بەرىك اسىلوۆ اباي وبلىسىنداعى ءورت دەرەگى بويىنشا قوزعالعان قىلمىستىق ىسكە قاتىستى تەرگەۋ امالدارى جونىندە باياندادى. باس پروكۋروردىڭ ورىنباسارىنىڭ باسشىلىعىمەن قۇقىق قورعاۋ جانە ارناۋلى ورگانداردىڭ تاجىريبەلى قىزمەتكەرلەرىنەن ۆەدومستۆوارالىق جەدەل-تەرگەۋ توبى قۇرىلدى. تەرگەۋ قورىتىندىسى بويىنشا لاۋازىمدى تۇلعالاردىڭ ارەكەتتەرى مەن ارەكەتسىزدىگىنە قۇقىقتىق باعا بەرىلەدى.
مەملەكەت باسشىسىنا رەزونانس تۋدىرعان قىلمىستىق ىستەردى تەرگەۋ جانە قوعام مۇددەسىن قورعاۋ جونىندەگى جۇمىستاردىڭ قورىتىندىسى تۋرالى دا مالىمەت بەرىلدى. الەۋمەتتىك-ەكونوميكالىق سالالاردى تەكسەرۋ ناتيجەسىندە 11 مىڭ ادام ءتۇرلى دەڭگەيدە جاۋاپقا تارتىلدى. تەرگەۋ امالدارى جۇرگىزىلگەننەن كەيىن بيۋدجەتكە 10 ميلليارد تەڭگە قايتارىلدى. سوتتا 15,2 ميلليارد تەڭگە كولەمىندە مەملەكەت مۇددەسى قورعالدى.
بۇدان بولەك, قاسىم-جومارت توقاەۆقا بيزنەستى قورعاۋ جانە ماڭىزدى ينۆەستيتسيالىق جوبالاردى قولداۋ جونىندەگى تاپسىرمالارىنىڭ ورىندالۋ بارىسى تۋرالى دا باياندالدى. اتاپ ايتقاندا, باس پروكۋراتۋرانىڭ باستاماسىمەن 2 مىڭعا جۋىق كاسىپكەرگە زاڭسىز تەكسەرۋ جۇرگىزۋدى كوزدەگەن ءارتۇرلى مينيسترلىكتىڭ 9 بۇيرىعىنىڭ كۇشى جويىلدى. سونداي-اق 2,5 ميلليارد تەڭگە ءوندىرىپ الۋ جونىندەگى 21 مىڭ سالىق بۇيرىعى زاڭسىز دەپ تانىلدى.
سونىمەن قاتار باس پروكۋرور پرەزيدەنتكە قىلمىستىق احۋال جانە قىلمىستىق-قۇقىقتىق سالاداعى ازاماتتاردىڭ كونستيتۋتسيالىق قۇقىقتارىن ساقتاۋ ءۇشىن قابىلدانىپ جاتقان شارالار تۋرالى ايتتى.
كەزدەسۋ سوڭىندا مەملەكەت باسشىسى اباي وبلىسىنداعى ءورتتىڭ ءمان-جايىن وبەكتيۆتى تۇردە تەرگەۋ ماڭىزدى ەكەنىنە توقتالىپ, ەلىمىزدىڭ الەۋمەتتىك جانە ەكونوميكالىق سالالارىنداعى زاڭدىلىقتىڭ ساقتالۋىن قامتاماسىز ەتۋ جونىندە بىرقاتار ناقتى تاپسىرما بەردى.
