اتىراۋ وبلىسىنىڭ اكىمى سەرىك شاپكەنوۆتىڭ مالىمەتىنە سۇيەنسەك, كاسپي تەڭىزىنەن, جايىق جانە قيعاش وزەندەرىنەن 14 323 توننا بالىق اۋلانعان. ونىڭ 13,2 مىڭ تونناسى وڭدەلىپ, 12,7 مىڭ توننا ءونىم ازەربايجان, يزرايل, رەسەي فەدەراتسياسىنا, وزگە دە شەت مەملەكەتتەرگە ەكسپورتتالعان.
– جىل سايىن جايىق وزەنىنە بەكىرە تۇقىمداس بالىقتار قورىن ساقتاۋ جانە ءوسىمىن مولايتۋ ماقساتىندا وسىرىلگەن 8 ملن شاباق جىبەرىلەدى. جايىق جانە قيعاش وزەنىنە 2017-2021 جىلدارى ارالىعىندا 169 شاقىرىم ءتۇپ تەرەڭدەتۋ جۇمىستارى جۇرگىزىلدى. ەندى 2022-2026 جىلدارى اتالعان سۋ ايدىندارىنىڭ 295 شاقىرىم ءتۇبى قازىلادى. براكونەرلىككە قارسى كۇرەستى كۇشەيتۋ ءۇشىن جايىق-كاسپي وبلىسارالىق بالىق شارۋاشىلىعى ينسپەكتسياسىنا 2019-2021 جىلدارى جىلدام جۇرەتىن 10 «Corvet 600» كاتەرى, 10 «Mercury 200» ماركالى اسپالى موتورى, 1 بران-ۆاحتا, 9 اۆتوكولىك ساتىپ الىندى, – دەيدى س.شاپكەنوۆ.
اكىمنىڭ دەرەگىنە قاراعاندا, تاۋارلى بالىق ءوسىرۋ ءىسى قارقىن العالى وتىر. وسى ورايدا 2025 جىلعا دەيىن 16,3 ملرد تەڭگەنى قۇرايتىن 9 ينۆەستيتسيالىق جوبانى جۇزەگە اسىرۋ جوسپارلانعان. ونىڭ ىشىندە بالىق ءوسىرۋدى قولعا الاتىن 8 كاسىپورىن اشىلادى. بالىق وڭدەيتىن ءبىر تسەح ىسكە قوسىلادى. بۇل جوبالاردىڭ ناتيجەسىندە تاۋارلى بالىق ءوسىرۋ كولەمى 7 مىڭ تونناعا, تەرەڭ وڭدەۋ كورسەتكىشى 4 ەسەگە ارتادى. بۇل جوبالاردىڭ ارقاسىندا 511 ادام تۇراقتى جۇمىسقا ورنالاسادى.
رەسەي فەدەراتسياسىمەن شەكاراداعى قۇرمانعازى اۋدانىنىڭ بىرلىك, كۋدرياشوۆ, تەڭىز جانە وزگە اۋىلدارىندا بالىق وڭدەيتىن 9 تسەح جۇمىس ىستەپ تۇر. ال «كاسپي-بالىق» وندىرىستىك كووپەراتيۆى بىرلىك اۋىلىندا تاعى ءبىر تسەحتىڭ قۇرىلىسىن جۇرگىزىپ جاتىر. جاڭا تسەحتىڭ قابىرعاسى سەندۆيچ-پانەلدەن, كەرامزيت تاستان, توبە شاتىرى مەتاللوپروفيلدەن, مەتالوكاركاس ماتەريالدارىنان قۇراستىرىلادى. قازىر قۇرىلىس جۇمىستارىنا 30 ادام تارتىلعان.
– بالىق وندەۋ تسەحىنىڭ جوباسىنا 500 ملن تەڭگە ينۆەستيتسيا سالىنىپ وتىر. ونىڭ قۋاتى – جىلىنا 1 500 توننا بالىق وڭدەۋ. تاۋلىگىنە 30 توننا بالىق وڭدەلەتىن جاڭا تسەح 4 مۇزداتقىش, سالقىنداتقىش قۇرىلعىسىمەن قامتىلادى. وڭدەۋ تەحنولوگياسىنىڭ جۇمىسى سۇرىپتاۋ, ارالاۋ, جۋ, تازارتۋ, سالقىنداتۋ, مۇزداتۋ, تۇزداۋ سەكىلدى كوپساتىلى ۇدەرىسكە نەگىزدەلگەن. تسەحتا 104 ادام تۇراقتى, 50 ادام ۋاقىتشا جۇمىس ىستەيدى. بۇل كووپەراتيۆ بيىلعى ناۋرىزدا رەسەي فەدەراتسياسىنا 39 توننا بالىق ءونىمىن ەكسپورتتاعان. بالىق ونىمدەرى ۋكراينا مەن گرۋزياعا دا جىبەرىلەدى, – دەيدى اۋداندىق اۋىل شارۋاشىلىعى جانە جەر قاتىناستارى ءبولىمىنىڭ باسشىسى اسقار مۇفتاح.
اتىراۋ قالالىق كاسىپكەرلىك جانە اۋىل شارۋاشىلىعى ءبولىمى باسشىسىنىڭ مىندەتىن اتكارۋشى ازامات الىباەۆتىڭ ايتۋىنشا, «امانگەلدى اتىنداعى» سەرىكتەستىگىندە 1 500 ادام جۇمىسپەن قامتىلىپ وتىر. ونىڭ ىشىندە 1 100 ادام كاسپي تەڭىزىنەن, جايىق پەن قيعاش وزەنىنەن بالىق اۋلايدى. وزگەلەرى ارنايى زاۋىت پەن ەكى تسەحتاعى بالىق وڭدەۋ ىسىنە تارتىلعان. سەرىكتەستىكتە 20 شاعىن كەمە مەن 6 تەپلوحود بار.
– بىلتىر سەرىكتەستىكتە 2 512 توننا بالىق ءونىمى شىعارىلىپ, 730 تونناسىن ازەربايجان, ۋكراينا, گەرمانيا, پولشا, رۋمىنيا, فرانتسيا, لاتۆيا, گرۋزيا, يزرايل جانە رەسەيگە ەكسپورتتالدى. ال 1 782 توننا بالىق ءونىمى ەل تۇتىنۋشىلارىنا ساتىلدى. سەرىكتەستىك بالىقشىلارى بيىلعى بەس ايدا 330 تونناعا جۋىق بالىق ءونىمىن دايىنداپ ۇلگەردى. دايىن ءونىمنىڭ 241 تونناسى ەكسپورتقا, ال 89 تونناسى ىشكى نارىققا جىبەرىلدى. وتكەن جىلعى شىلدەدەن بەرى 4 501 توننا بالىق اۋلاندى. ودان 2,5 مىڭ توننا سالقىنداتىلعان بالىق, 300 توننا بالىق ەتى, 350 توننا ىستالعان, 200 توننا قاقتالعان بالىق ونىمدەرى شىعارىلدى. بالىق ونىمدەرى اتىراۋ قالاسىنداعى 28 ساۋدا نۇكتەسىندە ساتىلادى, – دەيدى ا.الىباەۆ.
اتىراۋ وبلىسى
