ادىلەتتى قازاقستاننىڭ تىرەگى
وسى ۋاقىتقا دەيىن ءوتىپ جۇرگەن مەملەكەتتىك دەڭگەيدەگى تالاي جيىندى «كوك جاشىك» ارقىلى كورىپ, وندا تالقىلانعان ماسەلەلەردى ەستىپ ءجۇرمىز عوي. «سىرت كوز – سىنشى» دەگەندەي, ودان تىڭ جاڭالىق كۇتىپ, «توسىنسىي» دامەتەتىنىمىز بار ەندى. كەيدە ساعىمىز سىنىپ, بولماسا بالاشا قۋانىپ قالاتىنىمىزدى دا جاسىرمايىق.
قۇرىلتاي تۋرالى بۇرىننان تاريحتان حابارىم بولعانمەن, ونىڭ ءمانى مەن ماڭىزىن ەندى-ەندى عانا ءتۇسىنىپ كەلە جاتقاندايمىن. ءوزىنىڭ باستاۋىن وسىدان ءدال ءبىر جىل بۇرىن قاسيەتتى ۇلىتاۋدان العان القالى جيىن ەندى, مىنە, تۇركى حالىقتارىنىڭ كيەلى شاڭىراعى – تۇرلەنگەن تۇركىستاندا قايتا جالعاستى. ەكى كۇن بويى بىرنەشە تاقىرىپ بويىنشا جان-جاقتى, قىزۋ تالقىلاۋ بولىپ, ويلار ورتاعا سالىندى.
باسىن اشىپ ايتاتىن ماسەلە – بيىلعى قۇرىلتاي سيپاتىنىڭ وزگەشەلىگىمەن, مازمۇنىنىڭ اۋقىمدىلىعىمەن ەرەكشەلەندى. مەملەكەت باسشىسى قاسىم-جومارت توقاەۆتىڭ ۇلتتىق قۇرىلتايدىڭ ەكىنشى وتىرىسىندا سويلەگەن ءسوزىن قوعامنىڭ ءبىر مۇشەسى رەتىندە قىزىعۋشىلىقپەن مۇقيات وقىپ شىقتىم. «ادىلەتتى قازاقستاندى ادال ازاماتتار قۇرادى», دەگەن پرەزيدەنتتىڭ ءسوزى ويىمىزدان شىقتى. ءيا, ادالدىق – اردىڭ ولشەمى, ءومىرىمىزدىڭ بولىنبەس ءبىر بولشەگى. بايقاساڭىز, ادال سوزىنە ەرەكشە ەكپىن بەرىلىپ وتىر. بۇدان ادال دەگەن ءسوزدىڭ قانشالىقتى ماڭىزعا يە ەكەندىگىن ايقىن اڭعارۋعا بولادى.
اسىرەسە, پرەزيدەنتتىڭ مەملەكەتتىك نىشانداردى جەتىلدىرۋ قاجەتتىگى, قازاقستان تاريحىنىڭ كوپتومدىق جيناعىن شىعارۋ, كىتاپ باسىپ شىعارۋ ءىسىن جاقسارتۋ, مەملەكەتتىك ءتىلدى دامىتۋعا باسا ءمان بەرۋ, ت.ب. ماسەلەلەر جونىندەگى ۇسىنىس, پىكىرلەرى ويىمدى ءدوپ باسىپ, كوكەيىمنەن شىقتى.
مەملەكەت باسشىسى ايتقانداي, قازاق ەلىنىڭ ادال ازاماتتارى عانا ادىلەتتى قازاقستاندى قۇرا الادى.
