اتىراۋ وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ءبولىم باسشىسى گۇلبولات امانعاليەۆانىڭ مالىمەتىنشە, بيىلعى ءۇش ايدا جۇمىسپەن قامتۋ ورتالىقتارىنا مۇگەدەكتىگى بار 485 ادام جۇگىنگەن. ونىڭ ىشىندە 407 ادامعا الەۋمەتتىك قولداۋ تۇرلەرى كورسەتىلدى. ال 293 ادام جۇمىسقا ورنالاستى.
– ويتكەنى اتىراۋ قالاسى مەن بارلىق اۋداندا مۇگەدەكتىگى بار ادامداردى جۇمىسپەن قامتۋ باعىتىندا ارنايى قاۋلى قابىلدانعان ەدى. وسى قاۋلىعا سايكەس مەكەمەدە جۇمىس ىستەيتىن ادامنىڭ سانىنا بايلانىستى مۇگەدەكتەر ءۇشىن 2-4 پايىز كولەمىندە كۆوتا ءبولۋ كوزدەلگەن. مۇگەدەكتىگى بار ادامداردى جۇمىسپەن قامتي الاتىن مەكەمەلەر ءتىزىمى بەكىتىلدى. مەكەمەلەردىڭ باسشىلارىنا جۇمىسپەن قامتۋ ەرەجەسى ءتۇسىندىرىلدى. سونىڭ ناتيجەسىندە جىل باسىنان بەرى كۆوتامەن 8 ادام جۇمىسقا ورنالاستى. ال قاۋلىنى ورىنداماي, مۇگەدەكتىگى بار ازاماتتار ءۇشىن كۆوتا بولمەگەن مەكەمەلەردىڭ ءتىزىمى ءتيىستى ورگاندارعا جولداندى, دەيدى گۇلبولات امانعاليەۆا.
ونىڭ ايتۋىنشا, جىل باسىنان بەرى مۇگەدەكتىگى بار ادامداردى جۇمىسپەن قامتۋ ءۇشىن 105 ادام قىسقامەرزىمدى وقۋ كۋرستارىنا جىبەرىلگەن. سونداي-اق بيىل مۇگەدەكتىگى بار 9 ادامعا 400 ايلىق ەسەپتىك كورسەتكىش مولشەرىندە مەملەكەتتىك گرانت بەرىلگەن. قازىر ولار جەكە كاسىبىن دوڭگەلەتىپ وتىر.
قۇرمانعازى اۋدانىندا جەكە كاسىبىن اشقانداردىڭ قاتارىندا «نۇرشۋاق مۇگەدەكتەر قوعامى» قوعامدىق بىرلەستىگىنىڭ ءتورايىمى گۇلسارا قايىرلەنوۆا دا بار. كاسىپكەر 2013 جىلدان بەرى ىسمەرلىكتى قولعا الىپ, ەكى تىگىن شەبەرحاناسىن اشقان. تىگىن شەبەرحاناسىندا ارنايى تاپسىرىسپەن كيىم-كەشەك, كورپە-كوپشىك, كۇندەلىكتى تۇرمىستا قولدانىلاتىن وزگە دە زاتتاردى دايىنداپ شىعادى. ءبىر ەرەكشەلىگى, كاسىپكەر العاشقى كەزەكتە ءبىرىنشى جانە ەكىنشى توپ مۇگەدەكتىگى بار قىز-كەلىنشەكتەردى, جالعىز تۇراتىن انالاردى جۇمىسقا العان.
– وسى كاسىپپەن اينالىسقانىما ون جىلعا جۋىقتادى. ءوزىمىز تىككەن دۇنيەنى ساتاتىن ارنايى ورىن جوق. بىراق تىگىن شەبەرحاناسىنا كەلگەن جاندارعا ۇسىنساق, بىردەن ساتىپ الادى. ءوز تاراپىمىزدان مۇگەدەكتىگى بار قىز-كەلىنشەكتەردى وسى كاسىپكە وقىتۋ ءۇشىن تەگىن تىگىن وقىتۋ كۋرسىن اشتىق. قازىر ولار دا ءوز كاسىبىن اشىپ, جۇمىس ىستەي باستادى. ءار جۇمادا مۇمكىندىگى شەكتەۋلى جاندارعا تەگىن قىزمەت كورسەتەمىز. الداعى ۋاقىتتا تىگىن شەبەرحاناسىندا تىگىنشىلەر سانىن كوبەيتۋدى جوسپارلاپ وتىرمىز, دەيدى گ.قايىرلەنوۆا.
ال ماحامبەت اۋدانىنداعى العا اۋىلىنىڭ تۇرعىنى امانگۇل فازليەۆانىڭ ءوزى بالا كۇنىنەن مۇمكىندىگى شەكتەۋلىلەر ساناتىنا جاتادى. ەكىنشى توپتاعى مۇگەدەك بولعانىمەن, قولىنان كەلمەيتىنتىنى جوق. قۇراق كورپە تىگەدى. كوپشىككە ءتۇرلى ويۋ سالادى. ونىڭ قولىنان شىققان ساۋكەلەنىڭ اسەمدىگىن كوزبەن كورۋ كەرەك. ساندىك قول سومكەلەرگە قىزىعۋشى كوپ.
