«مەن ءۇشىن كۇتپەگەن جاعداي بولدى. سەبەبى وسىنداي بەدەلدى ۋنيۆەرسيتەتتەر باكالاۆرياتتان دوكتورانتۋراعا سيرەك قابىلدايدى. ومىرىمدە ءبىر جاقسى جاعداي ورىن السا, بىردەن مەكتەبىم ەسىمە تۇسەدى. زياتكەرلىك مەكتەپتە العان ءبىلىمىم ماعان ءالى دە جاڭا مۇمكىندىكتەر سىيلاپ كەلەدى», دەيدى اقتوبەلىك زياتكەر.
ولجاس ەسەنباەۆتىڭ تاڭداۋى – نيۋ-يوركتەگى كورنەلل ۋنيۆەرسيتەتى. بۇل جوعارى وقۋ ورنى ايۆي ليگاسىنا كىرەدى, الەمدەگى ۇزدىك 20 ۋنيۆەرسيتەتتىڭ قاتارىندا تۇر. جىل سايىنعى قابىلداۋ كورسەتكىشى 6,9 پايىزدى قۇرايدى.
ولجاس بيىل «بيومەديتسينالىق ينجەنەريا» باعدارلاماسى بويىنشا كورەياداعى UNIST ۋنيۆەرسيتەتىن «ادام فاكتورلارى ينجەنەرياسى» ماماندىعى بويىنشا تەرەڭدەتىپ ءبىتىردى. ونىڭ بولاشاق ماماندىعى «اقپاراتتىق عىلىمدار» دەپ اتالادى. بۇل ادام بويىنداعى كۇيزەلىس, ۇرەي, كەيدە ءتىپتى ناشاقورلىق بەلگىلەرىنىڭ پايدا بولۋىن الدىن الا بولجاۋعا باعىتتالعان. بۇل رەتتە كورنەلل ۋنيۆەرسيتەتى ستۋدەنتتەرىنە عىلىمي جۇمىستارمەن اينالىسۋعا مول مۇمكىندىك ۇسىنادى. ولجاس پسيحيكالىق جانە فيزيكالىق اۋرۋلاردى تانۋ ءۇشىن ءموبيلدى سەنسورلاردى جانە ماشينالىق وقىتۋدى قولدانۋدى زەرتتەيتىن زەرتحانادا وقىپ, ىزدەنۋدى جوسپارلاپ وتىر. ونىڭ ىزدەنىمپازدىعى مەن بەلسەندىلىگىن, سونداي-اق بەينەلەۋ ونەرىنە دەگەن ەرەكشە قىزىعۋشىلىعىن مەكتەپتەگى ۇستازدارى دا اتاپ ءوتتى.
«ولجاس الەمدەگى جاھاندىق ماسەلەلەردى شەشۋگە ۇلەس قوسۋعا بالا كەزىنەن ۇمتىلدى. ول ءوزىن تالانتتى سۋرەتشى جانە يلليۋستراتور رەتىندە كورسەتىپ, زياتكەرلىك مەكتەپ وقۋشىسى ارايلىم سەيتەنوۆا اۋدارعان قازاق تىلىندەگى گارري پوتتەر تۋرالى العاشقى كىتاپقا دا سۋرەتتەر سالعان. ولجاستىڭ كوميكستەرى مەن يلليۋستراتسيالارى مەكتەپ قاۋىمداستىعىنىڭ ءالى دە ەسىندە. ول سالعان كارتينالار NIS ART فەستيۆالدارىندا ۇزدىك اتانىپ, بۇگىندە زياتكەرلىك مەكتەپتىڭ ءسانىن كەلتىرىپ تۇر, – دەپ اتاپ ءوتتى اقتوبەدەگى زياتكەرلىك مەكتەپ ديرەكتورىنىڭ ورىنباسارى ايگۇل اسانوۆا.
