ۇلتتىق قۇرىلتايدىڭ تاريحي ماڭىزى زور ايماقتاردا ءوتۋى – ەجەلگى ءداستۇردىڭ جاڭعىرۋى. تۇركىستاندا ەلدىك ماسەلەلەر قوزعالىپ, ناقتى شەشىمدەر قابىلداندى.
تاريحىمىزدا ۇلت ۇستىندارىنىڭ كۇلتوبە, مارتوبە مەن ورداباسىدا جينالىپ, كەڭەس قۇرعانى بەلگىلى. بىلتىر ۇلىتاۋدا باستالىپ, اراعا جىل سالىپ تۇركىستاندا جالعاسىن تاپقان ۇلتتىق قۇرىلتاي ءساتتى ءوتتى.
پرەزيدەنت ءوز سوزىندە ء«ابىش كەكىلباەۆ «قازاق رۋحىنىڭ قاعباسى», دەپ اتاعان ورداباسى وسى جەرگە ءتيىپ تۇر. وسىناۋ ايگىلى توبەلەردە حالقىمىزدىڭ يگى جاقسىلارى سان رەت باس قوسقان. بولاشاقتا دا وسى مارتەبەلى ميسسياسىن اتقارا بەرەدى», دەپ بۇل ىستەردى ۇيلەستىرۋ مىندەتى مەن جاۋاپكەرشىلىگى ءوڭىردى باسقارۋشى ازاماتتارعا جۇكتەلەتىنىن باسا ايتتى. سونداي-اق قوجا احمەت ياساۋي كەسەنەسىنە ۇلتتىق مادەني-تاريحي ەسكەرتكىش مارتەبەسىن بەرۋ تۋرالى ەنگىزىلگەن ۇسىنىستى قولدايتىنىن ءبىلدىردى.
مەملەكەت باسشىسى ۇلتتىق قۇرىلتايدىڭ ەكىنشى وتىرىسىنا «ادىلەتتى قازاقستان – ادال ازامات» اتاۋدىڭ بەرىلۋ ءمانى بار ەكەنىن اتاپ ءوتتى. «ادىلەتتى قازاقستان» مەن ادال قىزمەت ەتۋ – ەگىز ۇعىم. جۋىردا ورىن العان زاردابى مول وقيعانى تىلگە تيەك ەتىپ, ءبىز ءۇشىن ساباق بولعانىن جەتكىزدى. اۋىر سىناقتاردى تەك بىرلىك ارقىلى جەڭەتىنىمىزدىڭ تاعى ءبىر ايعاعى بولدى.
ازاماتتاردىڭ سانا-سەزىمى جاڭعىرماي رەفورما نەمەسە باستامانى ىسكە استى دەۋ بەكەر ەكەنىن دە ءسوز ەتتى. راسىمەن ازاماتتاردىڭ دۇنيەتانىمى, ۇستانىمى مەن پيعىلى ءبىر ارنادا توعىسپاسا جانە وزگەرمەسە ناتيجە كۇتۋ دە بوس ءسوز. مەملەكەت پەن قوعام ورتاق ىسكە جۇمىلعاندا عانا ومىرشەڭ يدەولوگيا قالىپتاسا باستايدى.
ق.توقاەۆ ورتاعا سالعان ماسەلەلەر جانە نەگىزگى باعىتتاردى شەشىمدەرىمەن بىرگە مالىمدەدى. ەڭ اۋەلى مەملەكەتتىك نىشانداردىڭ الار ورنىنا توقتالىپ, ايماقتىق نىشانداردى بىركەلكى ەتىپ رەتكە كەلتىرۋدى تاپسىردى. مەملەكەتتىك ناگرادالاردى بەرۋدە حالىقتىڭ ىقىلاسى ەسكەرىلىپ, تاريحي تۇلعالارىمىز ءال-فارابي, اباي, احمەت بايتۇرسىن ۇلى اتىنداعى سىيلىقتار بەرىلەدى. رەسپۋبليكادا ەندى «ەڭبەك كۇنىنە» وراي ەڭ ۇزدىك ماماندار مەملەكەتتىك دەڭگەيدە ۇلىقتالادى.
پرەزيدەنت قوجا احمەت ءياساۋيدىڭ تۋعانىنا 930 جىل تولۋىنا وراي, «ياساۋيتانۋ» عىلىمي ورتالىعىن نەمەسە ينستيتۋتىن قۇرۋ باستاماسىن كوتەردى. بۇل شەشىم عۇلامانىڭ تۇركى حالىقتارىنا قالدىرعان ەڭبەگىنە جاسالاتىن قۇرمەت دەپ ەسەپتەيمىن. جاعىمدى جاڭالىق مۇنىمەن بىتكەن جوق. پرەزيدەنت جاقىندا مارال يشاننىڭ كەنەسارى حانعا سىيلاعان قۇرانى تابىلعانى تۋرالى اقپاراتپەن ءبولىستى. ەكى عاسىر بويى قولدان-قولعا كوشكەن قۇران قالپىنا كەلتىرىلگەن سوڭ قوجا احمەت ياساۋي كەسەنەسىنە قويىلعانى ءجون دەگەن بايلامعا كەلىپتى. مەملەكەت باسشىسى: «بۇل وقيعا قازاقستاننىڭ جاڭا ءداۋىرىنىڭ بەرەكەلى باستاۋى بولسىن دەپ تىلەيىك», دەپ جاقسى ىرىمعا بالادى.
قازاقستاندا بۇعان دەيىن ءتۇرلى سپورتتىق وليمپيادالار ءوتتى. دەگەنمەن ۇلتتىق سپورتتى ناسيحاتتايتىن جارىستار ۇيىمداستىرىلماعان ەدى. 2024 جىلى ەلىمىزدە V دۇنيەجۇزىلىك كوشپەلىلەر ويىندارى وتەدى. بۇل سايىسقا تۇركىستان وبلىسىنىڭ سپورتشىلارى قاتىسادى.
ۇلتتىق قۇرىلتايدا اقپاراتتىق ساياسات, كينو ءوندىرىسى, ارحيۆ ءىسى, بالالار كىتاپحاناسى باعدارلاماسى, شەكارالاس اۋدانداردى قالپىنا كەلتىرۋ جانە اۋىلداردى دامىتۋ جايىندا تاپسىرمالار جۇكتەلدى. «پرەزيدەنت – اۋليە ەمەس, حالىقتان بيىك تۇلعا ەمەس», دەگەن ق.توقاەۆ ءوزىن ماداقتاۋدان گورى مەملەكەت پەن حالىق مۇددەسى ءۇشىن ادال قىزمەت ەتۋ كەرەكتىگىن ەسكەرتتى.
بەيسەن تاجىباەۆ,
تۇركىستان وبلىسى اكىمىنىڭ ورىنباسارى
