پالاتا سپيكەرى سەنات پەن ءماسليحاتتاردىڭ بىرلەسكەن جۇمىسىنىڭ باستى مىندەتى ەل پرەزيدەنتىنىڭ باستاماسىمەن قولعا الىنعان رەفورمالاردىڭ ىسكە اسىرىلۋىن زاڭنامالىق دەڭگەيدە ساپالى قامتاماسىز ەتۋ ەكەنىن اتاپ ءوتتى.
ماۋلەن اشىمباەۆ جەرگىلىكتى وكىلدى ورگانداردى وسى باعىتتا بەلسەندى جۇمىس ىستەۋگە شاقىرىپ, وڭىردەگى ماڭىزدى ماسەلەلەرگە نازار اۋداردى.
«سەنات پەن ءماسليحاتتاردىڭ بىرلەسكەن جۇمىسىنداعى ماڭىزدى باعىتتاردىڭ ءبىرى – وڭىرلەردەگى وزەكتى ماسەلەلەردى شەشۋ. مۇنداي ماسەلەلەر از ەمەس. ولاردىڭ باسىم بولىگى ينفراقۇرىلىمعا, الەۋمەتتىك نىساندارعا, مەملەكەتتىك باعدارلامالاردىڭ ورىندالۋىنا قاتىستى ەكەنى بەلگىلى. ۇلىتاۋ وبلىسىندا وسىنداي ماسەلەلەردى شەشۋ ءۇشىن ءوڭىردىڭ 2026 جىلعا دەيىنگى الەۋمەتتىك-ەكونوميكالىق دامۋىن قامتاماسىز ەتەتىن كەشەندى جوسپار قابىلدانعانىن بىلەمىز. ەلىمىزدىڭ دامۋىن جانە ازاماتتاردىڭ ءومىر ءسۇرۋ ساپاسىن ارتتىرۋدى قامتاماسىز ەتۋ – ءبىزدىڭ ورتاق ماقساتىمىز. سوندىقتان سەنات وڭىرلەردىڭ مۇددەسىن قورعايتىن پالاتا رەتىندە ماسليحاتتارمەن ءوزارا بايلانىستى ودان ءارى نىعايتا بەرەدى», دەدى م.اشىمباەۆ.
سونداي-اق سەنات توراعاسى سەناتورلار مەن ءماسليحات دەپۋتاتتارىنىڭ بىرلەسكەن جۇمىسىنىڭ نەگىزگى باعىتتارىنا توقتالىپ ءوتتى. بۇل رەتتە زاڭنامالىق جۇمىسقا ءماسليحات دەپۋتاتتارىن تارتۋدىڭ ماڭىزدى ەكەنى ايتىلدى. سەناتورلار وڭىرلەردى دامىتۋ ماسەلەسىن ءاردايىم نازاردا ۇستاپ, ماسەلەلەردى جۇيەلى شەشۋگە زاڭنامالىق تۇرعىدان ىقپال ەتەتىن بولادى. اتالعان باعىتتا ء«وڭىر» دەپۋتاتتىق توبى جانە العاشقى وتىرىسى مامىر ايىندا بولعان جەرگىلىكتى وكىلدى ورگاندارمەن ءوزارا ءىس-قيمىل جاساۋ جونىندەگى كەڭەس جۇمىس ىستەيتىنىن اتاپ وتكەن ءجون.
كەزدەسۋ بارىسىندا باسقارۋ جۇيەسىن ورتالىقسىزداندىرۋ ماسەلەسىنە دە باسا ءمان بەرىلدى. بۇل جونىندە مەملەكەت باسشىسى بىرنەشە رەت ايتقانى بەلگىلى. مۇنداي اكىمشىلىك ترانسفورماتسيا ءماسليحاتتاردىڭ قۇزىرەتىن كەڭەيتەدى جانە ءرولىن ارتتىرادى, سونداي-اق ءوڭىردىڭ دامۋى ءۇشىن جاڭا مۇمكىندىكتەرگە جول اشادى.