كارىباي امزە ۇلى,
بايىرعى مەملەكەتتىك قىزمەتشى
تۇركىستان وبلىسى
قوسىمشا ءبىلىمنىڭ ماڭىزى
بۇگىندە ەلىمىزدىڭ ءبىلىم بەرۋ سالاسىندا بولىپ جاتقان اۋقىمدى وزگەرىستەر بالانىڭ تۇلعاسىن دامىتۋدى, ونىڭ شىعارماشىلىق قابىلەتتەرىن اشۋدى جانە بولاشاقتا جان-جاقتى دامىعان, باسەكەگە قابىلەتتى تۇلعانى تاربيەلەۋدى تالاپ ەتەدى. وسى ورايدا بالانىڭ شىعارماشىلىق الەۋەتىن دامىتا وتىرىپ, تاربيە جۇمىسىنا ەلەۋلى ۇلەس قوساتىن قوسىمشا ءبىلىم بەرۋدىڭ ماڭىزى زور. قوسىمشا ءبىلىم بەرۋ ۇيىمدارى جالپى ءبىلىم بەرەتىن مەكتەپتەرمەن, باسقا دا مەكەمەلەرىمەن بىرلەسە وتىرىپ, ۇزدىكسىز ءبىلىم بەرۋ جۇيەسىن قۇرايدى.
ءتۇرلى باعىتتا قوسىمشا ءبىلىم بەرۋ سالاعا قاتىستى مەكەمەلەردە, سونىڭ ىشىندە وقۋشىلار ۇيىندە جۇزەگە اسىرىلادى. وسى كۇنى الماتى قالاسى ءبىلىم باسقارماسىنا قاراستى №1 وقۋشىلار ۇيىنە پەداگوگيكا عىلىمدارىنىڭ ماگيسترى ءداۋىرحان قوجاحمەتوۆ باسشىلىق ەتەدى. قوسىمشا ءبىلىم بەرۋ سالاسىنداعى تالاي يگىلىكتى ءىس-شارانىڭ ۇيىتقىسى بولىپ جۇرگەن مەكەمەدە 50 پەداگوگ جەتى باعىت بويىنشا جۇمىس ىستەيدى. ولار: كوركەمدىك-ەستەتيكالىق; ساندىك-قولدانبالى ونەر; تەحنيكالىق; قوعامدىق-گۋمانيتارلىق جانە جاراتىلىستانۋ; تىلدىك; سپورتتىق; ازاماتتىق-پاتريوتتىق تاربيە بەرۋ باعىتتارى.
مەكەمە باسشىسى ۇجىمنىڭ ساپالىق قۇرامىن, عىلىمي الەۋەتىن كوتەرۋگە زور ءمان بەرەدى. اتالعان وقۋشىلار ءۇيى قالاداعى بىرقاتار جوعارى وقۋ ورىندارىمەن, ج.ەلەبەكوۆ اتىنداعى ەسترادا-تسيرك كوللەدجىمەن, نازارباەۆ زياتكەرلىك مەكتەبىمەن, جازۋشىلار وداعىمەن, حالىقارالىق ايتىس اقىندارى مەن جىرشى-تەرمەشىلەر وداعىمەن, الماتى قالاسى بىلىكتىلىكتى ارتتىرۋ ينستيتۋتىمەن, حالىقارالىق وتباسىن دامىتۋ ينستيتۋتىمەن, قالالىق قوسىمشا ءبىلىم بەرۋ مەكەمەلەرىمەن تىعىز بايلانىس ورناتقان. بالالار مەكەمەسى جانىنان قۇرىلعان «رۋحانيات» ورتالىعى وقۋشىلارعا ۇلتتىق تاربيە بەرۋ ماقساتىندا ءارتۇرلى كەزدەسۋلەر ۇيىمداستىرىپ وتىرادى.
№1 وقۋشىلار ۇيىندە ماۋسىم ايىندا جىل سايىن ءداستۇرلى تۇردە مەكتەپالدى «دوستىق» ويىن-ساۋىق الاڭى جۇمىس ىستەيدى. جازعى ويىن-ساۋىق الاڭىنىڭ نەگىزگى ماقساتى – كەلگەن ءار وقۋشىنى جاقسىلىققا, ادامگەرشىلىككە, ۇيىمشىلدىققا تاربيەلەي وتىرىپ, ولاردىڭ جازعى دەمالىس ۋاقىتىن ءتيىمدى پايدالانا بىلۋىنە ۇيرەتۋ.
