سۋرەت اۆتورى ماقسات شاعىرباي
قر جامبى اتۋ فەدەراتسياسى ات ۇستىندە ساداق اتۋ ونەرىندەگى تاريحي ءداستۇردى قايتا جاڭعىرتىپ, چەمپيوناتتان تىس ات قىلىنا بايلانعان تايتۇياقتى نىساناعا تىككەن بولاتىن.
حالىقارالىق دەڭگەيدە ەل نامىسىن قورعاپ جۇرگەن ەرەسەك مەرگەندەرىمىزدىڭ ءوزى ءمۇلت كەتىپ, تۇڭعىش تايتۇياقتىڭ يەسى انىقتالماي, فەدەراتسيا تاراپىنان تاعايىندالعان 300 000 تەڭگە جۇلدەسىمەن قوسا كەلەسى جارىسقا قالادى دەگەن بولجامدار ايتىلعان ەدى.
ەرەسەكتەردەن كەيىن, جاستار اراسىنداعى ەل چەمپيوندارى دا تايتۇياققا جەبەلەرىن تيگىزە المادى.
جارىستىڭ سوڭعى كۇندەرىندە اتقا قونعان جاسوسپىرىمدەرگە دە مۇمكىندىك بەرىلدى. بۇعاناسى قاتپاسا دا, ات ۇستىندەگى بالا مەرگەندەردىڭ اراسىنان قاراعاندىلىق نۇراسىل ورالحان ات قىلىنا بايلانعان تايتۇياققا جەبەسىن ءدال تيگىزىپ, تاريحي رەكورد ورناتتى.
تايتۇياقتىڭ ديامەترى - 10*10, سالماعى - 318 گر, فارفوردان قۇيىلعان, 4 مەتر بيىكتىكتە ات قىلىنا بايلانعان. مەرگەندەر اتپەن 120 مەتر قاشىقتىقتا شاۋىپ ءوتىپ نىسانانى كوزدەدى.
سونداي-اق وسىعان دەيىن جامبىشىلار «قازاق», «تۇرىك», «كورەي» ستيلدەرىندە اتىپ, ءۇش نىسانانىڭ جيىنتىعىندا جەڭىمپاز انىقتالاتىن. بيىلعى چەمپيوناتتا ءۇش نىسانا بويىنشا ءۇش بولەك ورىندار مەن جەڭىمپازدار انىقتالىپ, ۇلتتىق قۇراما مۇشەلەرىنىڭ سانى ءۇش ەسەگە ارتتى.
جامبى اتۋدان قر چەمپيوناتىنىڭ قورىتىندىسى بويىنشا ەرەسەكتەر اراسىندا جامبىل وبلىسى, جاستار مەن جاسوسپىرىمدەر اراسىندا تۇركىستان وبلىسى ۇزدىك اتاندى.
اتالعان چەمپيوناتتى قر مسم سپورت جانە دەنە شىنىقتىرۋ كوميتەتى, قر ۇلتتىق سپورت قاۋىمداستىعى, قر جامبى اتۋ فەدەراتسياسى مەن اقمولا وبلىسىنىڭ اكىمدىگى ۇيىمداستىردى. چەمپيوناتتىڭ جەڭىمپازدارى مەن جۇلدەگەرلەرىنە قر ۇلتتىق سپورت قاۋىمداستىعى تاعايىنداعان 3 675 000 تەڭگە جۇلدە قورى تابىستالدى.
ات ۇستىندەگى مەرگەندەر 27 ماۋسىم كۇنى ۆەنگريانىڭ پوماز قالاسىندا وتەتىن الەم كۋبوگىنە دايىندىق ۇستىندە. ەل نامىسىن ەرالحان ايكوز, باقداۋلەت باباجان, باتىر بەكساۋىت, ماديار شارىپباەۆ سىندى مەرگەندەر قورعايدى.
