بىلتىر ۇلتتىق قۇرىلتايدىڭ مۇشەلىگىنە ەندىم. قاراعاندى وبلىسىنان مۇشەلىككە وتكەنىمە قۋانىشتىمىن. مۇنىڭ ماڭىزى زور. سەبەبى قاراعاندى وبلىسىنداعى ماسەلەلەردى رەسپۋبليكالىق دەڭگەيدە كوتەرۋگە, مينيسترلىكتەرگە, ۇكىمەتكە جەتكىزۋگە مۇمكىندىك الدىق.
ۇلتتىق قۇرىلتاي مۇشەسى بولعاننان كەيىن ەلدەگى جاعدايدى ايتىپ, ونى پرەزيدەنتتىڭ قۇلاعىنا جەتكىزۋگە ءتيىسپىز. وتكەن ءبىر جىلدىڭ ىشىندە وتە ۇلكەن وقيعالار بولدى. پرەزيدەنت سايلاندى, ءماجىلىس پەن ءماسليحاتتار سايلاۋى ءوتتى.
قازىرگى تاڭدا جەرگىلىكتى جەردە قوردالانعان ماسەلە كوپ ەكەنىنە كوزىمىز جەتىپ وتىر. قارجىنىڭ قالاي بولىنەتىنىن, قالاي جۇمسالاتىنىن, قالاي بولىنەتىنىن, وسى باعىتتاعى اۋقىمدى كەمشىلىكتەرگە كۋامىز. بۇدان بولەك, بىلتىرعى جانە بيىلعى ءورت تە حالىقتى مازاسىزداندىرىپ وتىر. زاڭداردى, باعدارلامالاردى قابىلداۋ ءبىر بولەك. سول سەبەپتى الداعى قۇرىلتايدا وزەكتى ماسەلەلەر قوزعالاتىنى ءسوزسىز. ياعني مينيسترلىك, ۇكىمەت تاراپىنان باقىلاۋ جوق, قاداعالاۋ جوق. جەرگىلىكتى مەكەمەلەرگە بەرگەن ستاتيستيكاعا سۇيەنىپ, بۇكىل جۇمىس جاقسى ءجۇرىپ جاتىر دەپ ەسەپتەيدى.
مينيسترلەر اۋىلداردى ارالاپ, حالىقپەن كەزدەسىپ, ماسەلەنى كوزىمەن كورۋى كەرەك. تۇرعىندارمەن كەزدەسپەگەننەن كەيىن وسىنداي اپاتتار بولىپ جاتىر. قۇرىلتاي مۇشەلەرىنىڭ مىندەتى – جەرگىلىكتى جەردەگى وزەكتى ماسەلەلەردى پرەزيدەنتكە جەتكىزۋ. قۇرىلتايدىڭ مۇشەسى رەتىندە اۋىلعا بايلانىستى, ونىڭ نەلىكتەن دامىماي وتىرعانى تۋرالى, كوزىم كورگەن ماسەلەلەردى باياندادىم. بۇدان بولەك, ءبىلىم, مەديتسينا, ءوندىرىس, جەر تاقىرىبىنا قاتىستى سالالارداعى ورەسكەل كەمشىلىكتەردى, باعدارلامالاردىڭ جەتىلمەگەن تۇسىن كورسەتىپ, بىرنەشە ۇسىنىس جولدادىق.
ءلاززات قوجاحمەت,
ۇلتتىق قۇرىلتاي مۇشەسى