جيىنعا قاتىسۋشىلار دەپۋتاتتار اراسىندا تاجىريبە الماسۋدىڭ جانە وقىتۋ ترەنينگتەرى مەن سەمينارلار ۇيىمداستىرۋدىڭ ماڭىزى زور ەكەنىنە دە نازار اۋداردى. مۇنداي ءوزارا ءىس-قيمىل جەرگىلىكتى وكىلدى ورگان قىزمەتكەرلەرىنىڭ بىلىكتىلىگىن ارتتىرا تۇسپەك.
ۇلىتاۋ وبلىستىق ءماسليحاتىنىڭ دەپۋتاتى ن.راسكوپوپوۆ وبلىس تۇرعىندارىن مازالاپ جۇرگەن ساپالى اۋىز سۋ ماسەلەسى تۋرالى ءسوز ەتتى. «جەزقازعان حالقى اۋىز سۋدىڭ 70 پايىزىن اشىق سۋ قويماسىنان الادى. سوندىقتان دا حالىق ء«ۇيتاس-ايدوس» سۋ قۇبىرىنىڭ تەزىرەك پايدالانۋعا بەرىلۋىن تاعاتسىزدانا كۇتىپ وتىر. قازىر مۇندا مەردىگەر جاقسى جۇمىس جۇرگىزىپ جاتىر, قارجىلاندىرۋ ماسەلەسىندە ءۇزىلىس بولىپ قالماۋى وتە ماڭىزدى», دەدى ول.
دەپۋتات ق.رىسبەكوۆ مەملەكەتتىك ساتىپ الۋ تۋرالى زاڭدى قايتا قاراۋ تۋرالى ۇسىنىس ءبىلدىردى. ويتكەنى بار شارۋانى تەندەرگە تىرەپ قويۋدىڭ تەرىستىگىن ۋاقىت كورسەتىپ وتىر. «تەندەرگە ءتىپتى ەشقانداي قۇرال-جابدىعى جوق كومپانيالار دا قاتىسىپ, جەڭىمپاز اتانىپ جاتادى. سونىڭ سالدارىنان جۇمىس جۇرمەيدى, ۋاقىت زايا كەتەدى», دەيدى دەپۋتات. كەزدەسۋ بارىسىندا سەنات توراعاسى ءاربىر پىكىر مەن ۇسىنىستىڭ ەسكەرۋسىز قالمايتىنىنا سەندىردى.
وبلىسقا ساپارى كەزىندە سەنات توراعاسى ۇلىتاۋعا ارنايى بارىپ, جەرگىلىكتى اقساقالدارمەن كەزدەستى. ءوز سوزىندە ماۋلەن اشىمباەۆ وڭىردەگى تاريحي-مادەني ەسكەرتكىشتەردى ساقتاۋعا ۇلكەن ۇلەس قوسىپ كەلە جاتقان اعا بۋىنعا العىس ءبىلدىردى. ول وبلىستىڭ بۇل باعىتتاعى الەۋەتىن ودان ءارى ارتتىرۋ جولىندا ەل اعالارىنىڭ الداعى ۋاقىتتا دا بەلسەندىلىك تانىتاتىنىنا سەنىم ءبىلدىردى.
« ۇلىتاۋ – ۇلتىمىزدىڭ ۇياسى. ءبىزدىڭ مەملەكەتتىلىگىمىز وسى كيەلى جەردەن باستاۋ الادى. مەملەكەت باسشىسى قاسىم-جومارت كەمەل ۇلى توقاەۆتىڭ ۇلىتاۋ وبلىسىن قۇرۋ تۋرالى شەشىمى ءوڭىردىڭ دامۋىنا تىڭ سەرپىن بەردى. بۇل ولكەدە كوپتەگەن تاريحي-مادەني ەسكەرتكىش, تاريحىمىزداعى ۇلى تۇلعالاردىڭ كەسەنەلەرى بار ەكەنى بەلگىلى. ولاردى لايىقتى قورعاۋ جانە ساقتاۋ – ورتاق جاۋاپكەرشىلىك. وسى باعىتتاردا جۇيەلى جۇمىس اتقارۋ – ۇلتىمىزدىڭ مۇددەسىن قورعاۋ, جوعىن تۇگەندەۋ, تاريحي تۇلعالارىمىز بەن مادەني مۇرالارىمىزدى ۇلىقتاۋ بولارى انىق», دەدى م.اشىمباەۆ.
