قازىرگى جۇسىپبەك ايماۋىت ۇلى اتىنداعى اۋىل ورنالاسقان اۋماق كەزىندە «جوسالى» دەپ اتالعان. بۇل جەر توپىراعى قىزعىلت-سارعىش كەلەتىنىنە وراي جوسالى دەپ اتالسا كەرەك. اۋماقتا كەزىندە اعىلشىندار قازعان كومىر, التىن, كۇمىس, موليبدەن كەنىشتەرى بار. اعىلشىندار جەرگىلىكتى جاتاقتاردى جۇمىسشى ەسەبىندە پايدالانعانى ءمالىم. كەنىشتى بويلاي قونعان قازاق اۋىلى كوپ بولعان. ونىڭ بارلىعى قىزىلتاۋ بولىسىنىڭ يەلىگىندەگى ەلدى مەكەندەر سانالعان. الگى كەنىشتەن قازىرگى پاۆلودار وبلىسىنىڭ اقسۋ قالاسىنا دەيىن رەلستى جول سالىنىپ, كەن سونداعى كەمە ايلاعىنا تاسىلعان.
باياناۋىلدىق ولكەتانۋشى رامازان نۇرعاليەۆتىڭ ايتۋىنشا, سول ۋاقىتتا پايدا بولعان جۇمىسشىلار كەنتى «كومىر» دەپ اتالعان. اۋىلدىڭ جانىنداعى توبەگە اعىلشىندار كادىمگى تاستان ءورىپ, سۋ مۇناراسىن تۇرعىزادى. بيىكتىگى 3-4 قاباتتى ۇيمەن تەڭ عيماراتتىڭ گەومەتريالىق دالدىكپەن سالىنعانى تاڭعالدىرادى. قانشاما جىل وتسە دە, ءبىر تاسى قوزعالماعان. «سۋ مۇناراسىنىڭ سالىنعانىنا شامامەن ءبىر جارىم عاسىرداي ۋاقىت ءوتتى دەپ شامالانادى. كەيىن كەڭەس وكىمەتى جىلدارى مۇنارا تولىققاندى جۇمىس ىستەپ, جەرگىلىكتى ۇجىمشاردى اۋىز سۋمەن قامتاماسىز ەتكەن. مۇنارا توبەسىندەگى قاناتتى بەتون قۇيمالاردىڭ ءالى كۇنگە اجىراماي, باستاپقى قالپىن ساقتاپ تۇرعانىنا تاڭىمىز بار. عيمارات ەسكىلىگىنە قاراماستان كۇيىن بۇزباعان. ال ودان ارىرەكتە اعىلشىندار كومىرمەن جۇمىس ىستەيتىن ەلەكتر ستانساسىن دا تۇرعىزعان. ونىڭ جارىعى جۇمىسشىلار كەنتىنە عانا ەمەس, كومىر كەنىشتەرىنە جەتكىزىلگەن. قازىر بۇل نىساننىڭ قاڭقاسى عانا ساقتالىپ تۇر», دەيدى ول.
پاۆلودار وبلىسى,
باياناۋىل اۋدانى,
جۇسىپبەك ايماۋىت ۇلى اۋىلى
