اتا-انالاردىڭ نازارىن وتباسىلىق قۇندىلىقتارعا اۋدارۋ, بالالار مۇددەسىن, ولاردىڭ تاڭداۋى مەن تىلەكتەرىن قۇرمەتتەۋگە شاقىرۋدى ماقسات تۇتقان قويىلىمنىڭ نەگىزگى وزەگى – وتباسىنداعى احۋال بالانىڭ جان-جاقتى قالىپتاسۋىنا اسەر ەتەتىنىن, تابيعاتپەن ۇيلەسىمدە بولۋى كوكجيەگىن كەڭەيتەتىنىن كورسەتۋ.
ەرتەگىنىڭ باستى كەيىپكەرى – قاراگوز ەسىمدى قىز. ونىڭ بولاشاقتى بولجاي الاتىن قاسيەتى بار. ەرەكشە قىزدىڭ ايرىقشا قابىلەتىن قابىلداي الماعان اينالاسى ودان بەزىنەدى. ءتىپتى قارشاداي قىز تۋعان اۋىلىنان قۋىلادى. وتباسىنان الشاقتاپ, اۋىل تۇرعىندارىنان ءزابىر كورگەن قاراگوز ەندى كەك الۋعا بەل بۋادى. وسىلايشا, ول قاھارلى سيقىرشىعا اينالادى. الايدا ماحاببات پەن ىزگىلىك قاراگوزدى عانا ەمەس, اۋىلداعى بارلىق بالانى قاساڭ قاعيدالار قامىتىنان قۇتقارادى. قازاق ميفولوگياسىنىڭ وزەگىنەن ءنار العان قويىلىمنىڭ جاس جەتكىنشەكتەر عانا ەمەس, ولاردىڭ اتا-اناسىنا دا ايتارى كوپ.
«پەداگوگيكا سالاسىندا 25 جىلدان اسا تاجىريبەم بولسا دا, بۇل قويىلىمدى دايىنداۋ وڭاي بولعان جوق. بالالار كاسىبي اكتەر بولماعاننان كەيىن ساحنالىق ءار دەتالمەن تاتپىشتەي جۇمىس ىستەۋگە تۋرا كەلدى. ءتۇرلى تاجىريبەگە باردىق. ناتيجەسىندە, ىزدەنىسىمىز بالالارعا ۇنادى. كوزدەرىندە جانعان جالىن, ساحنالىق ونەرگە دەگەن قۇشتارلىق الدىمىزدان كەزدەسكەن بارلىق قيىندىقتى ەڭسەرۋگە كومەكتەستى. تاماشا شابىت سىيلادى. جالپى, ءبىز بۇل شىعارمانى بەكەر العان جوقپىز. «التىن ولكە اڭىزى» ەرتەگىسى ارقىلى ەڭ اۋەلى اتا-انالارعا وي سالعىمىز كەلدى. بالالارىمەن قارىم-قاتىناستا جىبەرىپ جاتاتىن كوپتەگەن قاتەلىك پەن كەمشىلىكتى تۇزەۋگە سەپ بولسىن دەدىك. وزدەرىڭىز كۋا بولعانداي, قويىلىمداعى قاراگوز ەسىمدى قىزدىڭ ەرەكشە قابىلەتىن, وزگەلەردەن ەرەكشە مىنەزىن اينالاسى قابىلداعان جوق. سونىڭ سالدارىنان قاراگوز اۋىلدان قۋىلادى. بۇل ونى اشىندىرادى دا, قايىرىمدى قاراگوز جاۋىز جەزتىرناققا اينالادى. ونى قاتىگەزدىكتەن قۇتقارعان تۋعان حالقىنىڭ ءانى. اننەن قۋات العان قاراگوز باياعى قالپىنا ورالادى. مىنە, وسى وقيعا ارقىلى ءبىز كەز كەلگەن بالانىڭ ەرەكشە قابىلەتى, مىنەزى بولاتىنىن كورەمىز. سونى ءار اتا-انا سول قالپىندا قابىلداي بىلۋگە ءتيىس. ءوزىنىڭ تانىم-تۇسىنىگىنە يكەمدەۋگە تىرىسۋ, كوپپەن بىردەي ويلاۋعا باۋلۋ بالانىڭ بالعىن ساناسىندا قارسىلىق تۋدىرادى. ونداي قارسىلىق ءتىپتى كەيدە قاتىگەزدىككە دا اۋىسۋى مۇمكىن. سول سەبەپتى دە بالانىڭ تابيعاتىن, بولمىسىن وزگەرتۋگە ۇمتىلماي, كەرىسىنشە سول قالپىندا قابىلداي بىلگەن ءجون. وسى جاعىنا اباي بولۋ كەرەك دەگەندى ايتقىمىز كەلدى. سول نەگىزدە وي سالۋعا ۇمتىلدىق», دەيدى قويىلىم رەجيسسەرى ءلاززات سۇلەيمەنوۆا.
