىعىن تۋرالى ناقتى مالىمەت بەرە المايمىز. ويتكەنى شەگىرتكە ءالى بار. ءداندى القاپتارعا كەلگەن زالال مولشەرى زيانكەستەردى جويىپ بولعان سوڭ بارىپ ەسەپتەلەدى», دەيدى ماماندار. ەگىنىمدى شەگىرتكە جەپ قويدى دەپ شىرىلداپ جۇرگەن شارۋالارعا قانداي كومەك كورسەتىلەتىنى دە, ازىرگە بەلگىسىز.
قوستاناي وبلىسى
