قازاق رۋحانياتى تاعى دا ءبىر تاڭعاجايىپ كىتاپپەن تولىقتى.
اتالمىش باسىلىم – ايەل زاتىن شابىتتاندىرىپ قانا قويمايدى, سونىمەن قاتار ءوزى ايتىپ جۇرگەن وتىرىكتەرگە سەنبەۋدى ۇيرەتەدى. 2019 جىلى اقش-تاعى ەڭ كوپ وقىلعان ۇزدىك ءۇش كىتاپتىڭ ءبىرى بولعان رەيچەل ءحولليستىڭ «Cirl, wash your face» اتتى موتيۆاتسيالىق كىتابى ەندى قازاق تىلىندە ساۋاتتى كونتەنت دايىندايتىن «Alqa publishing» باسپاسىنان جارىق كورىپ وتىر.
رەيچەل حولليس ء«اي, قىز, كوزىڭدى اش» كىتابىندا كەز كەلگەن ايەلدىڭ ءتىپتى ەڭ جاقىن قۇربىسىنا ايتۋعا باتىلى بارمايتىن سىرىن اشادى. ايەلدەردىڭ ءومىرىن ۋلاپ كەلگەن 20 وتىرىكتى ءتىزىپ, ولارمەن كۇرەسۋدىڭ جولىن ويناقى, كۇلكىلى, ەڭ باستىسى – جۇرەككە جىلى تيەر مەيىرىمدى وقيعالار ارقىلى سۋرەتتەيدى.
جيىن بارىسىندا ءسوز العان كىتاپتىڭ اۋدارماشىسى ميرا سەمباي: «كىتاپتى اۋدارىپ وتىرىپ, رەيچەل سيپاتتاعان ءاربىر وتىرىكتەن ءوزىمدى كوردىم, اينالامداعى قانشاما ايەلدىڭ ءومىر بويى وزىنە وتىرىك ايتىپ جۇرگەنىن ءتۇسىندىم. رەيچەل اقىل ايتاتىن كەيبىر ادامدار مەن كىتاپتار سەكىلدى ء«وزىڭدى عانا ءسۇي», «جاقىندارىڭا ەسەپ بەرمە» دەپ بوس ۇراندامايدى. ءوزىڭدى جاقىندارىڭنىڭ, دوستارىڭ مەن تۋىستارىڭنىڭ, جولداسىڭ مەن بالا-شاعاڭنىڭ ورتاسىندا ك ۇلىپ-ويناپ ءجۇرىپ دامىت, جاقسى كور, ارمانىڭا جەت!» دەپ جول سىلتەيدى. بۇل كىتاپتى ايەلدەردىڭ ءبارى مىندەتتى تۇردە وقىپ شىعۋى كەرەك!», دەپ زالعا جينالعان قالىڭ كوپشىلىكتىڭ كىتاپقا دەگەن قىزىعۋشىلىعىن ارتتىردى.
ايتا كەتەيىك, سالتاناتتى شاراعا پودكاستەر اينەل ءامىرحان, پسيحواناليتيك سايا باقيموۆا, باق وكىلدەرى, سونىمەن قاتار وزگەرىسكە جانى قۇمار, كىتاپسۇيەر قىز-كەلىنشەكتەر قاتىستى.
كەش قوناعى جۋرناليست, پودكاستەر اينەل ءامىرحان ايتۋلى شارادا ايەل زاتىنىڭ قاشان دا زامان كوشىنەن قالماي, جۇمىس پەن وتباسىن قاتار الىپ جۇرەتىن, باتىل دا قايسار, نازىك تە وجەت بولا الاتىن تاباندىلىعى ءۇشىن باس يەتىنىن ايتتى. ال پسيحواناليتيك سايا باقيموۆا كۇندەلىكتى كۇيبەڭ تىرلىكپەن اينالىساتىن قىز-كەلىنشەكتەردىڭ جىگەرىن وياتىپ, كوكەيدە جۇرگەن سان ساۋالىنا جاۋاپ بەردى.
ەسكە سالا كەتەيىك, «Alqa publishing» باسپاسى – 2022 جىلى اشىلعان. اتالمىش كونتەنت ءۇيى – ايەلدەر تاقىرىبىن تەرەڭ قاۋزاپ, قازاق قىز-كەلىنشەكتەرىنىڭ تۇلعالىق دامۋى ءۇشىن الەمدىك تۋىندىلاردى انا تىلىنە اۋدارىپ, وقىرمانعا جەتكىزۋ ارقىلى قوعامدى, جاس ۇرپاقتى ىزگىلەندىرۋگە ۇلەس قوسۋدى ماقسات ەتكەن.
شىنايى ءومىردىڭ كورىنىسى بوياماسىز, بۇكپەسىز بەرىلگەن اۆتوردىڭ ءومىرى تۋرالى بۇل كىتاپتىڭ مازمۇنى – شاراعا قاتىسقان ءاربىر قوناقتى قاناتتاندىردى. كەش سوڭىنا قاراي جيىن قاتىسۋشىلارى تۇساۋكەسەرگە اكەلىنگەن كىتاپتاردى ساتىپ الىپ, ەستەلىك سۋرەتكە ءتۇستى.
