بۇل اۋىلدا بۇرىن-سوڭدى مادەنيەت ءۇيى بولماعان. وسى ۋاقىتقا دەيىن كىتاپحانا شاعىن بالاباقشا عيماراتىندا ورنالاسقان ەدى. اۋماعى وتە تار بولعاندىقتان, ءارتۇرلى شارالار وتكىزۋگە دە قولايسىز-تۇعىن. سوندىقتان دا بۇل كۇنى اۋىل تۇرعىندارى ءۇشىن اق تۇيەنىڭ قارنى جارىلعانداي بولدى. سالتاناتتى جيىنعا اۋدان باسشىلىعى قاتىسىپ, اۋىل تۇرعىندارىن كوپتەن كۇتكەن قۋانىشپەن قۇتتىقتادى. ەرەكشە ۇلگىدە سالىنعان مادەنيەت ءۇيىنىڭ اشىلۋىنا كەلگەن قوناقتار دا وزدەرىنىڭ جىلى لەبىزدەرىن ءبىلدىردى. كوپ جىل اۋىلدىق كىتاپحانادا قىزمەت اتقارعان اق جاۋلىقتى اجە گۇلجامال كىجىكوۆا كيەلى شاڭىراقتان بەرەكە-بىرلىك, ىنتىماق ارىلماسىن دەگەن نيەتپەن شاشۋ شاشتى.
كەڭ ءارى جارىق عيماراتتىڭ ەكىنشى قاباتىندا اشىلعان كىتاپحانا جاڭا ۇستەلدەرمەن, جۇمساق ورىندىقتارمەن جانە كىتاپ سورەلەرىمەن قامتاماسىز ەتىلدى. قازىرگى ۋاقىتتا كىتاپحانادا وقىرمان سانى 608-گە جەتكەن. 9 748 كىتاپ قورى بار. جاڭا كىتاپتارمەن جىل كولەمىندە ۇزدىكسىز تولىقتىرىلىپ كەلەدى. سونىمەن قاتار كىتاپحانادا شاحمات, دويبى ۇيىرمەسى جۇمىس ىستەپ تۇر. زامان تالابىنا ساي ينتەرنەت جەلىسىمەن, كومپيۋتەرمەن, قۇجاتتاردى تسيفرلاۋعا, قاعازعا باسىپ شىعارۋعا ارنالعان كوپفۋنكتسيالى قۇرىلعىمەن قامتاماسىز ەتىلگەن. اتاۋلى كۇندەرگە, ايتۋلى داتالارعا بايلانىستى ءتۇرلى كەزدەسۋلەر, سۇحباتتار, وقىرمان كونفەرەنتسيالارى, دوڭگەلەك ۇستەلدەر وتكىزىلىپ تۇرادى. اتاپ ايتساق, «دۇنيەجۇزىلىك كىتاپ جانە اۆتورلىق قۇقىقتى قورعاۋ» كۇنىنە ورايلاستىرىلعان ء«Kىتاپ شوۋ-2023» رەسپۋبليكالىق اكتسياسى اياسىندا اينابۇلاق اۋىلدىق كىتاپحاناسىندا دا كىتاپ فەستيۆالى ءوتتى. ءىس-شارادا وقىرماندارعا «قيالدار الەمى» اتتى كىتاپ كورمەسى ۇسىنىلدى. كورمەگە وقىرماندار نازارىنا ءار ەلدىڭ ەرتەگى كىتاپتارى, كوركەم سۋرەتتەلگەن يلليۋستراتسيالى كىتاپتار مەن QR كود ارقىلى ۇيالى تەلەفوننان كورۋگە ارنالعان ەرتەگىلەر جيناعى قويىلدى. سونىمەن قاتار ەرتەگى كەيىپكەرلەرىنىڭ ماكەتتەر كورمەسى ۇسىنىلىپ, قيالدار الەمىنە ساياحات جاسالدى. وسى ورايدا «مەنىڭ سۇيىكتى كەيىپكەرىم» تاقىرىبىندا وقىرماندارمەن پىكىرلەسۋ, وي الماسۋ ءوتتى.
شىعىس قازاقستان وبلىسى,
زايسان اۋدانى
