بۇقارالىق اقپارات قۇرالدارى قىزمەتكەرلەرىنىڭ كاسىبي مەرەكەسىنە وراي تەلەديدار ارقىلى ەسىمى كوپكە تانىس جۋرناليستەردى كورىپ, سولارداي بولسام دەپ ارمانداپ, سول ارمانى ورگە جەتەلەپ, بۇگىندە اقپارات ايدىنىندا وزىندىك ورنى بار «جۇلدىز FM» راديوسىنىڭ باس رەداكتورى انار مىڭباەۆا تۋرالى اڭگىمەلەمەكپىز.
ء«بىز مەكتەپتە وقىپ جۇرگەندە سول ۋاقىتتاعى قازاق تەلەۆيزياسىنىڭ بەت-بەينەسىن قالىپتاستىرعان قىمبات حانگەلدينا, قىمبات دوسجان, جاينا سلامبەك سەكىلدى تانىمال تەلەجۋرناليستەردى كورىپ, قىزىعاتىنبىز. مەن دە تەلەديداردان حالىقتىڭ الدىندا سويلەسەم دەگەن بالا ارمان بولدى. ول كەزدە جۋرناليستيكانىڭ شىن ءمان-ماعىناسىن تەرەڭ ۇعىنباساق تا, مەكتەپتى بىتىرگەن سوڭ, جۋرناليست بولام دەگەن ماقساتقا نىق بەكىنگەنىم ەسىمدە. بۇنىڭ ۇلكەن جاۋاپكەرشىلىك جانە وزىندىك تاربيە قۇرالى ەكەندىگىنە ۋنيۆەرسيتەتكە وقۋعا تۇسكەننەن كەيىن عانا كوز جەتكىزدىك», دەيدى ارىپتەسىمىز.
اناردىڭ وسى سالاداعى ەڭ العاشقى ەڭبەك جولى ستۋدەنت كەزىندە ەلوردالىق تەلەارنالاردىڭ بىرىندە باستالعان ەدى. دەگەنمەن كەيىن قىزمەت جولى كۇرت وزگەرىپ, راديو سالاسىنا ءبىرجولا بەت بۇردى. «راديوعا جۇرەك قالاۋىممەن كەلدىم دەپ ايتا المايمىن. ءوزىمدى تەلەديداردىڭ ادامىمىن دەپ ساناۋشى ەدىم. بىراق وتباسىن قۇرۋىما بايلانىستى ەلوردادان الماتى قالاسىنا قونىس اۋدارعان سوڭ, وڭتۇستىك استانامىزدان بۇيىرعان العاشقى جۇمىسىم راديو بولدى. دەگەنمەن, راديونىڭ ءبىر سيقىرى بار ما, كىم بىلگەن, بۇرىن-سوڭدى تانىس تا بەيتانىس جاڭا الەمگە ءبىر باس سۇققاننان كەيىن ءوزىمنىڭ جانىما ەڭ جاقىن, كوڭىلىم قالايتىن كاسىبىمنىڭ وسى ەكەنىنە كوزىم جەتتى. سودان بەرى, مىنە, وسى سالادا جۇرگەنىمە 15 جىل بولدى», دەيدى ول.
بۇگىندە جاڭا مەديا قارىشتاپ دامىپ, جان-جاعىن جايپاپ كەلە جاتقان زامان. سوعان بايلانىستى ءداستۇرلى باق-تىڭ ءورىسى بۇرىنعىدان تارىلىپ, وقىرمانى مەن كورەرمەنى ازايعانى بەلگىلى. دەگەنمەن شىنتۋايتىنا كەلسەك, جاڭا مەديانىڭ دامۋى راديو سالاسىنا كەرى اسەرىن تيگىزبەگەنىن, كەرىسىنشە ونىڭ بۇرىنعىدان دا كەڭىرەك تانىمال بولۋىنا تۇرتكى بولعانىن كورىپ وتىرمىز. ويتكەنى راديو باسپاسوزدەن كەيىن ەكىنشى بولىپ ومىرگە كەلگەن كونەكوز بۇقارالىق اقپارات قۇرالى بولعانىنا قاراماستان, قازىرگى كۇنى اقپارات مايدانىنان ءوز ورنىن تاۋىپ, جاڭا مەديا مۇمكىندىكتەرىنىڭ ارقاسىندا تانىمالدىعىن ارتتىرا تۇسكەن.
