ANTIKOR ءباسپاسوز قىزمەتى حابارلاعانداي, سوتتالعان قايرات ساتىبالدى ۇلى قىلمىستىق-اتقارۋ جۇيەسىنىڭ ءتيىستى مەكەمەسىندە باس بوستاندىعىنان ايىرۋ تۇرىندەگى جازاسىن وتەپ جاتىر.
«بۇل رەتتە وعان قاتىستى سالىقتاردى تولەمەۋگە جانە قىلمىستىق كىرىستەردى زاڭداستىرۋعا بايلانىستى قىلمىستاردىڭ باسقا ەپيزودتارى بويىنشا تەرگەۋ جالعاسىپ كەلەدى. تەرگەۋ بارىسىندا زاڭسىز شىعارىلعان اكتيۆتەردى, سونداي-اق قىلمىستىق قاراجاتقا ساتىپ الىنعان م ۇلىكتى قايتارۋ بويىنشا شارالار قابىلدانادى. وسىعان بايلانىستى ساتىبالدى ۇلىنا زالالدى وتەۋ ماقساتىندا بيزنەس ورتالىقتار, اكىمشىلىك عيماراتتار, كوممەرتسيالىق ءۇي-جايلار, ۇيلەر, پاتەرلەر, اياقتالماعان قۇرىلىس وبەكتىلەرى, جەر ۋچاسكەلەرى, ەكسكليۋزيۆتى زەرگەرلىك بۇيىمدار, ليۋكس اۆتوماشينالار مەن اقشالاي قاراجات مەملەكەتكە بەرىلەدى. ولاردىڭ قاتارىنا 2021 جىلدىڭ قاراشا ايىندا ساتىبالدى ۇلىمەن بايلانىستى كاسىپورىن ساتىپ العان «Double Tree by Hilton Almaty» قوناق ءۇيى كىرەدى», دەپ ءتۇسىندىردى اگەنتتىك قىزمەتكەرلەرى.
قازىرگى ۋاقىتتا وسى وبەكتىنى مەملەكەت مەنشىگىنە قايتارۋ جۇمىستارى اياقتالۋعا جاقىن.
سونىمەن قاتار ۆەدومستۆو وكىلدەرى ازاماتتاردى جالعان اقپارات تاراتۋعا جول بەرمەۋگە شاقىردى.
بۇعان دەيىن تەلەجۇرگىزۋشى, دەپۋتات ماقسات تولىقباي الەۋمەتتىك جەلىدەگى پاراقشاسىندا قايرات ساتىبالدىنىڭ زاڭسىز جولمەن تارتىپ العان بيزنەسى تۋرالى جازبا قالدىرعان ەدى.
