ەركىن كۇرەس شەبەرلەرىنىڭ الەمدىك رەيتينگىندە گرۋزيا مەن اقش بالۋاندارىنىڭ وزگەلەردەن مىسى باسىم. توپ-10-دىقتا قاپ تاۋىنىڭ 11 جانە امەريكانىڭ 10 ءاپايتوسى بار. يران قۇراماسىنىڭ دا قارقىنى كۇشتى. پارسى ەلىنىڭ 8 پەحلەۆانى سول تىزىمگە ەنىپ وتىر. UWW رەيتينگىندە ازەربايجاننىڭ – 7, موڭعوليانىڭ – 6, تۇركيانىڭ – 5, ارمەنيا, قىرعىزستان, ءۇندىستان, بولگاريا, ۋكراينا, پولشانىڭ – 4, پۋەرتو-ريكو, ماجارستان جانە سلوۆاكيانىڭ 3 وكىلىنىڭ ەسىمىن كەزىكتىردىك. كوشباسشىلار جايىندا ايتار بولساق, بۇل تارتىستا اقش الدىنا جان سالار ەمەس. 10 سالماق دارەجەسىنىڭ ۇشەۋىندە امەريكالىقتار ءبىرىنشى ورىندا تۇر. تۇركيانىڭ ەكى بالۋانىنىڭ وزگەلەردەن تۇعىرى بيىك. ولاردان بولەك, ارمەنيا, يران, قىرعىزستان, سلوۆاكيا جانە گرۋزيانىڭ دا سايىپقىراندارى توپ باسىندا كەلەدى. وسى مالىمەتتەردەن-اق, اتالعان سپورت ءتۇرى قاي مەملەكەتتەردە قارقىندى دامىپ كەلە جاتقانىن انىق اڭعارۋعا بولادى.
قازاقستان ۇلتتىق قۇراما كومانداسى مۇشەلەرى اراسىندا ەڭ جاقسى ناتيجەگە ازامات داۋلەتبەكوۆ قول جەتكىزىپ وتىر. 29 جاستاعى جەرلەسىمىز بىلتىر بەلگرادتا وتكەن الەم چەمپيوناتىندا قولا مەدالدى موينىندا جارقىراتىپ, كۇللى قازاق قاۋىمىن قۋانتقان ەدى. ازيا بىرىنشىلىگىندە ول 2 التىن, 1 كۇمىس جانە 1 قولا مەدال يەلەندى. بيىل استانادا جالاۋى جەلبىرگەن سارى قۇرلىقتىڭ باستى دوداسىنا ازاماتتىڭ اسقان شەبەرلىگىنە ءتانتى بولدىق. بارلىق قارسىلاستارىن قاپى قالدىرعان ول فينالدا يراندىق اليرەزا كاريميدى جەڭگەندە, جاقسىلىق ۇشكەمپىروۆ اتىنداعى جەكپە-جەك سارايىنا جينالعان جۇرتتىڭ بورىكتەرىن اسپانعا اتىپ قۋانعانى ەسىمىزدە.
سوڭعى ۋاقىتتا وتاندىق ەركىن كۇرەس شەبەرلەرى اراسىندا ەڭ ناتيجەلى ونەر كورسەتىپ جۇرگەن ءدال وسى داۋلەتبەكوۆ ەكەنىن جانكۇيەرلەر جاقسى بىلەدى. قازاقتىڭ ۇلى تەك سلوۆاكيانىڭ نامىسىن قورعايتىن وسەتين جىگىتى بوريس ماكوەۆ (الەم چەمپيوناتىنىڭ كۇمىس جانە قولا جۇلدەگەرى, ەۋروپا بىرىنشىلىگىنىڭ قولا جۇلدەگەرى) پەن پولشانىڭ ءدۇلد ۇلى سەباستيان ەزەجانسكيدەن (ەۋروپا چەمپيوناتىنىڭ ەكى دۇركىن قولا جۇلدەگەرى) قالىپ كەلەدى. ءتىپتى, يراندىق حاسان يازداني (ريو وليمپياداسىنىڭ جەڭىمپازى, توكيو وليمپياداسىنىڭ كۇمىس جۇلدەگەرى, الەمنىڭ ءۇش دۇركىن چەمپيونى, ەكى مارتە ءفيناليسى, ءبىر مارتە قولا جۇلدەگەرى, ازيا ويىندارىنىڭ جەڭىمپازى, قۇرلىقتىڭ ەكى دۇركىن چەمپيونى), امەريكالىق داۆيد تەيلور (توكيو وليمپياداسىنىڭ جەڭىمپازى, الەمنىڭ ەكى دۇركىن چەمپيونى جانە ءبىر مارتە كۇمىس جۇلدەگەرى, پانامەريكا چەمپيوناتىنىڭ ەكى دۇركىن جەڭىمپازى), ازەربايجاندىق ابۋباكر اباكاروۆ (الەم جانە ەۋروپا چەمپيوناتتارىنىڭ جۇلدەگەرى), يسپانيالىق تايمۋراز فريەۆ (الەم چەمپيوناتىنىڭ قولا جۇلدەگەرى) سىندى اتاقتارى الىسقا جايىلعان جامپوزداردىڭ وزدەرى ءبىزدىڭ ازاماتتان تومەن تۇر.
