بۇل كولىكتەردىڭ ەرەكشەلىگى سول, كۇن قاتتى قىزعان ۋاقىتتا عانا جۇرەدى. ويتكەنى كولىك توبەسىنە ورناتىلعان باتارەيالار كۇن ساۋلەسى قۋاتىن جيناپ, جينالعان ەنەرگيانى بىردەن تاقتايشالار استىنا جالعانعان رادياتورعا جىبەرەدى. كۇننىڭ قىزۋى ازايىپ, كەش تۇسە باستاعاندا قالىپتى جىلدامدىقتى الا الماعان سوڭ كولىكتەر توقتايدى.
كۇن كولىكتەرى كورمەسى اقتوبەدە وسىمەن ءۇشىنشى رەت ۇيىمداستىرىلىپ وتىر. جازدا قولدان قۇراستىرىلعان كولىكتەرمەن ەلىمىزدىڭ اۋماعىن ءجۇرىپ ءوتۋدى ءۇش جىل بۇرىن تالدىقورعاندىق ونەرتاپقىش نيكيتا پوددۋبنوۆ باستادى. ول جانار-جاعارمايدى قاجەت ەتپەيتىن وزدەرى قۇراستىرعان كۇن كولىگىنىڭ باستى كەمشىلىگى كۇندەلىكتى ومىردە قولدانۋعا كەلمەيتىندىگى دەيدى. ماسەلەن, قازىرگى كەزدە تانىمالدىلىعى جوعارى, الەمدە قولدانىسقا ەنگىزىلە باستاعان كۇن باتارەيالارىمەن جۇرەتىن «Mantana» كولىگىنىڭ سالماعى 350 كيلو. سالماعى جوعارى كولىكتىڭ قوزعالىسقا ەنۋى ءۇشىن قۋاتتى ەلەكتر توگى كەرەك. ال, نيكيتا كولىگىنىڭ سالماعى 100 كيلودان اسپايدى ءارى كابيناسى وتە تار. تۇندە ايدالادا كەلە جاتىپ كولىك ىشىنە قونۋعا كەلمەيدى. سوندىقتان ساياحاتشىلار وزدەرىمەن بىرگە پالاتكالارىن الىپ جۇرەدى. سوعان قاراماستان جاز كەزىندە ساياحاتتاۋعا وتە ىڭعايلى, جانارمايدى قاجەت ەتپەيتىن ساياحاتشىلار كولىگى سىناقتان وتسە, وندىرىسكە جىبەرۋگە بولادى. ازىرگە ونەرتاپقىش جىگىتتەر بۇل جاعىن ويلاپ جۇرگەن جوق.
اقتوبە
