قوستانايدان تورعايعا جولاۋشىلاپ شىققان ادام اۋليەكولدەن ءارى قاراي امانتوعايعا دەيىن شامامەن 260 شاقىرىمداي جول جۇرەدى. وسى ەكى ارالىقتا جولاي سوعىپ, از-كەم ايالداپ, تىنىعىپ, جۇرەك جالعاپ الاتىن ءدامحانا جوق. ال امانتوعايداعى جالعىز ءدامحانا قاس قارايماي تۇرىپ جابىلىپ قالادى.
جوقتىڭ ورنىن تولتىرعانداي بولعان جول بويىنداعى دامحاناعا ءارى-بەرى اعىلىپ جاتقان جولاۋشىلار دا ءجيى تۇسەدى. قىمىزحانانى ەكى جىگىت اشىپتى. ەكەۋى دە قاراسۋ اۋىلىندا تۇرادى. ەكەۋىنىڭ دە ەسىمدەرى – ەلامان.
– جول بويىندا اسحاناعا سۇرانىس بار. سوندىقتان دوسىم ەكەۋمىز اقىلداسا كەلىپ, وتباسىمىزبەن بىرىگىپ ءبىر قىمىزحانا اشۋ تۋرالى شەشىمگە كەلدىك. ساۋىردەن بەرى جۇمىس ىستەپ جاتىر. اسپازىمىز دا, اكىمشىمىز دە – كەلىنشەكتەرىمىز. ءبىز سىرتقى شارۋالاردى ىستەپ, سۇراعاندارىن اكەپ بەرىپ تۇرامىز. وسىدان ەكى جىل بۇرىن جەكە كاسىپ اشىپ, مەملەكەتتەن 500 مىڭ تەڭگە كولەمىندە قايتارىمسىز قارجىلاي كومەك العانمىن. ءسويتىپ, دونەر جاساي باستادىم. بىراق جالعا العان عيماراتىم دۇرىس بولماي, ءىسىم ونىڭكىرەمەدى. سودان ەلامان ەكى كيىز ءۇي ساتىپ الىپ, بىرىگىپ قىمىزحانا اشايىق دەگەن ۇسىنىس ايتتى. قازىر كەلۋشىلەردىڭ قالاۋى بويىنشا كەز كەلگەن تاعامدى پىسىرە بەرەمىز. دونەر, پيتستسا, كاۋاپ, قىمىز, قۇيماق, ماي, باۋىرساق – ءبارى بار. تاپسىرىس بويىنشا بۇقپا ءپىسىرىپ, ەت اسىپ بەرەمىز. ماسەلەن, 7 مامىردا 3-4 كۇن قاتارىنان ەكى كيىز ءۇي بوساماي قالدى. ايەل ادامدار ەر ازاماتتارعا مەرەكەلىك داستارقان جاسادى. مەكتەپ بىتىرۋشىلەردەن دە تاپسىرىستار ءتۇسىپ جاتىر, – دەيدى قىمىزحانانىڭ يەسى ەلامان ساعىمباي.
اناداي جەردە ءبىر-ەكى جىلقى, ارىرەكتە جالعىز قارا ەسەك جايىلىپ ءجۇر ەكەن. بۇل جانۋارلار دا وسى قىمىزحاناعا قىزمەت ەتەتىن بولىپ شىقتى. بالالار قازاقى شاپان كيىپ ەسەككە ءمىنىپ قىزىقتايدى. ويتكەنى ەسەك مالى بۇل وڭىردە كوپ كەزدەسە بەرمەيدى. باتىردىڭ كيىمىن كيىپ, ات ءمىنىپ, سۋرەتكە تۇسۋگە دە بولادى. كيىز ءۇيدىڭ ارتىندا ساداق تارتىپ, نىسانا كوزدەيتىن الاڭ دا بار.
كاسىپ يەلەرى ون شاقتى بيە بايلاپ وتىر. مۇنىڭ سىرتىندا, جيىرما شاقتى سيىر ساۋىپ, سۇتىنەن قۇرت, سارى ماي, ىرىمشىك ايىرىپ وتىر. بيە مەن ساۋىن سيىر ارنايى اپپاراتپەن ساۋىلادى. «راحات ەكەن. 8-سىنىپ وقيتىن ءىنىم مەن كەلىنشەگىم وزدەرى ساۋا بەرەدى. جولشىباي توقتاعان كىسىلەرگە قايماق, سارى ماي, قىمىز ساتامىز. قازىر كوبىنە, سارى ماي مەن بال قىمىز ءوتىپ تۇر», دەيدى ەلامان.
قوستاناي وبلىسى,
امانگەلدى اۋدانى