UWW رەيتينگىنىڭ توپ-10-دىعىنا تاعى ءبىر قانداسىمىز ەنىپ وتىر. ول – راحات قالجان. 57 كيلو سالماقتا بەلدەسىپ جۇرگەن بالۋاندار اراسىندا راحات توعىزىنشى ورىنعا تۇراقتادى. 25 جاستاعى قالجان كوپتەگەن حالىقارالىق دودالارعا قاتىسىپ, بىلتىر ۇلانباتىردا جانە بيىل استانادا جالاۋى جەلبىرەگەن قۇرلىق بىرىنشىلىگىندە كۇمىس پەن قولا مەدالدى موينىنا ءىلدى. وكىنىشكە قاراي, وزگە ەركىن كۇرەس شەبەرلەرىنىڭ قارقىنى باياۋ. الەمدىك رەيتينگتە ولار مىناداي ورىندارعا تابان تىرەدى: دارحان ەسەنعالي (74 كيلو) مەن بولات ساقاەۆ (79 كيلو) – 11, نۇربولات ابدوللاەۆ (61 كيلو) – 12, ريزابەك ايتمۇحان (92 كيلو) – 13, يۋسۋپ باتىرمۋرزاەۆ (+125 كيلو) – 14, بەكزات ۇركىمباي (97 كيلو) – 15, جىگەر زاكىروۆ (79 كيلو) – 19 جانە سانجار دوسجانوۆ (70 كيلو) – 20 ورىن.
دەسەك تە بيىل كوكتەمدە استانادا وتكەن ازيا چەمپيوناتىندا ءتورت بالۋانىمىز جەڭىس تۇعىرىنىڭ ەڭ بيىك ساتىسىنا كوتەرىلىپ, تاعى بىرنەشەۋى جۇلدەگەرلەر ساناتىنان كورىنگەنى بەلگىلى. سول جارىستا ازامات داۋلەتبەكوۆ پەن بولات ساقاەۆتان بولەك, دارحان ەسەنعالي, سانجار دوسجانوۆ جانە ريزابەك ايتمۇحان سەكىلدى دارىندى جاستار دارالانعان بولاتىن. العاشقى ەكەۋى التىن السا, ءۇشىنشىسى كۇمىس مەدالدى ەنشىلەدى. جالىنداپ تۇرعان وسى جىگىتتەر الداعى ۋاقىتتا دا ءدۇبىرلى دودالاردا ەل نامىسىن ابىرويمەن قورعاپ, سونىمەن قاتار الەمدىك رەيتينگتەگى جاعدايلارىن دا جاقسارتادى دەپ ۇمىتتەنەمىز.
ەركىن كۇرەستەن الەمدىك رەيتينگتەگى ۇزدىك ءۇش بالۋان
57 كيلو: 1. توماس گيلمان (اقش), 2. ۆانحاو زوۋ (قىتاي), 3. زەليمحان اباكاروۆ (البانيا).
61 كيلو: 1. ارسەن حارۋتۋنيان (ارمەنيا), 2. رەي حەگۋچي (جاپونيا), 3. رەزا اتري (يران).
65 كيلو: 1. راحمان امۋزاد (يران), 2. يانني دياكوميحاليس (اقش), 3. سەيۋاستيان ريۆەيرا (پۋەرتو-ريكو).
70 كيلو: 1. ەرنازار اكماتاليەۆ (قىرعىزستان), 2. اللەن رەدحەرفورد (اقش), 3. تايشي ناريكۋني (جاپونيا).
74 كيلو: 1. سونەر دەميرتاش (تۇركيا), 2. كايل دەيك (اقش), 3. تايمۋراز سالكازانوۆ (سەربيا).
79 كيلو: 1. دجوردان بارروۋز (اقش), 2. ۆاسيلي ميحايلوۆ (ۋكراينا), 3. بەكزود ابدۋراحمونوۆ (وزبەكستان).
86 كيلو: 1. بوريس ماكوەۆ (سلوۆاكيا), 2. سەباستيان ەزەجانسكي (پولشا), 3. ازامات داۋلەتبەكوۆ (قازاقستان).
92 كيلو: 1. ميرياني مايسۋرادزە (گرۋزيا), 2. كامران گاسەمپۋر (يران), 3. وسمان نۇرماگامەدوۆ (ازەربايجان).
97 كيلو: 1. كايل سنايدەر (اقش), 2. باتىربەك تساكۋلوۆ (سلوۆاكيا), 3. ۆلاديسلاۆ بايتساەۆ (ماجارستان).
125 كيلو: 1. تاحا اقگۇل (تۇركيا), 2. گەنو پاتراشۆيلي (گرۋزيا), 3. لحاگۆاگەرەل مۇڭحتۇر (موڭعوليا).
