وسىعان بايلانىستى ۋنيۆەرسيتەتتە «قازمۇنايگاز» ۇلتتىق كومپانياسى مەن ەنشىلەس كاسىپورىندارى وكىلدەرىنىڭ قاتىسۋىمەن دوڭگەلەك ۇستەل ءوتتى. ونداعى ماقسات – اتالعان ءبىلىم بەرۋ ورداسىن ۇلتتىق كومپانيانىڭ كورپوراتيۆتىك عىلىمي-يندۋستريالدى ورتالىعىنا (R&D ورتالىعى) اينالدىرۋ ماسەلەسىن تالقىلاۋ. وبلىس اكىمى سەرىك شاپكەنوۆتىڭ ايتۋىنشا, وقۋ ورداسىنىڭ ىرگەلى عىلىمي-يندۋستريالدى ورتالىققا اينالۋىنىڭ بىرنەشە سەبەبى بار. بىرىنشىدەن, وقىتۋشىلار مەن ستۋدەنتتەردىڭ عىلىمي-زەرتتەۋ جۇمىستارىمەن اينالىسۋىنا جول اشىلادى. ەكىنشىدەن, وڭىردە جوعارى ءبىلىمدى مامانداردىڭ تۇراقتاۋىنا مۇمكىندىك بەرەدى.
– «قازمۇنايگاز» ۇلتتىق كومپانياسىنىڭ ەنشىلەس كاسىپورىندارى مەن اكادەميالىق قاۋىمداستىق وكىلدەرىنىڭ ءبىر الاڭعا جينالۋىن ورتاق ماقسات پەن مۇددە جولىنداعى بىرلەسكەن قادام دەۋگە بولادى. س.وتەباەۆ اتىنداعى اتىراۋ مۇناي جانە گاز ۋنيۆەرسيتەتى – ەلىمىزدەگى مۇناي-گاز سالاسىنىڭ عىلىمي-يننوۆاتسيالىق ورتالىعىنا اينالۋدى ماقسات ەتىپ وتىرعان جوعارى وقۋ ورنى. مۇندا جاڭا جوبالاردى ىسكە اسىرۋعا مول مۇمكىندىك بار, – دەدى س.شاپكەنوۆ.
«قازمۇنايگاز» ۇلتتىق كومپانياسى» اق باسقارما توراعاسى ماعزۇم مىرزاعاليەۆتىڭ پىكىرىنشە, ۋنيۆەرسيتەتپەن تىعىز جۇمىس ىستەۋدىڭ ماڭىزى زور. ويتكەنى وتاندىق كومپانيا وتكەن جىلدان بەرى ءبىلىم سالاسىنا ەرەكشە نازار اۋدارىپ وتىر.
– اتىراۋ مۇناي جانە گاز ۋنيۆەرسيتەتى – سالالىق ءبىلىمنىڭ كوشباسشىسى, ءبىر وبلىستىڭ عانا ەمەس, باسقا دا وڭىرلەردەگى ونەركاسىپ كاسىپورىندارىنا كادر دايارلايتىن ۇستاحانا. ۇلتتىق كومپانيا رەتىندەگى مىندەتىمىز – تەوريا جاعىنان عانا جاقسى دايىندالعان ەمەس, سونىمەن قاتار ءوندىرىس ورىندارىندا تاجىريبەدەن وتكەن بىلىكتى مامانداردى دايارلاۋعا قولداۋ كورسەتۋ. ستۋدەنتتەردى تاجىريبە جيناۋعا تارتۋ, جۇمىسقا الۋ وسى ۋنيۆەرسيتەتپەن جاسالعان مەموراندۋم اياسىندا جۇزەگە اسىرىلادى. عىلىمي-زەرتتەۋ جانە تاجىريبەلىك-كونسترۋكتورلىق جۇمىستارىنا تارتۋ جوسپارىمىزدا بار. ويتكەنى ءبىز ەنشىلەس كاسىپورىنداردىڭ دامىعانىن, وندىرىستە زاماناۋي عىلىمي جوبالاردىڭ ەنگىزىلگەنىن قالايمىز. ۇلتتىق كومپانيا مەن ۋنيۆەرسيتەت اراسىنداعى بايلانىستى نىعايتا بەرۋىمىز قاجەت. وندىرىسكە ەنگىزۋگە بولاتىن بارلىق ينجەنەرلىك شەشىمگە جان-جاقتى قولداۋ كورسەتىلەدى. سول سەبەپتى بۇل ءبىلىم ورداسى ءبىزدىڭ كومپانياعا مامان دايارلايتىن كادر ۇستاحاناسى بولا الادى, – دەدى م.مىرزاعاليەۆ.
كەزدەسۋدە ۋنيۆەرسيتەت پەن ۇلتتىق كومپانيا باسشىسى عىلىمي-اكادەميالىق باعىتتى دامىتۋعا قاتىستى ىنتىماقتاستىق پەن ءوزارا تۇسىنىستىك تۋرالى مەموراندۋمعا قول قويدى. قۇجاتقا سايكەس وتاندىق كومپانيا مەن ونىڭ ەنشىلەس كاسىپورىندارى R&D ورتالىقتا عىلىمي-زەرتتەۋ جانە تاجىريبەلىك-كونسترۋكتورلىق شەشىمدەرگە باستاماشىلىق جاساعالى وتىر. ونىڭ ىشىندە كومىرسۋتەكتەردى بارلاۋ, ءوندىرۋ, مۇناي حيمياسى, مۇناي وڭدەۋ, مۇناي مەن گازدى تاسىمالداۋ جانە تاعى باسقا باعىتتار بويىنشا تسيفرلىق, تەحنيكالىق تەحنولوگيالىق مىندەتتەردى ىسكە اسىرۋ بار. بۇدان بىلاي ۋنيۆەسريتەت ستۋدەنتتەرى ونەركاسىپ نىساندارىندا وندىرىستىك تاجىريبەدەن وتەدى. كاسىپورىنداردىڭ ينجەنەرلىك-تەحنيكالىق توبىنداعى ماماندار مەنتور رەتىندە ستۋدەنتتەرگە تاجىريبەسىن بولىسەدى. ال كومپانيا فاكۋلتەتتەردەگى زەرتحانالىق جانە تاجىريبەلىك-كونسترۋكتورلىق ينفراقۇرىلىمى وزگەشە دامىتۋعا قولداۋ كورسەتەدى.
سونداي-اق ۋنيۆەرسيتەت پەن «قازمۇنايگاز» ينجينيرينگ» كومپانياسىنىڭ ىنتىماقتاستىق پەرسپەكتيۆالارى تالقىلاندى. اتالعان كومپانيا عىلىمي زەرتتەۋ جۇرگىزىپ, مۇناي-گاز سالاسىنىڭ تۇتاس كەشەنى بويىنشا وندىرىستىك-تەحنيكالىق تالداۋ جاسايدى. ال عىلىمي زەرتتەۋلەردى كەن ورىندارىندا سىناقتان وتكىزۋ, عىلىمي كادرلاردى ەنشىلەس كاسىپورىنداردا ءوندىرىستىڭ قولدانبالى مىندەتتەرىن شەشۋ ۇدەرىسىنە تارتۋ ماسەلەلەرى شەشىمىن تابادى.
اتىراۋ وبلىسى
