وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ازامات مامبەتوۆتىڭ ايتۋىنشا, پيلوتتىق جوبانى «ەدىل-ورال.kz» سەرىكتەستىگى ىسكە اسىرادى. وسى ماقساتتا بيىلعى اقپاندا تاۋەلسىز سەرتيفيكاتتاۋ جۇيەسىن ەنگىزۋ ءۇشىن ەڭبەك جانە حالىقتى الەۋمەتتىك قورعاۋ, عىلىم جانە جوعارى ءبىلىم, وقۋ-اعارتۋ مينيسترلىكتەرى, اتىراۋ وبلىسىنىڭ اكىمدىگى مەن «ەدىل-ورال.kz» جشس اراسىندا ىنتىماقتاستىق پەن ءوزارا ءىس-قيمىل تۋرالى كەلىسىمگە قول قويىلدى. وسىعان وراي اتالعان سەرىكتەستىك وكىلدەرى 16 ماماندىقتى سەرتيفيكاتتاۋدى ۇسىنىپ وتىر. قازىر مامانداردىڭ بىلىكتىلىگىن ارتتىراتىن وقۋ ورىندارى انىقتالىپ, سەرىكتەس بولاتىن جۇمىس بەرۋشىلەر بەلگىلەندى.
– كادرلاردى تاۋەلسىز سەرتيفيكاتتاۋ جۇيەسىن ەنگىزۋمەن قاتار, ء«بىلىم بەرۋ جۇيەسىندە كاسىپتىك ستاندارتتاردى قولدانۋ» جوباسى دا قاناتقاقتى رەجىمدە ىسكە اسادى. وسىعان وراي بىرلەسكەن جۇمىس توبى قۇرىلىپ وتىر. ال قاناتقاقتى جوبا ىسكە قوسىلعاننان كەيىن «ەدىل-ورال» سەرىكتەستىگىنە وندىرىستىك مەكەمەلەردىڭ جۇمىسشىلارى مەن كاسىپتىك ءبىلىمى بار جۇمىسسىزدار ءوتىنىم بەرە الادى. ءوتىنىم بەرگەندەر سەرتيفيكاتتاۋ بويىنشا قوسىمشا ءبىلىم الادى. وسىدان كەيىن ولاردىڭ, كاسىبي داعدىسى ناقتىلانىپ, تاۋەلسىز سەرتيفيكاتقا يە بولادى. بۇل وڭىردە جوعارى ساناتتاعى جۇمىسشىلار قاتارى ارتىپ, حالىقارالىق دەڭگەيدەگى سەرتيفيكاتتى يەلەنۋىنە ىقپال ەتەدى, – دەيدى ازامات مامبەتوۆ.
مۇنايلى وڭىردە جۇمىسسىزدار قاتارىن ازايتۋعا ىقپال ەتەتىن تاعى ءبىر جوبا ىسكە اسىرىلىپ جاتىر. بۇل – «كۇمىس جاس» جوباسى. جىل سوڭىنا دەيىن اتالعان جوبامەن 600 ادامدى جۇمىسپەن قامتۋ كوزدەلىپ وتىر.
– بيىلعا دەيىن «كۇمىس جاس» جوباسىنا 58 جاستان اسقاندار عانا قاتىساتىن ەدى. ەندى سالالىق مينيسترلىك تۇرعىندار اراسىنداعى جۇمىسسىزدىق دەڭگەيىن ساراپتاپ, جوباعا قاتىسۋشىلاردىڭ شەكتى مولشەرىن 50 جاسقا دەيىن تومەندەتتى. بۇل ءارتۇرلى سەبەپپەن جۇمىسىنان بوساپ, تابىسسىز قالعان جاندار ءۇشىن ءتيىمدى بولىپ وتىر. باعدارلامانىڭ جۇمىسقا ورنالاسۋشى ءۇشىن دە, جۇمىس بەرۋشى ءۇشىن دە تيىمدىلىگى بار. ويتكەنى وسى باعدارلاماعا قاتىسۋشىنىڭ جالاقىسىن مەملەكەت سۋبسيديالايدى, – دەپ ءتۇسىندىردى ازامات مامبەتوۆ.
ونىڭ ايتۋىنشا, «كۇمىس جاس» جوباسىنا قاتىسۋ مەرزىمى 36 ايدان اسپايدى. جالاقى 30 ايلىق ەسەپتىك كورسەتكىش مولشەرىن قۇرايدى. جوبا شەڭبەرىندە جۇمىسقا ورنالاسقاندار ءۇشىن سۋبسيديا مولشەرى دە ءارتۇرلى بولىپ بەلگىلەنگەن. ماسەلەن, جۇمىسشىنىڭ العاشقى 12 ايداعى جالاقى مولشەرلەمەسىنىڭ سۋبسيدياسى – 70%. ال 13-24 ايعا دەيىنگى ارالىقتا 65%, سوڭعى 12 ايدا 60% مولشەرىندە سۋبسيديا بەرىلەدى.
– اتىراۋ وبلىسىندا «كۇمىس جاس» جوباسىمەن 343 ادام جۇمىسقا قابىلداندى. اسىرەسە, جىلىوي جانە يندەر اۋدانىنىڭ شارۋاگەرلەرى اتالعان جوبانى ءتيىمدى پايدالانىپ وتىر. قازىر اتىراۋ قالاسىندا 112, جىلىوي مەن يندەر اۋدانىندا 46, قۇرمانعازىدا – 18, قىزىلقوعادا – 38, ماقاتتا – 25, ماحامبەت اۋدانىندا 29 ادام «كۇمىس جاس» جوباسىمەن جۇمىسقا ورنالاستى. ولارعا زەينەتاقى تولەمى اۋدارىلادى, – دەپ ءمالىم ەتتى باسقارما باسشىسى.
اتىراۋ وبلىسى
