ۇبت باستالعالى شەكتى بالدى 78 پايىزعا جۋىق تالاپكەر جيناعان. ورتاشا بالل ازىرشە 69 ۇپايدى قۇرادى. ەڭ جوعارى بالل – 137, ونى تەستىلەۋدىڭ ءبىرىنشى اپتاسىندا ءبىر تالاپكەر جيناعان.
– ۇبت-نىڭ ءۇشىنشى اپتاسىندا تالاپكەرلەر تەستىلەۋدى تاپسىرۋدىڭ ەكىنشى مۇمكىندىگىن پايدالاندى. سوندىقتان تەستتى ەكى رەت تاپسىرىپ, ۇپايلارىن ءبىلىپ وتىرعان بالالار گرانت كونكۋرسى تۋرالى سۇراقتار قويا باستادى. ەڭ ءجيى قويىلاتىن سۇراق: گرانت ۇتىپ الۋ ءۇشىن قانشا بالل جيناۋ كەرەك؟ گرانتقا شەكتى بالل دەگەن بولمايدى, بارلىعى كونكۋرسقا بايلانىستى ەكەنىن تاعى دا اتاپ وتكەن ابزال. بىراق كەم دەگەندە باعدار بولۋ ءۇشىن وقۋعا تۇسۋشىلەر بىلتىرعى ناتيجەلەرمەن تانىسا الادى. مىسالى, 2022 جىلى «ستوماتولوگيا» ءبىلىم بەرۋ توبى بويىنشا ءبىر گرانتتىق ورىنعا 25 ۇمىتكەر بولعان, ال گرانت ۇتىپ العانداردىڭ ورتاشا كورسەتكىشى 134 بالدى قۇرادى, – دەدى ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.
ايتا كەتەيىك, ەرەكشە قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ناتيجەسىندە ۇبت-عا ەكى اپتانىڭ ىشىندە 370 تالاپكەر قاتىستى.
بۇگىنگى تاڭدا 146 تالاپكەر سمارتفون, شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 106 ادام شىعارىلىپ, ولاردىڭ ناتيجەلەرى جويىلدى. بوگدە تۇلعالار انىقتالعان جوق.
ايتا كەتەيىك, 2023 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا تالاپكەردىڭ ناتيجەلەرى جويىلادى.
