تاۋەلسىزدىكتىڭ التىن بەلگىسى - استانانى جىرعا قوسىپ, ازاتتىقتى جارقىراتا اشۋ وڭاي شارۋا ەمەس ەكەنى ەكىنىڭ بىرىنە بەلگىلى. الايدا ءمۇشايرا جۇلدەسىنەن ۇمىتكەرلەردىڭ كوپ ىزدەنىپ, كوپ تولعانعانى كوڭىل قۋانتادى. اقىنداردىڭ كوپشىلى استانانى جالاڭ جىرلاپ, جۇقا ويدان ارى اسا الماعانى بايقالادى. الايدا «الۋان-الۋان جۇيرىك بار الىنە قاراي جۇگىرەر» دەگەندەي استانانى وزىنشە جىرلاپ, ورنەكتى ولەڭدەرىمەن سۋىرىلا شاپقان تالانتتار كوپ بولدى.
مۇشايراعا تۇسكەن شىعارمالاردىڭ ىشىندە كولەمدى داستاندار دا بولدى. كونكۋرس شارتىندا پوەما بولماعاندىقتان ول شىعارمالار قازىلار القاسىنىڭ تالقىسىنا ۇسىنىلمادى.
بەلگىلى قالامگەرلەردەن قۇرالعان قازىلار القاسى مۇشايراعا قاتىسقان شىعارمالاردى سۇرىپتاي كەلە 12 اقىنعا بايگە بەردى.
قر جازۋشىلار وداعىنىڭ حاتشىسى, استانا قالاسى فيليالىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى, اقىن داۋلەتكەرەي كاپ ۇلى قازىلار القاسىنا توراعالىق ەتتى. قۇرامدا مەملەكەتتىك سىيلىقتىڭ لاۋرەاتى, اقىن نەسىپبەك ايت ۇلى بولدى. نەسىپبەك ايت ۇلى ءمۇشايرانى ۇيىمداستىرۋشى رەتىندە ءتورت اي بۇرىن جاريالانعان مۇشايراعا تۇسكەن ولەڭدەردى قاتاڭ ىرىكتەپ, دوداعا تۇسكەن جىرلاردىڭ باعىت-باعدارىن باعامدادى. سىني كوزقاراسپەن ىرىكتەلگەن جەتپىستەن استام ولەڭ قازىلار القاسىنىڭ تالقىسىنا ءتۇستى. قازىلار قۇرامىندا قر جازۋشىلار وداعىنىڭ مۇشەسى, مادەنيەت قايراتكەرى, اقىن سۇراعان راحمەت ۇلى, فيلولوگيا عىلىمدارىنىڭ دوكتورى, اقىن باۋىرجان جاقىپ, قازاقستاننىڭ ەڭبەك سىڭىرگەن قايراتكەرى, جازۋشى جانبولات اۋپباەۆ بولدى.
ساراپشىلار بارىنشا سىن كوزبەن قاراپ, تالعام تارازىسىنا سالىپ, بايگەگە قاتىسقان ءار ولەڭگە كوركەمدىك تۇرعىدان باعا بەرىپ, ادىلەت بيىگىنەن كورىنۋگە تىرىستى. ءمۇشايرا ءتول استانامىزعا ارنالعاندىقتان ولەڭدەردىڭ ويلارى تۇنىق, پاراستى بيىك, مازمۇنى جان-جاقتى بولۋىن قاداعالاپ, باعا جەتپەس تاۋەلسىزدىك ۇعىمىن اسقاقتاتا جىرلاۋدى باستى نازاردا ۇستادى.
سونىمەن قازىلار القاسى اقىلعا سالىپ, كەڭەسە كەلە باس بايگەنى «استانانىڭ اسپانى» دەگەن توپتاما ولەڭدەرى ءۇشىن بەلگىلى اقىن, اباي اتىنداعى مەملەكەتتىك سىيلىقتىڭ لاۋرەاتى عالىم جايلىبايعا بەرۋدى ءجون سانادى.
ءبىرىنشى ورىن جاس اقىن, «دارىن» مەملەكەتتىك جاستار سىيلىعىنىڭ لاۋرەاتى ارمان شەريزاتتىڭ «ازاتتىق مۇناراسى» اتتى ولەڭىنە بەرىلدى.
ەكىنشى ەكى ورىننىڭ ءبىرى قازاقتىڭ قابىرعالى اقىنى, مۇرات شايماراننىڭ «توپىراق» اتتى توپتاما ولەڭدەرىنە بۇيىردى.
ەكىنشى ورىننىڭ ەكىنشىسى «تاۋەلسىزدىك كوشەسىنىڭ تۇرعىنى» ولەڭى ءۇشىن بەلگىلى اقىن, رەسپۋبليكالىق «تۇركىستان» گازەتىنىڭ باس رەداكتورى باۋىرجان باباجان ۇلىنىڭ قانجىعاسىنا بايلاندى.
ءۇشىنشى ءۇش ورىن بەلگىلى اقىندار دۇكەن ءماسىمحان ۇلىنىڭ «استانام مەنىڭ ايبىنىم» ولەڭدەر توپتاماسىنا, ەلەنا ابدىحالىقوۆانىڭ «استانا. باستاۋ» ولەڭدەر توپتاماسىنا, ابدىعاني ءبازىلحاننىڭ «بوگەنبايدىڭ قاراوتكەلى» تولعاۋىنا بەرىلدى.
بەس ىنتالاندىرۋ سىيلىعى شىرىن تولقىنوۆا (الماتى وبلىسى) ۇلاربەك نۇرعالىم (استانا), نازگۇل بەردىقوجا (قىزىلوردا), باقىتجان رايسوۆا (وسكەمەن), باعدات مۇباراك (الماتى) قاتارلى اقىندارعا بۇيىردى.
