تالدىقورعاندا وتكەن ءىس-شاراعا وڭتۇستىك ءوڭىرىنىڭ, ونىڭ ىشىندە الماتى, جامبىل, قىزىلوردا, تۇركىستان وبلىستارىنىڭ وكىلدەرى قاتىستى. اۋقىمدى جۇمىستىڭ قورىتىندىسى وسى جىلدىڭ قاراشا ايىندا استانادا بارلىق وبلىستان كەلگەن دەلەگاتسيالاردىڭ قاتىسۋىمەن وتەتىن اۋىل ايەلدەرىنىڭ VI رەسپۋبليكالىق فورۋمى بولماقشى.
فورۋم پاندەميادان كەيىن بيىل العاش رەت وففلاين فورماتتا وتكىزىلدى. ەلىمىز بويىنشا بارلىق مۇددەلى تاراپ ونلاين بايلانىسپەن قامتاماسىز ەتىلدى. وبلىستار اكىمدەرىنىڭ ورىنباسارلارى, سونداي-اق اۋىل شارۋاشىلىعى, ەڭبەك جانە حالىقتى الەۋمەتتىك قورعاۋ, ۇلتتىق ەكونوميكا مينيسترلىكتەرىنىڭ, قوعامدىق جانە حالىقارالىق ۇيىمداردىڭ وكىلدەرى ىسكەر ايەلدەرمەن تىكەلەي بايلانىسقا شىقتى. «فورۋمدى ۇيىمداستىرۋداعى ماقسات – جەكە قوسالقى شارۋاشىلىقتار مەن اۋىل شارۋاشىلىعى كووپەراتيۆتەرىن دامىتۋ, اۋىل شارۋاشىلىعىن قولداۋعا باعىتتالعان مەملەكەتتىك باعدارلامالاردى ازىرلەۋ, جەرگىلىكتى ءوزىن-ءوزى باسقارۋ قۇرالدارىن دامىتۋ, بيزنەستىڭ الەۋمەتتىك جاۋاپكەرشىلىگىن ارتتىرۋ, 2030 جىلعا دەيىن جەرگىلىكتى دەڭگەيدە تۇراقتى دامۋ ماقساتتارىنا قول جەتكىزۋ ماسەلەلەرىن تالقىلاۋ. فورۋمعا قاتىسۋشىلار «Coca-Cola Belesteri» جوباسىنىڭ بيزنەس نەگىزدەرى, «Farmer school» مەن كووپەراتسيانىڭ فەرمەرلىك داعدىلاردى دامىتۋ بويىنشا ترەنينگتەرىنە قاتىستى. الدا وسىنداي فورۋمداردى باتىس, شىعىس, سولتۇستىك جانە ورتالىق وڭىرلەردە وتكىزۋ جوسپارلانىپ وتىر», دەدى قازاقستاننىڭ اۋىل ايەلدەرى فورۋمىن ۇيىمداستىرۋ كوميتەتىنىڭ توراعاسى, قازاقستان رەسپۋبليكاسى پارلامەنتى ءماجىلىسىنىڭ IV, V, VI شاقىرىلىمدارىنىڭ دەپۋتاتى مايرا ايسينا.
اۋىل ايەلدەرى فورۋمىنىڭ تاريحى 2018 جىلى استانا قالاسىندا وتكەن ءى رەسپۋبليكالىق فورۋمنان باستالادى. فورۋم 2019 جىلدان باستاپ قازاقستاننىڭ ءار ايماعىندا وتكىزىلە باستادى. 2020 جىلدان بەرى بارلىق وبلىستا ونلاين رەجىمدە وتەدى.
قازاقستاننىڭ اۋىل ايەلدەرى فورۋمىن ۇيىمداستىرۋشىلار – «جاسىل ەكونوميكانى قولداۋ جانە G-Global-دى دامىتۋ كواليتسياسى» زتب جانە «الەۋمەتتىك ديناميكا» قوعامدىق قورى. وعان قازاقستان پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا, وبلىس اكىمدىكتەرى جانە «اتامەكەن» ۇكپ قولداۋ كورسەتتى.
