«وبلىس 2023 جىلدىڭ 4 ايى قورىتىندىسىمەن الەۋمەتتىك-ەكونوميكالىق دامۋدىڭ ماكروكورسەتكىشتەرى بويىنشا وڭ ديناميكاعا قول جەتكىزدى. اۋىل شارۋاشىلىعىنىڭ جالپى ءونىمى 1,6, وڭدەۋ ونەركاسىبىنىڭ كولەمى 1,9 پايىزعا, پايدالانۋعا بەرىلگەن تۇرعىن ۇيلەر كولەمى 2,4, ساۋدا كولەمى 2,5, ينۆەستيتسيالار تارتۋ 42,1 جانە قۇرىلىس جۇمىستارىنىڭ كولەمى 44 پايىزعا ارتتى. بۇگىندە وبلىس بيۋدجەتى 593 ملرد تەڭگە بولىپ تۇر. بۇل بىلتىرعى بيۋدجەتتەن 53 پايىزعا ارتىق. بيۋدجەتتىڭ 64 پايىزى نەمەسە 378,6 ملرد. تەڭگەسى الەۋمەتتىك سالاعا باعىتتالعان», دەدى ن.نالىباەۆ.
قوردىڭ سارقىلۋى سالدارىنان 2013 جىلدان بەرى وڭىردە مۇناي ءوندىرۋ 6,5 ملن تونناعا ازايعان. قازىر جاڭا كەن ورىندارىن يگەرۋ ءۇشىن «شۋ-سارىسۋ» باسسەينىندە گەولوگيالىق-گەوفيزيكالىق زەرتتەۋ جۇمىستارى اياقتالىپ, ارال باسسەينىنىڭ «باتىس» جانە «شىعىس» بولىگىندە جالعاسۋدا.
وڭىردە شيكىزاتقا تاۋەلدىلىكتى ازايتۋ ءۇشىن ەكونوميكانى ارتاراپتاندىرۋعا باعىتتالعان جوبالاردى ىسكە اسىرۋ جالعاسادى. اتاپ ايتقاندا, يندۋستريالاندىرۋ اياسىندا وڭىردە قۇنى 607,7 ملرد تەڭگەنى قۇرايتىن 34 جوبا جۇزەگە اسىرىلۋدا. بۇل جوبالار 6,3 مىڭ ادامدى جۇمىسپەن قامتۋعا مۇمكىندىك بەرەدى.
مەملەكەت باسشىسىنىڭ تاپسىرماسىنا سايكەس جالپىۇلتتىق بىرىڭعاي جوبالار پۋلى قالىپتاسىپ, وعان قۇنى 907 ملرد. تەڭگەدەن اساتىن 36 جوبا ەنگىزىلدى. وتكەن جىلى قۇنى 5,1 ملرد تەڭگە بولاتىن 4 جوبا ىسكە قوسىلدى. بيىل سىر وڭىرىندە قۇنى 13,4 ملرد تەڭگەنىڭ 9 جوباسى جۇزەگە اسىرىلادى. بۇل وڭىرگە ينۆەستيتسيا تارتۋ قارقىنىن ارتتىرۋعا مۇمكىندىك بەرەدى.