– تىگىن ونەرىنە بالا كەزىمنەن قىزىعىپ, قولعا الدىم. ماقساتىم – تۇرمىسقا قاجەتتى بۇيىمداردى ۇلتتىق ناقىشتا جاساۋ. مەنىڭ قىزىعۋشىلىعىم قۋىرشاقتارعا كويلەك تىگۋدەن باستالدى. وسە كەلە وسى ونەر تۇرىمەن اينالىسۋعا بەل بۋدىم. ءبىراز نارسەنى ۇيرەنۋگە تۋرا كەلدى. ءسويتىپ, تىگىن شەبەرحاناسىنا جۇمىسقا ورنالاستىم. بۇل تاجىريبە جيناۋعا كوپ سەپتىگىن تيگىزدى. الدىمەن كورپە تىكتىم. سودان كەيىن ءوزىمدى ءارتۇرلى باعىتتا سىناپ كوردىم. قيىندىققا قاراماستان, باستاعان ءىسىم وڭ ناتيجەسىن بەردى. قازىر كورپە, كوپشىك, باس كيىمدەر, قىز جاساۋىن تىگەمىن. قولونەر – سىرى تۇڭعيىق, وزگەشە ءبىر الەم. زەيىنىڭدى باستاعان ىسىڭە بۇرۋ تىرشىلىكتىڭ تاۋقىمەتىن از ۋاقىتقا بولسا دا ۇمىتۋعا اسەر ەتەدى, دەيدى امانگۇل فازليەۆا.
العا اۋىلىنىڭ اكىمى راسۋل ءمۋسيننىڭ ايتۋىنشا, تىگىنشىلىكتى كاسىپ ەتكەن امانگۇل فازليەۆا بىرنەشە رەت اۋداندىق, وبلىستىق قولونەر كورمەسىنە, بايقاۋلارعا قاتىسقان. بيىلعى اقپاندا «باستاۋ-بيزنەس» باعدارلاماسىمەن كۋرستان ءوتىپ, مەملەكەتتىك گرانت الۋعا قۇجات تاپسىرىپ قويعان.
«اتامەكەن» ۇكپ جىلىوي اۋداندىق فيليالىنىڭ جەتەكشىسى ەرلان نۇرلانوۆتىڭ ايتۋىنشا, بىلتىر 76 ادامعا, ونىڭ ىشىندە مۇمكىندىگى شەكتەۋلى ەكى ادامعا مەملەكەتتىك گرانت بەرىلگەن. قايتارىمسىز قارجى العانداردىڭ قاتارىندا ايسۇلتان دۇيساليەۆ تە بار.
– ەشكى – تەز كوبەيەتىن ءۇي جانۋارى. ونىڭ ءسۇتى كوپتەگەن اۋرۋعا ەم, ال ەتى جەڭىل تاعام قاتارىنا جاتادى. سول سەبەپتەن, بىلتىر قايتارىمسىز قارجىعا 30-دان استام ەشكى ساتىپ الدىم. ەندى اۋدان تۇرعىندارىن ەشكىنىڭ سۇتىمەن جانە ەتىمەن قامتۋ ويدا بار. وسى كاسىبىمە قوسا قامىستان تاقتا دايىندايمىن. ونى قۇرىلىسقا پايدالانۋ ءۇشىن الاتىندار از ەمەس, دەيدى ا.دۇيساليەۆ.
ال قىزىلقوعا اۋدانىنداعى «ميالى» مۇگەدەكتەر قوعامدىق بىرلەستىگىنىڭ توراعاسى اسىلبەك مۇراتوۆ ەكى جىلدان بەرى جيھاز جاساۋدى كاسىپ ەتىپ وتىر. وسى ماقسات ءۇشىن ءۇيىنىڭ جانىنداعى عيماراتتى جيھاز تسەحىنا اينالدىرعان.
– كاسىبىمدى باستاۋ ءۇشىن ءتۇرلى باعدارلاما ارقىلى جەڭىلدەتىلگەن نەسيە العان جوقپىن. الداعى ۋاقىتتا تسەح اۋماعىن ۇلعايتۋدى جوسپارلاپ وتىرمىن. تسەحتا 16 ادام تۇراقتى جۇمىس ىستەيدى. اۋداندىق جۇمىسپەن قامتۋ, الەۋمەتتىك باعدارلامالار جانە ازاماتتىق حال اكتىلەرىن تىركەۋ ءبولىمى ارقىلى مۇمكىندىگى شەكتەۋلى 12 ادامدى جۇمىسقا قابىلدادىم. ونىڭ ىشىندە ءبىرىنشى توپتىڭ مۇگەدەگى دە بار, دەيدى اسىلبەك مۇراتوۆ.
قازىر تسەحتا كەرەۋەت, ۇستەل شكاف سەكىلدى جيھازدار جاسالادى. جۇمساق جيھازداردىڭ تىسىن اۋىستىرىپ بەرەدى.
– بالا كەزىمنەن ءارتۇرلى زاتتى قۇراستىرۋدى ۇناتاتىن ەدىم. جيھاز تسەحىندا دايىن تاقتايلاردى بۇرعىلاۋ قۇرالىنىڭ كومەگىمەن قۇراستىرامىن. ءبىزدىڭ جيھازدارىمىزعا تۇرعىندار تاراپىنان تاپسىرىس كوپ تۇسەدى. تاپسىرىس بەرۋشىلەر جيھاز ساپاسىنا سىن ايتقان ەمەس, – دەيدى ءبىرىنشى توپتاعى مۇمكىندىگى شەكتەۋلى جان ماحامبەت سەرىكقاليەۆ.
اتىراۋ وبلىسى
