الەۋمەتتىك كودەكس تۋعاننان باستاپ كامەلەتتىك جاسقا جەتكەنگە دەيىن الەۋمەتتىك قولداۋ كورسەتۋ, جۇمىسقا ورنالاستىرۋ, ەڭبەك قاۋىپسىزدىگى, الەۋمەتتىك ساقتاندىرۋ, قيىن ومىرلىك جاعداي كەزىندە كومەك كورسەتۋ, قارتتاردى قولداۋ جانە ت.ب. ماسەلەلەردى قامتيدى.
ءمينيستردىڭ بايانداۋىنشا, انا مەن بالانى الەۋمەتتىك قورعاۋدى كۇشەيتۋ ماقساتىندا بىرقاتار قوسىمشا شارا قاراستىرىلدى. ماسەلەن, جىل باسىنان بەرى بالا كۇتىمى بويىنشا بەرىلەتىن تولەم مەرزىمى 1,5 جاسقا دەيىن ۇلعايتىلدى. بۇگىنگى تاڭدا 450 مىڭنان استام وتباسى اتالعان كومەكتى الدى.
1 شىلدەدەن باستاپ «التىن القا», I جانە II دارەجەلى «انا داڭقى» وردەنىمەن ماراپاتتالعان, «باتىر انا» اتاعى بار كوپبالالى انالارعا تولەنەتىن جاردەماقى مولشەرى دە ۇلعايادى. بۇل شارامەن 90 مىڭعا جۋىق ايەل قامتىلماق.
سونداي-اق كودەكستە مۇگەدەكتىگى بار ازاماتتارعا كوپ كوڭىل ءبولىندى. اتاپ ايتقاندا, مۇگەدەكتەرگە, ولاردىڭ قامقورشىلارىنا جانە اسىراۋشىسىنان ايىرىلعان وتباسىلارعا تولەنەتىن جاردەماقى مولشەرى 14,5%-عا ارتادى. جاردەماقى مولشەرىنىڭ جىل باسىندا 8,5%-عا ۇلعايعانىن ەسكەرە وتىرىپ, تولەمدەر سوماسى جالپى 23%-عا وسپەك.
جالپى جاڭا الەۋمەتتىك كودەكستىڭ وسى جانە باسقا دا كوپتەگەن نورماسى ازاماتتاردىڭ ءال-اۋقاتىن ارتتىرۋعا جانە الەۋمەتتىك تاۋەكەلدەردىڭ الدىن الۋعا باعىتتالعان.
