«پرەزيدەنتتىڭ تاعى ءبىر ماڭىزدى باستاماسى جۇزەگە استى. ۇكىمەت ناشاقورلىققا جانە ەسىرتكى بيزنەسىنە قارسى 2025 جىلعا دەيىنگى كەشەندى جوسپاردى قابىلدادى», دەپ جازدى ە.قارين.
سونداي-اق ونىڭ ايتۋىنشا, مەملەكەت باسشىسى بىلتىرعى قىركۇيەك ايىنداعى جولداۋىندا وسىنداي جوسپار ازىرلەۋ جونىندە تاپسىرما بەرگەن.
«پرەزيدەنت ءوزىنىڭ سايلاۋالدى باعدارلاماسىندا سينتەتيكالىق ەسىرتكىنىڭ تارالۋىنا قارسى كۇرەستى ماڭىزدى باسىمدىقتاردىڭ ءبىرى رەتىندە بەلگىلەدى.
مۇنداي جوسپار 2016 جىلدان بەرى بولماعانىن ايتا كەتكەن ءجون. بۇل ەسىرتكىگە قارسى كۇرەستىڭ تيىمدىلىگىنە تەرىس اسەرىن تيگىزدى.
سوندىقتان بىلتىر پرەزيدەنت جانىنداعى جاستار ساياساتى جونىندەگى كەڭەس سينتەتيكالىق ەسىرتكىنىڭ تارالۋى ماسەلەسىن العاشقىلاردىڭ ءبىرى بولىپ كوتەرىپ, قوعام نازارىن اۋداردى», دەپ جازدى مەملەكەتتىك كەڭەسشى.
پارلامەنت ءماجىلىسىنىڭ جاڭا شاقىرىلىم دەپۋتاتتارى دا ەسىرتكى پروبلەماسىن ايتىپ, الاڭداۋشىلىقتارىن ءبىلدىرىپ, دەپۋتاتتىق ساۋال جولدادى.
«پرەزيدەنت تۇركىستانداعى ۇلتتىق قۇرىلتايدا سويلەگەن سوزىندە جاستار اراسىندا ەسىرتكىنىڭ تارالۋىن ۇلت ساۋلىعىنا قاۋىپ توندىرەتىن كەسەل دەپ اتادى. مەملەكەت باسشىسى بۇل ماسەلەنى ايرىقشا باقىلاۋدا ۇستايتىنىن ايتتى.
قابىلدانعان كەشەندى جوسپار ساراپشىلار اراسىندا, سونىڭ ىشىندە جاستار ساياساتى جونىندەگى كەڭەستە دە كەڭىنەن تالقىلاندى. قۇجاتتاعى جاڭا تەتىكتەر مەن قۇرالدار, ەڭ الدىمەن, ناشاقورلىقتىڭ الدىن الۋدى جانە ەسىرتكىگە تاۋەلدى ادامداردىڭ سانىن ازايتۋدى كوزدەيدى. كەشەندى جوسپاردىڭ ەڭ باستى ماقساتى – قوعامنىڭ, ازاماتتىق ينستيتۋتتار مەن بارلىق بيلىك ورگاندارىنىڭ كۇش-جىگەرىن وسى ماسەلەگە جۇمىلدىرۋ», دەلىنگەن مەملەكەتتىك كەڭەسشىنىڭ جازباسىندا.