سونىمەن قاتار سەنات سپيكەرى پالاتانىڭ وسى باعىتتاعى جۇمىسىنا توقتالىپ, «ۇلتتىق مۇددە» الاڭىنىڭ ماڭىزى جونىندە ايتتى. ودان بولەك, ۇلتتىق قۇندىلىقتار تاقىرىبىنا ارنالعان ۇكىمەت ساعاتى مەن پارلامەنتتىك تىڭداۋلاردىڭ ناتيجەسى جايىندا ءسوز قوزعادى.
وسكەلەڭ ۇرپاقتىڭ بويىنا ۇلتتىق قۇندىلىقتاردى ءسىڭىرۋدىڭ بەرەرى قاشاندا مول ەكەنى ءسوزسىز. ماۋلەن اشىمباەۆ وبلىستىڭ بەلسەندى جاستارىمەن كەزدەسۋدە وسى ماسەلەگە كوڭىل ءبولدى. ءوز سوزىندە سەنات توراعاسى تالانتتى, ءبىلىمدى جاس بۋىن ەلىمىزدەگى وزگەرىستەردىڭ جانە ادىلەتتى قازاقستان قۇرۋدىڭ نەگىزگى قوزعاۋشى كۇشى ەكەنىن تىلگە تيەك ەتتى.
«سىزدەردىڭ ارقايسىڭىز ەڭبەكقورلىق پەن تاباندىلىقتىڭ ارقاسىندا ءوز سالالارىڭىزدا ايتارلىقتاي ناتيجەگە قول جەتكىزدىڭىزدەر. مەملەكەت ماقساتى ايقىن, پاتريوت جاستارعا قولداۋ كورسەتۋدى جانە ولاردىڭ ءارى قاراي دامۋىنا جاعداي جاساۋدى جالعاستىرا بەرەدى. سىزدەردىڭ كرەاتيۆتى يدەيالارىڭىز بەن ۇسىنىستارىڭىز ەلىمىزدىڭ بولاشاعىنا اسەر ەتەتىنى ءسوزسىز. وسى جاۋاپكەرشىلىكتى ارقايسىڭىز سەزىنىپ, مەملەكەتىمىزدىڭ دامۋىنا ۇلكەن ۇلەستەرىڭىزدى قوساسىزدار دەپ سەنەمىن», دەگەن ماۋلەن اشىمباەۆ كەزدەسۋگە قاتىسۋشىلاردىڭ نازارىن ابايدىڭ «تولىق ادام» مەن قاسىم-جومارت توقاەۆتىڭ «ادال ازامات» تۇجىرىمدامالارىن ءتيىمدى رۋحاني باعدار رەتىندە ىلگەرىلەتۋدىڭ ماڭىزدىلىعىنا اۋداردى.
سونىمەن قاتار سەنات توراعاسى جاستارعا پالاتانىڭ زاڭ شىعارۋ قىزمەتى, جاس بۋىندى مەملەكەتتىك باسقارۋ سالاسىنا جۇمىلدىرۋ جانە ازاماتتىق الەۋەتتى جانداندىرۋ جونىندەگى جۇمىستارى تۋرالى ايتىپ بەردى. ءوز كەزەگىندە ۇلىتاۋ جاستارى سەنات جانىنداعى جاس ساراپشىلار كلۋبىنىڭ جانە تالداۋ مەكتەبىنىڭ قىزمەتىنە قىزىعۋشىلىق ءبىلدىردى.
ودان بولەك, وڭىرگە ساپارى اياسىندا ماۋلەن اشىمباەۆ اباي اتىنداعى دارىندى بالالارعا ارنالعان مامانداندىرىلعان مەكتەپ-ينتەرناتىنىڭ جانە « ۇلىتاۋ تەحنولوگيالىق ۋنيۆەرسيتەتىنىڭ» ۇجىمىمەن كەزدەستى. سونداي-اق ول « ۇلىتاۋ» ۆيزيت-ورتالىعىنىڭ قىزمەتىمەن تانىسىپ, «جوشى حان», «دومباۋىل», «الاشاحان» جانە «التىن شوقى» تاريحي-مادەني كەشەندەرى مەن كەسەنەلەرىن زيارات ەتتى.
