ساباق جەلتوقسان ايىنىڭ باسىندا باستالىپ, جۋرناليستيكا مەن فيلولوگيا فاكۋلتەتىنە تۇسكىسى كەلگەندەر بىرگە وقىدىق. وقيتىن جەرىمىز – 28 پانفيلوۆشىلار ساياباعى ماڭىنداعى زاڭ فاكۋلتەتىنىڭ عيماراتى. سونىمەن 8-9 اي تىڭداۋشىلار ساناتىنان تابىلىپ, 1975 جىلدىڭ جايدارى جازىندا ايگىلى ۋنيۆەرسيتەت تابالدىرىعىن ستۋدەنت رەتىندە ابىرويمەن اتتادىق. كەيدە وزىمىزشە ء«بىز كازگۋ-دە بەس جىل ەمەس, التى جىل وقىعانبىز» دەپ قالجىڭعا سالىپ «كەۋدەمىزدى قاتتى سوعىپ» جەلپىنىپ سويلەيتىنىمىز دە بار...
دايىندىق ءبولىمىنىڭ دەكانى ءتىلشى عالىم, مارقۇم تالعات سايرامباەۆ ەدى. ول كىسى ازىلدەسكەندى جاقسى كورەتىن.ءاردايىم الدەبىر قىزىقتى جايدى اسەرلى اڭگىمەلەپ, ءوزى دە قارق-قارق كۇلەتىن, ءسويتىپ, ءبارىمىزدى دە ءماز-مەيرام ەتەتىن.
سول تۇستا «كازگۋگراد» قالاشىعىنىڭ قۇرىلىسى قارقىندى جۇرگىزىلىپ جاتقان-دى. سول جەتپىس ءتورتتىڭ جەلتوقسان ايىنىڭ اياعىندا ونداعى العاشقى ستۋدەنتتەر جاتاقحاناسى پايدالانۋعا بەرىلىپ, الماتىنىڭ ءار تۇكپىرىن پانالاپ جۇرگەن دايىندىق ءبولىمىنىڭ تىڭداۋشىلارى سوعان «كوشىرىلدى». «قالاشىقتاعى ءبىرىنشى بىتكەن جاتاقحاناعا ءبىز بارىپ ورنالاسقانبىز», دەپ تە ماقتانىپ قويامىز كۋرستاستار باس قوسقاندا.
دايىندىق بولىمىندە بىزگە اتاقتى پروفەسسور, عىلىم دوكتورى قايىرجان بەكحوجين, بەلگىلى ءتىلشى-عالىم مىرزاتاي سەرعاليەۆ, ەجەلگى ادەبيەت پروفەسسورى الما قىراۋباەۆا سىندى مىقتىلار ساباق بەرىپ, ءدارىس وقىدى.
مىنا 1975 جىلى تۇسىرىلگەن سۋرەتتە جۋرناليستيكا جانە فيلولوگيا فاكۋلتەتىنە تۇسۋگە تالاپكەر ءبىر توپ تىڭداۋشى بەينەلەنگەن. ارامىزدا ەكى-ءۇش زاڭ فاكۋلتەتىنەن كەلگەندەر دە بار. ورتادا وتىرعاندار الما قىراۋباەۆا (وڭنان سولعا قاراي), قايىرجان بەكحوجين جانە جۋرفاكتىڭ وقىتۋشىسى قويانبەك احمەتوۆ.
سۋرەتتەگىلەردىڭ ىشىندە كەيىننەن بەلگىلى قازاق اقىنى اتانعان مارقۇم دوسىمىز – امانحان ءالىم, سونداي-اق «ەگەمەن قازاقستاندا» ەڭبەك ەتكەن ءۇش بىردەي كۋرستاسىمىز – ساياسات بەيىسباي, ءومىر ەسقالي, ساتىبالدى ءساۋىرباي دا تۇر.
بەرىكباي قادىقوۆ,
قازاقستاننىڭ قۇرمەتتى ءجۋرناليسى,
قاراساي اۋدانىنىڭ قۇرمەتتى ازاماتى
الماتى وبلىسى