«سامۇرىق-قازىنا» كومپانيالار توبىنىڭ بىرىڭعاي قايىرىمدىلىق وپەراتورى «Samruk-Kazyna Trust» الەۋمەتتىك جوبالاردى دامىتۋ قورىنىڭ دەمەۋشىلىگىمەن كورەرمەنگە جول تارتقان ەرتەگىنى ساحنالاۋعا «زامانداس» وتباسىلىق اۋلا كلۋبىنىڭ 80-گە جۋىق تاربيەلەنۋشىسى, ونىڭ ىشىندە جاس اكتەرلەر, دومبىراشىلار مەن بيشىلەر قاتىستى.
«بۇگىن ءبىز ادەمى اڭىزعا قانىعىپ, كەرەمەت ەرتەگىنى تاماشالادىق. سونىمەن قاتار ساحنانىڭ سانىنە اينالعان بالالارىمىزدىڭ جۇلدىزى جانعانىنا كۋا بولدىق. ءبىزدىڭ بالالارىمىز تالانتتى ءارى شىنايى ونەر كورسەتتى. ولارعا بولاشاقتا تابىس, دەنساۋلىق, سونداي-اق ارماندارىنىڭ جۇزەگە اسۋىن تىلەيمىن», دەدى «Samruk-Kazyna Trust» قورىنىڭ باس ديرەكتورى ءالفيا اديەۆا.
12 جىل بويى ەلوردالىق «زامانداس» وتباسىلىق اۋلا كلۋبى الەۋمەتتىك وسال ساناتتاعى بالالارعا ءتۇرلى شىعارماشىلىق, سپورتتىق جانە ءبىلىم بەرۋ سەكتسيالارى مەن ۇيىرمەلەردە تەگىن وقۋعا مۇمكىندىك بەرىپ كەلەدى. قوعامدىق قور ديرەكتورى ءلاززات الشىنوۆانىڭ ايتۋىنشا, 2023 جىلى كلۋبقا 3000-نان استام بالا مەن اتا-انا مۇشە بولعان.
ء«بىزدىڭ تاربيەلەنۋشىلەر بوس ۋاقىتىندا كلۋبقا بارىپ قانا قويماي, ءوز ماقساتتارىن جۇزەگە اسىرۋعا ۇمتىلادى. رەسپۋبليكالىق چەمپيوناتتاردا جەڭىپماز اتانىپ, كانديداتتار مەن سپورت شەبەرلەرى بولادى, شىعارماشىلىق كونكۋرستار مەن جارىستاردا توپ جارادى. «التىن ولكە اڭىزى» قويىلىمى – بىرنەشە اي بويى ەڭبەك ەتكەن ۇيىمداستىرۋشىلاردىڭ, وقىتۋشىلار مەن بالالاردىڭ ۇجىمدىق جۇمىسىنىڭ تاعى ءبىر جەتىستىگى», دەپ اتاپ ءوتتى «زامانداس 21» قوعامدىق قورىنىڭ ديرەكتورى ءلاززات الشىنوۆا.
ءيا, «زامانداس» وتباسىلىق اۋلا كلۋبىنىڭ تەاتر ستۋدياسىنداعى بالالار مەن وقىتۋشىلاردىڭ شىعارماشىلىعى – شىن مانىندە سۇيسىنۋگە تۇرارلىق قاجىرلى ەڭبەكتىڭ جەمىسى. سونىڭ ءبىرى – بۇگىنگى ءبىز تاماشالاعان «التىن ولكە اڭىزى» ەرتەگىسى. قويىلىمعا قاتىسقان ءار بالا ءوز كەيىپكەرىمەن ءومىر ءسۇرىپ, ساحنانىڭ ءسانىن كىرگىزدى. اسىرەسە باستى رولدەگى جەزتىرناق, ايشا, داناي, جانازار بەينەلەرى كوپشىلىكتىڭ قوشەمەتىنە بولەندى. ەپيزودتىق ءرول بولسا دا قوساياق بەينەسىندەگى بالدىرعاننىڭ ويىنى جان-جاقتى ىزدەنىسىمەن ريزا قىلدى. سونداي-اق «التىن ولكە اڭىزى» سپەكتاكلىنىڭ پرەمەراسىندا ەرەكشە ەستە قالعانى دومبىراشىلاردىڭ ساحنادا تۋدىرعان قىزىقتى مۋزىكالىق شەشىمدەرى دەسەك, ارتىق ايتقاندىعىمىز ەمەس. تالعاممەن تاڭدالعان مۋزىكا كوپشىلىكتى ءتانتى ەتتى. ال كورەرمەندەردىڭ شىنايى ىقىلاسى مەن قوشەمەتى جاس ارتىستەرگە قانات ءبىتىردى.
