«تەڭىز» كەن ورنىنان الىناتىن پروپاندى وڭدەيتىن كاسىپورىن جىلىنا 500 مىڭ توننا جوعارى ساپالى پوليپروپيلەن وندىرۋگە قاۋقارلى. بۇل الەم بويىنشا پوليپروپيلەن ءوندىرىسىنىڭ 1 پايىزىن قۇرايدى.
مارات قاراباەۆ KPI Inc. كومپانياسىنىڭ باسشىلىعىنا وندىرىلەتىن پوليپروپيلەننىڭ جىلدىق كورسەتكىشىن ارتتىرۋ جولدارىن قاراستىرىپ, ناقتى جوسپار ۇسىنۋدى تاپسىردى.
سونداي-اق دەلەگاتسيا پروپاندى قۇيۋ جانە ساقتاۋ پاركىنىڭ, دايىن ءونىم قويماسىنىڭ, پروپاندى دەگيدرلەۋ جانە پروپيلەندى پوليمەرلەۋ تەحنولوگيالىق قوندىرعىلارىنىڭ, زاۋىتتىڭ نەگىزگى قوندىرعىلارىنىڭ, قوسالقى ەلەكتر ستانساسىنىڭ, ورتالىقتاندىرىلعان وپەراتورلار زالىنىڭ جۇمىسىمەن تانىستى. سونىمەن قاتار SGS زاۋىت زەرتحاناسىنا بارىپ, پوليپروپيلەن ءوندىرىسىن كوزبەن كوردى. قىزمەتكەرلەرمەن جۇمىس بارىسى تۋرالى پىكىر الماستى.
ايتا كەتەيىك, ءوندىرىس وشاعى ەلىمىزدىڭ پوليپروپيلەنگە دەگەن سۇرانىسىن وتەپ قانا قويماي, قۇرىلىس, مەديتسينا, اۆتوموبيل قۇراستىرۋ, تاماق ونەركاسىبى سەكىلدى سالالاردا پوليپروپيلەننەن ءتۇرلى بۇيىم شىعاراتىن شاعىن جانە ورتا بيزنەستىڭ دامۋىنا ىقپال ەتەدى.
