ءىس-شارا بارىسىندا ءداستۇر بويىنشا اكادەميا رەكتورى ەرلان ءابىل تۇلەكتەردى قۇتتىقتاپ, جىلى لەبىزىن ءبىلدىردى.
«وزگەرمەلى زامان تالاپتارىنا سايكەس ءبىلىمدى, كاسىبي قۇزىرەتتىلىگى مول, باسەكەگە قابىلەتتى مامانداردى دايارلاۋ ماقساتىندا اكادەميا ءوز تاراپىنان اۋقىمدى جۇمىستار جۇرگىزىپ جاتىر. اكادەميا قابىرعاسىندا العان بىلىمدەرىڭىزبەن ەلىمىزدىڭ وركەندەپ-دامۋىنا ەلەۋلى ۇلەس قوسىپ, مەملەكەتتىك باسقارۋ سالاسىنىڭ بىلىكتى مامانى بولاتىندارىڭىزعا, اكادەميا تۇلەگى مارتەبەسىن بيىك ۇستايتىندارىڭىزعا سەنىمىمىز مول», دەدى رەكتور.
ايتا كەتسەك, بيىل باسقارۋ ينستيتۋتىنىڭ 4 ماگيسترانتى اكادەميا مەن فينليانديانىڭ سەينيايوكي قولدانبالى عىلىمدار ۋنيۆەرسيتەتى اراسىنداعى كەلىسىم بويىنشا قوسديپلومدى باعدارلاما اياسىندا ءبىلىم الىپ كەلدى.
سالتاناتتى ءىس-شارادا مەملەكەتتىك ساياساتتىڭ ۇلتتىق مەكتەبىن تامامداعان ءبىرجان ءالىمجانوۆ اكادەمياعا العىسىن ءبىلدىردى.
«مەملەكەتتىك باسقارۋ اكادەمياسىنىڭ تابالدىرىعىن اتتاعان ساتتە, بارلىعىمىزدا ورتاق ماقسات پايدا بولدى, ول – ءبىلىم مەن بىلىكتىلىگىمىزدى ۇشتاۋ, وقۋدى ابىرويمەن اياقتاۋ. كوزدى اشىپ جۇمعانشا بىزگە بەرىلگەن ۋاقىت اياقتالدى, ماقساتىمىزدىڭ ىسكە اسۋىنا ءبىر عانا قادام قالدى. ءاربىر تۇلەككە العان بىلىمدەرىن حالىق يگىلىگىنە, پايداسىنا جاراتۋىنا تىلەكتەسپىن. قازاقتىڭ قامىن جەۋ, مۇڭ-مۇقتاجىن تۇگەندەۋ, باۋىرعا باسقان ءاربىر بالاسىنىڭ لايىقتى ءومىر سۇرۋىنە جاعداي جاساۋ ءبىزدىڭ – قاتارداعى مەملەكەتتىك قىزمەتشىلەردىڭ, جاڭا بۋىن باسشىلارىنىڭ اسىل مۇراتى. اكادەميادا وقۋمەن قاتار, كۇندەلىكتى كۇيبەڭ, ارپالىس تىرشىلىكتە باعاسىنا جەتە بەرمەيتىن رياسىز دوستىق, شىنايىلىق, ادالدىق, قاراپايىمدىلىق سەكىلدى ادامي قۇندىلىقتاردىڭ مانىمەن قايتا قاۋىشتىق. تەڭەۋمەن ايتسام, ءبىز ءۇشىن اكادەميا - مەملەكەتتىك قىزمەت دەپ اتالاتىن الپاۋىت مۇحيتتا كەزدەسكەن تىنىشتىق ارالى», دەدى تۇلەك.
سالتاناتتى ءىس-شاراعا قر پرەزيدەنتى اكىمشىلىگى مەملەكەتتىك باسقارۋ ءبولىمىنىڭ مەڭگەرۋشىسى التاير احمەتوۆ, قر پرەزيدەنتى اكىمشىلىگىنىڭ سىرتقى ساياسات جانە حالىقارالىق بايلانىستار ءبولىمىنىڭ مەڭگەرۋشىسى داۋلەتبەك قۇسايىنوۆ, قر پرەزيدەنتى اكىمشىلىگىنىڭ مەملەكەتتىك قىزمەت جانە كادر ساياساتى ءبولىمىنىڭ مەڭگەرۋشىسى رۋسلان تۇرعانالى, فينليانديانىڭ قازاقستان رەسپۋبليكاسىنداعى ەلشىسى سويلي مياكەلياينەن-بۋحانيست, قر مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباەۆ, استانا حابىنىڭ مەملەكەتتىك قىزمەت سالاسىنداعى باسقارۋشى كوميتەتىنىڭ توراعاسى ءاليحان بايمەنوۆ, قر ۇكىمەتى اپپاراتى باسشىسىنىڭ ورىنباسارى اسقار بياحمەتوۆ, قر پارلامەنتى ءماجىلىسى توراعاسىنىڭ ورىنباسارى دانيا ەسپاەۆا, قر عىلىم جانە جوعارى ءبىلىم ءمينيسترى ساياسات نۇربەك, قر پارلامەنتى ءماجىلىسىنىڭ ەكس-دەپۋتاتى ەرسۇلتان بەكتۇرعانوۆ قاتىستى.
