ەلىمىزدىڭ ۇلتتىق بىرەگەيلىگى مەن قۇندىلىقتارىنا ارنالعان تۇركىستانداعى ەكىنشى ۇلتتىق قۇرىلتايدا مەملەكەت باسشىسى قاسىم-جومارت توقاەۆ جاڭا بولمىستى ورنىقتىرۋعا بايلانىستى ستراتەگيالىق ۇستانىمداردى ايتتى.
ۇلتتىڭ جاڭا بولمىسىن قالىپتاستىرىپ, دامىتۋ جولىندا وسكەلەڭ ۇرپاقتىڭ بويىندا ادامگەرشىلىك, بىلىمپازدىق, ەڭبەكقورلىق سياقتى قاسيەتتەردى تەمىرقازىق ەتۋ وزەكتى. مەملەكەت باسشىسى ديزاين كود ارقىلى مەملەكەتتىك نىشانداردى جەتىلدىرۋ, ۇلتىمىزدىڭ تاريحي ساناسىن جاڭعىرتۋ, مادەني مۇرامىزدى ساقتاپ, ناسيحاتتاۋ باعىتتارىن ەرەكشە ايتىپ ءوتتى. وسىعان بايلانىستى قايتالانباس قاستەرلى تاريحىمىزدىڭ كوپتومدىق جيناعىن كەلەر جىلى اياقتاۋدى تاپسىردى. ول بارشا ازاماتتارىمىز ءۇشىن وقۋدا وتە تارتىمدى بولۋى شارت ەكەندىگىنە توقتالدى. «بايبارىس» وردەنىن ەنگىزۋ تۋرالى ۇسىنىس جاسادى.
پرەزيدەنت قاسىم-جومارت توقاەۆ قۇرىلتايدا جاس بۋىننىڭ تاربيەسىنە بايلانىستى دا قۇندى ويلارىن جاريا ەتتى. «تاۋەلسىز قازاقستاندا رۋحى ازات, كوزى اشىق, كوكىرەگى وياۋ ۇرپاق ءوسىپ كەلەدى. ولار عىلىم-ءبىلىم, مۋزىكا, كينو, سپورت جانە باسقا دا سالالاردا تابىسقا جەتىپ, بۇكىل الەمگە تانىمال بولا باستادى. جاستارىمىز تۋعان جەردىڭ قايتالانباس ەرەكشەلىگىن جانە تۋعان ەلدىڭ بىرەگەي بولمىسىن جەر جۇزىنە تانىتىپ ءجۇر», دەپ جاستاردىڭ بويىنداعى پاتريوتتىق سەزىمدەرىنىڭ رولىنە ەرەكشە ءمان بەردى.
بۇگىنگى جاستار – ۇلتىمىزدىڭ ەرتەڭگى بولمىسى. سوندىقتان بالالارىمىزدىڭ ادال, تاربيەلى, ءبىلىمدى, دەنساۋلىعى مىقتى, سانالى دا سالاماتتى ەڭبەككە دەگەن قۇلشىنىسى جوعارى ازامات بولىپ قالىپتاسىپ, ادامگەرشىلىك جانە مورالدىق قابىلەتتەرى دامۋى اسا ماڭىزدى. وسى جولدا اتا-انالار قوعامداستىعى, مەكتەپ جانە بۇكىل قوعام بولىپ تاربيە جۇمىسىن جەتىلدىرۋگە كۇش سالۋىمىز قاجەت. مەملەكەت باسشىسى قاسىم-جومارت كەمەل ۇلى تاربيە جۇمىسىنىڭ باسىمدىعىن ايقىنداي وتىرىپ, «بالالار كىتاپحاناسى» اتتى جاڭا باعدارلامانى ورىنداۋدى تاپسىردى. مەملەكەتتىك باسقارۋ تەتىگىندەگى جاڭا باعىتتاردى جۇيەلى دامىتۋ, اقپارات ساياساتىنىڭ تيىمدىلىگىن ارتتىرۋ, كرەاتيۆتى يندۋستريانىڭ يننوۆاتسيالىق تەحنولوگيالارىن دامىتۋداعى ءرولىن, مەملەكەتتىك ساياساتتا تالداۋ, ساراپتاما جاساۋ قىزمەتىن ساپالى جۇرگىزۋگە بايلانىستى جۇيەلى ءادىس-تاسىلدەردى دامىتۋ قاجەتتىلىگىن اتاپ ءوتتى.
پرەزيدەنتىمىز كىتاپتار مەن باسىلىمداردى – يدەولوگيانىڭ نەگىزگى باعىتتارى رەتىندە ايقىندادى. جازۋشىلار وداعىنىڭ ەرەكشە رولىنە توقتالدى. سونداي-اق 24 ساعات جۇمىس ىستەيتىن پرەزيدەنت كىتاپحاناسىن اشۋ قاجەتتىگى تۋرالى ايتتى.
اۋىل مەكتەپتەرىنىڭ دامۋىن ءبىلىم سالاسىنىڭ ناقتى ستراتەگيالىق باعىتى رەتىندە ايقىندادى. شەكارا ماڭىنداعى اۋىلداردىڭ الەۋەتىن ارتتىرۋدا كاتونقاراعاي, مارقاكول, ماقانشى اۋداندارىن قالپىنا كەلتىرۋ تۋرالى باستاما كوتەردى.
ۇلتتىق قۇرىلتاي ەلىمىزدىڭ ەندىگى دامۋىنا جاڭا يدەولوگيالىق نەگىز بولار شەشىمدەر ايقىندالعان جيىن بولدى. پرەزيدەنت ەگەمەن ەلىمىزدى نىعايتۋعا ۇسىنعان باعدارىن ورنىقتىرۋ جولىندا ۇلەس قوسۋعا دايار ەكەنىمىزدى اتاپ وتەمىن. بارلىق قوعام وكىلىن وسى جولدا تاباندى ەڭبەك ەتۋگە شاقىرامىن.
جۇلدىز سۇلەيمەنوۆا,
ءماجىلىس دەپۋتاتى