«مەنىڭ اتى-ءجونىم – ءۇمىت دۇيسەنبەك. اكتريسا بولسام دەگەن ارمانىمدى جۇزەگە اسىرۋعا كومەكتەسكەن, ساحنا ونەرىنە باۋلىعان ۇستازىم, بۇگىنگى قويىلىمنىڭ رەجيسسەرى ءلاززات سۇلەيمەنوۆاعا ەرەكشە العىس بىلدىرگىم كەلەدى. ساحناداعى ءىس-قيمىلىمدى, سويلەۋ مانەرىن – بارلىعىن ماعان سول كىسى ۇيرەتتى. مەن ويناعان جەزتىرناق – نەگىزگى كەيىپكەردىڭ ءبىرى. بۇل ءرول ارقىلى ادام مىنەزىنىڭ سان قىرلىلىعىن, ادام قانشا قاتىگەز بولسا دا, ءبارىبىر مەيىرىمگە, قولداۋعا, قامقورلىققا ءزارۋ ەكەندىگىن ايتقىم كەلدى. ارينە, بۇعان دەيىن دە بىرنەشە رولدە وينادىم. الايدا بۇگىنگى ەرتەگىنىڭ ورنى ەرەكشە. ەرەكشەلىگى سول – قويىلىمىمىز كورەرمەندى ويلانتىپ قانا قويمايدى, ادام جانىنا تەرەڭنەن بويلاۋعا ۇيرەتەدى», دەگەن جاس ونەرپازدىڭ ءسوزىن قويىلىمدا جاس باتىر جانازار بەينەسىندە كورىنگەن دارىندى وقۋشى ارحات جولدىباي بىلاي ساباقتادى: «اتىم ارحات, جاسىم 15-تە. بۇل – مەنىڭ ساحنالىق ونەردەگى العاشقى جۇمىسىم. اسەرىمدى سوزبەن ايتىپ جەتكىزۋ مۇمكىن ەمەس. وسى ءساتتى باقىتتى ءسات دەپ ايتار ەدىم. شىنىمەن, قويىلىمعا دايىندالعان كەز ءبىزدىڭ ارقايسىمىزعا ۇمىتىلماس ەستەلىكتەر سىيلادى. جاڭا دوستار تاپتىق. ەڭ باستىسى, مەن بۇعان دەيىن ءتىپتى ءوزىم بايقاماي كەلگەن بويىمداعى اكتەرلىك قابىلەتتىڭ بارىن ءبىلدىم. قاتتى ۇنادى. بولاشاقتا دا وسى جۇمىستى جالعاستىرىپ, ساحنادا قىزىقتى وبرازدار تۋدىرعىم كەلەدى. كينوعا تۇسسەم دەگەن ارمانىم دا بار», دەدى ارحات اعىنان اقتارىلىپ.
جاس دارىنداردىڭ ساحناداعى جۇلدىزىن جاعىپ قانا قويماي, ولاردىڭ تاربيەسى مەن ومىرلىك ۇستانىمدارىنىڭ ايقىندالۋىنا, تۇلعا رەتىندە وزدەرىن جان-جاقتى دامىتۋىنا سەپتەسىپ, ولشەۋسىز ەڭبەك ءسىڭىرىپ كەلە جاتقان «زامانداس» قوعامدىق قورىنىڭ شىن مانىندە زامانداستارىنا ۇسىنار ءتالىمى مەن تاعىلىمى مول. ونى, اسىرەسە, ساحنادا جالىن اتىپ ونەر كورسەتكەن جەتكىنشەكتەردىڭ وتتى جانارى مەن بالاسىنىڭ ونەرىن ماقتان تۇتقان ءار اتا-انانىڭ تولاسسىز سوعىلعان شاپالاق ۇنىنەن ايقىن سەزگەندەي بولدىق. ال ۇلى دالانىڭ ۇلتتىق قۇندىلىقتارىن وقيعا وزەگىنە اينالدىرعان قويىلىمنىڭ كىشكەنتاي كورەرمەندەر عانا ەمەس, ەرەسەكتەرگە دە ايتارى مول.
