«قالا تۇرعىندارىنىڭ, جاستار قاۋىمىنىڭ جۇمىستان, ساباقتان تىس بوس ۋاقىتتارىندا تازا اۋادا تىنىعىپ, دەمالۋىنا قولايلى جاعداي جاساۋ ماقساتىندا وسىنداي بىرەگەي اللەيا جاسالدى. نەگىزگى ماقسات – حالقىمىزدىڭ قاسيەتتى كۇي ونەرىن ناسيحاتتاۋ ارقىلى جاستاردىڭ ونەرگە دەگەن قىزىعۋشىلىعىن ارتتىرۋ, ولاردىڭ بويىنا رۋحاني قۇندىلىقتاردى ءسىڭىرۋ. مۇندا كەلۋشىلەر تەك كۇي تىڭداپ قانا قويماي, اۆتورلارىنىڭ ءومىرى مەن شىعارماشىلىعى تۋرالى دا مالىمەت الا الادى. ماسەلەن, كەيبىر كۇيشىلەردىڭ ارتىندا ءبىر عانا كۇيى قالعان. دەمەك بۇل باعىتتاعى ىزدەنىستەردى ءالى دە بولسا جالعاستىرا بەرۋ كەرەك», دەيدى يدەيا اۆتورى, ۋنيۆەرسيتەت رەكتورى ن.دۋلاتبەكوۆ.
«كۇي اللەياسى» جوباسى ۋنيۆەرسيتەتتىڭ عىلىمي زەرتتەۋ جۇمىستارىنىڭ بايقاۋىندا ۇسىنىلىپ, وقۋ ورداسى باسشىلىعى تاراپىنان قولداۋعا يە بولدى. اۆتورلار قۇرىلعىنىڭ باسپا پالاتاسىن ازىرلەۋدەن باستاپ, ونىڭ كورپۋسىن, باعدارلامالىق جاساقتاماسىن جاساۋ, قۇرىلعىنى ورناتۋ جۇمىستارىنىڭ بارلىعىن وزدەرى اتقارىپ شىقتى. جوبا ءۇشىن اسپان جانە روبوتتەحنيكا زەرتحانالارى, 3D باسىپ شىعارۋ جانە تسيفرلىق مودەلدەۋ زەرتحانالارىنىڭ رەسۋرستارى پايدالانىلدى. ءاربىر ورىندىقتا ارنايى سەنسور بار. ادام ورىندىققا ءبىر جارىم مەتر قاشىقتىقتا جاقىنداعاندا, سەنسور ىسكە قوسىلىپ, مۋزىكا ويناي باستايدى. سونىمەن قاتار مۇندا QR-كود ورناتىلعان. سونىڭ كومەگىمەن, ۇيالى تەلەفون ارقىلى كۇيشىلەردىڭ ءومىربايانى مەن شىعارماشىلىعى جايىندا تولىققاندى اقپارات الۋعا بولادى. جوبا اۆتورلارىنىڭ ايتۋىنشا, «كۇي اللەياسى» جىل مەزگىلىنىڭ كەز كەلگەن ۋاقىتىندا كەلۋشىلەرىنە كۇي شىرقاۋعا ءازىر. ورىندىقتار جاۋىن-شاشىنعا, تومەنگى تەمپەراتۋراعا ءتوزىمدى.
– ءبىزدىڭ ەندىگى جوسپارىمىز – ۋنيۆەرسيتەتتىڭ 8-كورپۋستىڭ جانىنان «ولەڭدەر اللەياسىن» قۇرۋ. وندا ورىندىقتار ورناتىلدى, ەلەكتر قۋاتى جەتكىزىلدى, تەك ەلەكترونيكا ماسەلەسى قالدى, – دەيدى ۋنيۆەرسيتەتتىڭ اقپاراتتىق تەحنولوگيالار جانە تەلەكوممۋنيكاتسيا ورتالىعىنىڭ جەتەكشىسى ۆ.كاراباسوۆ.
