پالاتا سپيكەرى قازاقستاننىڭ رۋحاني ومىرىندە ءداستۇرلى پراۆوسلاۆيەلىك حريستياندىق ەلەۋلى ءرول اتقاراتىنىن اتاپ ءوتتى. ەلىمىزدەگى پراۆوسلاۆتار قوعامدىق ومىرگە بەلسەندى ارالاسىپ, حالىقتىڭ بىرلىگىن بەكەمدەۋگە جانە دىنارالىق كەلىسىم مەن بەيبىتشىلىكتى نىعايتۋعا ءوز ۇلەستەرىن قوسىپ كەلە جاتقانى دا ءسوز بولدى.
سونىمەن قاتار سەنات توراعاسى بيىل الەمدىك جانە ءداستۇرلى دىندەر ليدەرلەرىنىڭ ءبىرىنشى سەزى وتكىزىلگەنىنە 20 جىل تولاتىنىنا نازار اۋداردى. ول سوعان بايلانىستى بيىل 11 قازاندا استانادا سەزد حاتشىلىعىنىڭ مەرەيتويلىق وتىرىسىن وتكىزۋ جوسپارلانىپ وتىرعانىن ايتتى. اتالعان وتىرىستا سەزدى دامىتۋدىڭ 2023-2033 جىلدارعا ارنالعان تۇجىرىمداماسى قارالماق. قۇجاتتى ازىرلەۋ مەملەكەت باسشىسىنىڭ تاپسىرماسى بويىنشا قولعا الىندى.
سونداي-اق كەزدەسۋ بارىسىندا رۋحاني ديپلوماتيانى ودان ءارى جانداندىرۋ جانە ءدىن كوشباسشىلارىنىڭ بۇگىنگى پروبلەمالار مەن سىن-قاتەرلەردى شەشۋدەگى ءرولى دە سۇحباتقا ارقاۋ بولدى.
