سۋرەتتى تۇسىرگەن اۆتور
بىلتىر قاراپايىم تۇرعىندار مال ازىعىن بۇتا-قاراعاننىڭ اراسىن قۋالاي شاۋىپ, تىشقانشىلاپ جيناعان. بيىل دا سول, سۋارمالى نەمەسە وزەن-كولدىڭ ماڭىنداعى شابىندىقتار بولماسا, تەپسەڭدەر مەن الاڭقايلاردىڭ ءشوبى تىم سۇيىق. ادەتتە ءشوپ شىقپاعان وڭىرلەردە مالدىڭ قۇنى ارزانداپ, ءشوپ باعاسى قىمباتتايدى.
– «بالاپاندى كۇزدە سانايدى» دەمەكشى, شوپكە ءالى شىعا قويمادىق. تەحنيكالارىمىزدى ازىرلەپ, اساي-مۇسەيىمىزدى تۇگەندەپ جاتىرمىز. ونىڭ ۇستىنە, كوكتەم كەش شىقتى, جاز جاۋىن-شاشىنسىز. ءشوپ جەتىلىپ ۇلگەرە قويعان جوق. جەتىلگەن كۇننىڭ وزىندە ءتۇسىم مول بولا قويمايتىن سەكىلدى. ءشوپ شىقپاسا, كوپشىلىك ەل مال باسىن ازايتۋعا تىرىسادى. ءسويتىپ, قىسىلعان ەل اۋرە-سارساڭعا ءتۇسىپ باققان مالىن ارزانعا ساتۋعا ءماجبۇر بولادى, دەيدى كاتونقاراعاي اۋدانى, شىڭعىستاي اۋىلىنىڭ تۇرعىنى رينات بولات ۇلى.
ايتقانداي, ەكپە شوپتەردىڭ ءوزى ءپىسىپ ۇلگەرگەن جوق. جىلدا ماۋسىم ورتاسىندا كوپجىلدىق جوڭىشقانى شاۋىپ الار ەدى. بيىل ءالى شالعى تۇسە قويمادى. وسىمدىكتىڭ بوتانيكالىق قۇرامى, قۇنارلىعى بابىنا كەلگەندە ءبىر-اق شابادى. قۇنارلى شوپتە تۇرعان مال دا كۇيىن بەرمەيدى.
ستاتيستيكالىق دەرەكتەرگە سۇيەنسەك, بىلتىر مالدى قىستان قىسىلماي شىعارۋ ءۇشىن اۋىل شارۋاشىلىعى قۇرىلىمدارى 2 590 مىڭ توننا ءشوپ, 122 مىڭ توننا پىشەندەمە, 250 مىڭ توننا سۇرلەم, 161 مىڭ توننا سابان, 245 مىڭ توننا جەم دايىندالعان. بيىلعى مەجە دە وسى جوسپاردىڭ ماڭايىندا. الايدا ورىندالا ما؟
– بيىل دا قول تارتپامەن شابۋعا تۋرا كەلەتىن سەكىلدى. سەبەبى الاڭقايلارداعى ءشوپ كۇيىپ كەتتى. قورشالعان جەرىمىز بولسا, ءوزىمىز-اق سۋارىپ الار ەدىك, دەيدى اۋىل تۇرعىنى ايدىن نۇرعابدەن.
ءوزىمىز-اق سۋارامىز دەگەننەن شىعادى, كەيبىر اۋدانداردا ارنايى جەرگە جاڭبىر مەن قار سۋىن جيناپ, تىڭ تاسىلمەن شابىندىقتاردى سۋارۋدى قولعا الماق. ەگەر جۇزەگە اسسا, قۇرعاقشىلىق جىلدارى شارۋالار الاڭسىز جەرىن سۋارىپ, مول ءونىم الۋعا مۇمكىندىك مول بولار ەدى.
دەيتۇرعانمەن, ءدال قازىر ءشوپتىڭ تۇسىمىنە بايلانىستى كەسىپ, پىكىر ايتۋعا بولمايدى. ءبىر انىعى, ستاتيستيكالىق دەرەكتەردە جەمشوپ ءتۇسىمى جىلدان-جىلعا كوبەيىپ كەلە جاتىر. سەبەبى شابىندىق كولەمىن كەڭەيتۋ بويىنشا وبلىستا جۇمىستار جۇيەلى تۇردە جۇرگىزىلەدى. ماسەلەن, بىلتىر شابىندىق جەرلەر كولەمى 14,6 گەكتارعا ارتقان. «Amanat» پارتياسى جانىنان قۇرىلعان «جەر اماناتى» كوميسسياسىنىڭ مۇرىندىق بولۋىمەن پايدالانىلماي, يگەرىلمەي جاتقان جەرلەر دە مەملەكەتكە قايتارىلىپ, كوميسسيا ارقىلى جەردى شىنىمەن قاجەت ەتەتىن ازاماتتارعا ۇلەستىرىپ جاتىر.
شىعىس قازاقستان وبلىسى