– راديونىڭ وزگە بۇقارالىق اقپارات قۇرالدارىنان بىرقاتار ايىرماشىلىعى بار, – دەيدى انار مىڭباەۆا. – ماسەلەن, تەلەديداردا جۋرناليست ءوزى كوتەرىپ وتىرعان ماسەلەنى حالىققا جەتكىزۋ ءۇشىن تەك سويلەپ قانا قويماي, ونى ۆيدەو ارقىلى سۇيەمەلدەيتىن بولسا, راديوجۋرناليست مۇنىڭ ءبارىن تەك داۋىسپەن عانا جەتكىزەدى. حالىققا تۇسىنىكتى تىلمەن, مادەنيەتتى دە ناقتى ءارى ىقشام سويلەۋ ارقىلى ويىمىزدى جەتكىزۋىمىز كەرەك. اباي اتامىزدىڭ «تىلگە جەڭىل, جۇرەككە جىلى ءتيىپ, تەپ-تەگىس جۇمىر كەلسىن اينالاسى» دەگەن ءسوزىن راديوجۋرناليستەردىڭ ءسوز قولدانىسىنا قاتىستى ايتساق تا بولادى. تابان استىندا قيىننان قيىستىرىپ ءسوز تابۋ, تىڭدارمانعا جاعاتىن ءارى جاعىمدى داۋىسپەن ادەمى سويلەۋ ءبىلۋ – شەبەرلىكپەن قوسا تاجىريبەنى تالاپ ەتەدى...
اناردىڭ ايتۋىنشا, راديونىڭ ءبىر ارتىقشىلىعى – باسقا باق-تىڭ ءۇنى جەتە قويمايتىن ورىندارعا دا تارالۋ مۇمكىندىگى. ماسەلەن, بۇگىندە كوپ ادام راديونى كوبىنە كولىكتە وتىرىپ تىڭدايدى. كولىك قۇرالدارىنىڭ باسى ءبۇتىن «مونوپوليسىنە» اينالدى دەسەك تە, ارتىق ايتقاندىق ەمەس. ودان بولەك, تابيعات اياسىندا, ساياباقتا, كوشەدە ءجۇرىپ تە راديو تىڭداۋعا بولادى. سوندىقتان ونىڭ اياسى كەڭىرەك ەكەنىنە ءشۇبا جوق.
– راديونىڭ كوپشىلىك كوڭىلىنە جول تابار ەرەكشەلىكتەرىنىڭ ءبىرى – ونداعى كوڭىل كوتەرۋ باعدارلامالارى. مۇنداي حابارلار تەك تىكەلەي ەفيردە وتەتىنى بەلگىلى. سول سەبەپتى بۇل جۋرناليستەردەن ۇلكەن جاۋاپكەرشىلىكتى جانە شەبەرلىكتى, جيناقىلىقتى تالاپ ەتەدى. سەنىڭ مىندەتىڭ – تىڭدارمانداردىڭ كوڭىلىن كوتەرۋ بولعاندىقتان, ءوزىڭنىڭ كوڭىل كۇيىڭ بولماسا دا, ومىرىڭدە قانداي دا ءبىر پروبلەما بولسا دا, ەفيرگە شىعار الدىندا ونىڭ ءبارىن سىرتقا قالدىرۋىڭ قاجەت. ويتكەنى تىڭدارمان جۇرگىزۋشىنىڭ كوڭىلسىز وتىرعانىن, ايتقان سوزدەرىنىڭ شىنايى ەمەستىگىن دە سەزەدى. سول سەبەپتى باسقا دۇنيەنىڭ ءبارىن ۇمىتىپ, ەفيردى تىڭداپ وتىرعان حالىق ءۇشىن ءوز كوڭىل كۇيىن «قۇرباندىققا» شالۋ – ءبىزدىڭ مىندەتىمىز, – دەيدى انار مىڭباەۆا.
