اۆتوبۋستار مەملەكەت باسشىسى قاسىم-جومارت توقاەۆتىڭ تاپسىرماسى نەگىزىندە وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ باستاماسىمەن الىنعان.
قالا باسشىسى وقۋشىلار قاۋىپسىزدىگىن قامتاماسىز ەتۋ ءۇشىن ءبىلىم بەرۋ ۇيىمدارىندا اۆتوبۋس پاركىن جاڭارتۋ ىسىنە ەرەكشە نازار اۋدارىلىپ وتىرعانىن ايتتى.
– قازىرگى ۋاقىتتا قالاداعى بارلىق مەكتەپتە قاۋىپسىزدىك ماسەلەسى قاتاڭ باقىلاۋعا الىنعان. مەكتەپ عيماراتتارىنا بەينەباقىلاۋ جۇيەسىن ورناتۋ, دابىل تۇيمەسىن جەدەل باسقارۋ ورتالىعىنا بايلانىستىرۋ, تۋرنيكەتتەرمەن جابدىقتاۋ جۇمىسى تولىق اتقارىلدى. قالا مەكتەپتەرىندە قازىرگى ۋاقىتتا 60 مىڭداي وقۋشى ءبىلىم الادى. ولاردىڭ 2700-ءى مەكتەپكە تاسىمال ارقىلى قاتىنايدى. وسى وقۋشىلاردىڭ مەكتەپكە كۇندەلىكتى بارىپ-قايتۋىن ساپالى ۇيىمداستىرۋ جانە مەكتەپ يەلىگىندەگى اۆتوكولىكتەردى جاڭارتۋ ماسەلەسى ءبىراز جىلدان بەرى وزەكتى بولاتىن. بىلتىردان باستاپ رەسپۋبليكالىق بيۋدجەتتەن قارجى ءبولىنىپ, مەكتەپتەردىڭ اۆتوبۋس پاركىن جاڭارتۋعا مۇمكىندىك تۋدى. وسىنداي يگى ىستەرىمىز جالعاسىن تابا بەرسىن, – دەدى ميرجان مۇنايدار ۇلى مەكتەپ ديرەكتورلارىنا جاڭا اۆتوبۋس كىلتىن تابىستاۋ سالتاناتىندا.
جاڭا كولىككە يە بولعان ءبىلىم ورداسىنىڭ ءبىرى – ءاليا مولداعۇلوۆا اتىنداعى №38 مەكتەپ-ليتسەيى اتا-انالار كوميتەتىنىڭ توراعاسى قانات يمانعاليەۆ اتا-انالار مەن مەكتەپ ۇجىمدارى اتىنان مەملەكەت قامقورلىعى ءۇشىن العىس ايتتى.
جاڭا اۆتوبۋستار ورال قالاسىنداعى №12, 14, 20, 32 جانە 38 مەكتەپتەرگە بەرىلدى. بۇل كولىكتەردە بالا قاۋىپسىزدىگىنە ەرەكشە كوڭىل بولىنگەن. قاۋىپسىزدىك بەلبەۋى, سومكەلەرگە ارنالعان سورەلەر, بەينەباقىلاۋ كامەراسى بار. تاعى ءبىر ەرەكشەلىگى – اۆتوبۋس ەسىگى جابىلماي تۇرىپ ورنىنان قوزعالمايدى. قوزعالىس جىلدامدىعى – 60 كم/ساع. مۇنىڭ ءبارى بالانىڭ قاۋىپسىزدىگىنە كەپىل بولارى انىق.
باتىس قازاقستان وبلىسى
