ەكوچەللەندج اياسىندا اقمولا وبلىسىنىڭ زەرەندى اۋدانىنداعى قىزىل كوردون اۋىلىندا «Birgemiz» رەسپۋبليكالىق ۆولونتەرلەر فرونت-ءوفيسى جوباسىن ىسكە اسىرۋشى «ۇلتتىق ۆولونتەرلىك جەلىسىنىڭ» جازعى مەكتەبىنىڭ ۆولونتەرلەرى مەن قىزىل كوردون مەكتەبىنىڭ ۇجىمى مەن وقۋشىلارى اكتسيا وتكىزدى. ولار ءبىلىم وشاعى اۋلاسىنا اعاشتار وتىرعىزىپ, سۋارىپ, تازالىق جۇمىستارىن جۇرگىزدى. سونداي-اق ولار ايماقتاعى ورماندى قوقىستان تازارتتى.
– بۇل ءبىز ءۇشىن زور تاجىريبە بولدى. ۆولونتەرلەرمەن ءبىزدىڭ قىزمەتكەرلەر, وقۋشىلار تانىسىپ, ءبىر-بىرىمەن اقپارات الماستى, كوپ نارسە ۇيرەندى. ءبىزدىڭ جەتەكشىلەر ۆولونتەرلەرگە اعاشتى قاشان جانە قالاي وتىرعىزۋ كەرەك, باپتاۋ جولدارى قانداي ەكەنىن ايتىپ بەردى. الداعى ۋاقىتتا دا كومەك بەرۋگە دايىن. مۇنداي شارالار ەكولوگيالىق ءال-اۋقاتتى جاقسارتىپ, وسكەلەڭ ۇرپاقتى تابيعاتتى قۇرمەتتەۋگە تاربيەلەيدى. سوندىقتان ەكواكتسيالار جۇرگىزىلىپ جاتقانىنا قۋانىشتىمىن, – دەدى قىزىل كوردون مەكتەبىنىڭ ديرەكتورى ناتاليا سوبولەۆا.
جالپى, چەللەندجدىڭ ماقساتى – قوعامدا ەكولوگيالىق مادەنيەتتى قالىپتاستىرۋ, تابيعاتتى قورعاۋ, ساقتاۋ جانە ايالاۋدى ناسيحاتتاۋ. ءبىر اپتا بۇرىن باستالعان ءىس-شارا 20 ماۋسىمعا دەيىن جالعاسادى. وعان بارلىق نيەت ءبىلدىرۋشى قاتىسا الادى. اراسىندا كرەاتيۆتى يدەياسى بار, تاپسىرمالاردى تولىق ورىنداعان, «ەكولوگيالىق» قاعيداتتاردى ساقتاعان جاندار ىرىكتەلىپ, جەڭىمپاز انىقتالادى.