ا.ءامىروۆا,
وقۋشىلار سارايىنىڭ ءبولىم مەڭگەرۋشىسى
الماتى
كوكشەتاۋداعى ءداستۇرلى پىكىرسايىس
كوكشەتاۋدا جوعارى وقۋ ورنى ستۋدەنتتەرىنىڭ اراسىندا ءداستۇرلى رەسپۋبليكالىق «Shoqan cup» پىكىرسايىس ءتۋرنيرى ءوتتى. ش.ءۋاليحانوۆ اتىنداعى كوكشەتاۋ ۋنيۆەرسيتەتىنىڭ جانىنان قۇرىلعان «زياتكەر» پىكىرسايىس كلۋبى ۇيىمداستىرعان ءىس-شاراعا ەلىمىزدىڭ تۇكپىر-تۇكپىرىنەن كەلگەن تاجىريبەلى پىكىرسايىسشىلار مەن بۇل دۋعا ەندى قوسىلعان جاستار دا قاتىستى.
ەلىمىزدىڭ بارلىق وڭىرىنەن 90-عا جۋىق فراكتسيا تىركەلسە, سولاردىڭ 32-ءسى تىركەۋدەن ءوتتى. پىكىرسايىس الاڭدارىندا الەمدە جانە ەلىمىزدە بولىپ جاتقان ءتۇرلى ساياسي, الەۋمەتتىك-ەكونوميكالىق وقيعالار تۋرالى ساليقالى پىكىرتالاس ءوربىدى. سونداي-اق قازاق تاريحىنداعى باتىرلاردىڭ قوعامدا دارىپتەلۋى, اۋىر قىلمىس جاساعان قىلمىسكەرلەردىڭ جازا وتەۋى, جەلىدەگى قارىم-قاتىناستار, بالالار تاربيەسىندەگى مەكتەپ پەن وتباسى قۇندىلىقتارىنىڭ ءرولى تاقىرىپتارىندا جان-جاقتى اڭگىمە قوزعالدى. جاستاردىڭ بويىندا كوممۋنيكاتيۆتىلىكتى ارتتىرۋ, كوماندادا جۇمىس ىستەي ءبىلۋ سىندى قاسيەتتەردى قالىپتاستىرۋ سياقتى ماڭىزدى ماسەلەلەرگە دە قاتىسۋشى كوماندالار باسا نازار اۋداردى.
ءىس-شارا بارىسىندا ش.ءۋاليحانوۆ ۋنيۆەرسيتەتىنىڭ تالانتتى جاس انشىلەرى مارلەن سارسەنباي ۇلى مەن اراي جاقسىلىق, جاس اقىن مارلەن بەردەنبەك ءوز ونەرلەرىن ورتاعا سالدى. ولاردىڭ ونەرلەرىنە قازىلار القاسى بارىنشا ءادىل باعا بەرۋگە ۇمتىلعانىن دا ايتا كەتكەن ورىندى.
تۋرنير سوڭىندا ءۇش كوماندا جەڭىمپاز جانە جۇلدەگەرلەر رەتىندە اقشالاي سىيلىقپەن ماراپاتتالدى. سونىمەن قاتار پىكىرسايىسقا بەلسەندى قاتىسۋشىلار مەن ۇيىمداستىرۋشىلار دا «ۇزدىك گيد», «ۇزدىك دەلەگاتسيا», «ۇزدىك پوست», «ۇزدىك تورەشى», «ۇزدىك سپيكەر», «ۇزدىك فراكتسيا» اتالىمدارى بويىنشا ماراپاتتارعا يە بولدى.
ال پىكىرسايىس تۋرنيرلەرىنىڭ ءجيى وتكىزىلۋى جاستاردىڭ ساياسي كوزقاراستارىنىڭ دۇرىس قالىپتاسۋىنا وڭ اسەر ەتەتىنى كۇمانسىز.
مافتۋنا ناجيەۆا,
ش.ءۋاليحانوۆ اتىنداعى
كوكشەتاۋ ۋنيۆەرسيتەتىنىڭ ستۋدەنتى
اقمولا وبلىسى
